TOTACHIJCHIUJKAUJ kinextia ke kinpoujkaita taltikpakneminij keman kinmaka se netetayokolil tein kitelpia ipatiuj: kinkaua maj yejuan taixpejpenakan. Uan no, kinmaka miak tatiochiualismej akin kikuij nejon netetayokolil uan amo kichiaj kiseliskej teisa uan ijkon kitayekanaltiskej taueyichiualis tein melauak, kiueyitaliaj iTokay uan tapaleuiaj maj mochiua iTanejnekilis. Jiova amo kineki maj tiktakamatikan porin tikmouiliaj oso porin ijkon moneki tikchiuaskej. Ta kiyolpaktia maj tiknekikan tiktekitiliskej porin yekmelauj tiktasojtaj uan tiktasojkamatiliaj tein toka kichiuani.

Kemej neskayot, keman israelitas moajsiaj taluakyan ompa Sinaí, Jiova kinnauatij maj kichijchiuaskiaj se kali kampa kiueyichiuaskiaj. Kiniluij: “Namejuan xiktemakakan se netetayokolil tein yeski iaxka Jiova. Maj nochin akin ininyolo kinolinis kiualkuikan kemej netetayokolil tein kimakaskej Jiova” (Éx. 35:5). Sejse israelita kitemakaskia tein yeski tein ueliskia, uan nejon tein kitemakaskia ika nochi iyolo ueliskia motekitiltis kemej tapaleuiskia maj mochiua itanejnekilis Dios. ¿Toni kichiuak xolal?

“Nochin akin ininyolo kinolinij” kitemakakej se netetayokolil, “nochin akin kiyolnejnekiaj tapaleuiskej”. Takamej uan siuamej kitemakakej teisa tein ika tapaleuijkej maj mochiua tekit tein Jiova kinnauatijka, kemej pipilolmej, anillos, oro, plata, cobre, hilo azul, itojmiyo ichkat tein kitapaluiayaj ika tapal púrpura, fibra escarlata, lino tein okachi kuali, itojmiyo chivo, ininkuetaxyo ichkamej tein kitapaluiayaj ika tapal chichiltik uan ininkuetaxyo focas, acacia kouit, kualtsitsin tetsitsin uan tataman aceite. Satepan, nochi “tein kiualkuikej senkis ajsiaya tein ika mochiuaskia nochi tekit tein ixyetoya, uan hasta mokauakok” (Éx. 35:21-24, 27-29; 36:7).

Tein Jiova okachi kiyolpaktij amo ipatiuj tein kipiayaj nejon netetayokolilmej, ta kiitas ke kitemakayaj ika nochi ininyolo uan ijkon kipaleuiskej taueyichiualis tein melauak. Uan xolal no tapaleuij ika tekit tein mochiuak. Biblia kijtoua: “Nochi siuamej tamatinij tajkitikej ika ininmauan”. No kinextia: “Nochi siuamej tamatinij akin ininyolo kinolinij tajkitikej ika itojmiyo chivo”. Uan no, Jiova kimakak Bezalel tamatilis, taajsikamatilis, “uan taixmatilis itech nochi tataman tamachijchiualis”. Kemaj, Jiova kinmakak Bezalel uan Oholiab taixmatilis tein monekia tein kinpaleuiskia maj kichiuaskiaj nochi tekit tein kinnauatijka (Éx. 35:25, 26, 30-35).

Keman Jiova kinyoleuak israelitas maj kitemakaskiaj netetayokolilmej, senkis kimatia ke “nochin akin kiyolnejnekiaj”, kipaleuiskiaj taueyichiualis tein melauak. Uan yejua ika, kemej kitemakakej ika nochi ininyolo, yejuatsin semi kintatiochiuij keman kinixyekanak uan kichiuak maj kipianij ueyi yolpakilis. Ijkon, Jiova kinextij ke ijkuak itekitikauan kitemakaj teisa ika nochi ininyolo yejuatsin kintatiochiuia keman kinmaka nochi tein moneki uan taixmatilis tein kinpaleuis maj kichiuakan iTanejnekilis (Sal. 34:9). Komo tiktekitiliaj Jiova uan amo tikchiaj tikseliskej teisa, tikyekmatij ke yejuatsin techtatiochiuis.