ITECH tonal 28 metsti abril xiuit 2013 itech altepet Nagoya (Japón) mochiuak se nechikol tein amo keman mochiujtoya. Panoua 210,000 taltikpakneminij kikakkej nechikol, sekin yetoyaj kampa mochiuak uan oksekin kiitakej itech Internet. Anthony Morris, semej Oloch Taojtokaltianij akin kinixyekanaj itaixpantijkauan Jiova, moajsik itech nejon nechikol uan ompa kitematiltij ke kisak se yankuik amaix itech tajtol japonés tein itokay La Biblia: el Evangelio según Mateo. Tokniuan semi yolpakkej uan uejkauak momataxkalojtoyaj.

Amaix kipia 128 páginas uan kipia amatajkuilol Mateo tein mokixtij itech Traducción del Nuevo Mundo. Tokniuj Morris kimelauak ke nejin amaix kipia seki taman tein tel kuali uan chijchiujtok kemej kinpaleuis akin tajtouaj japonés. ¿Keyej tel tapaleuis? ¿Keyej monekik kikixtiskej? ¿Uan keniuj kiselijkej akin tajtouaj japonés?

Miakej kitelmoujkaitakej kemej ijkuiliujtok nejin amaix. Tajtol japonés ueli moijkuiloua euitika oso ixtapal. Axkan, miakej amaixmej itech nejon tajtol moijkuiloua ixtapal kemej tejuan titajkuilouaj. Uan toamaixuan no ijkon moijkuilouaj. Sayoj ke nejin amaix ijkuiliujtok euitika, ijkon kemej moijkuilouaj periódicos itech tajtol japonés uan okseki amaixmej. ¿Keyej? Porin miakej akin tajtouaj japonés okachi amo kinouijmaka kiixtajtoltiskej keman ijkon ijkuiliujtok. Uan no, tanemililmej tein Biblia kipia ikuapan, kipanoltijkej itech tajkuilol ika uejueyi letra. Ijkon, akin kiixtajtoltiaj okachi kuali kiitaj katiyejua tanemililmej tayekantokej.

Keman tokniuan kiselijkej nejin amaix, niman peujkej kiixtajtoltiaj. Se tokniuj siuat akin kipia 80 xiujmej kijtoj: “Miakpa nikixtajtoltiani amatajkuilol Mateo, sayoj ke kemej nejin amaix ijkuiliujtok euitika uan tanemililmej tein tayekantokej ijkuiliujtok ika uejueyi letra, nechpaleuiani maj okachi nikajsikamati tamachtilis tein Jesús kitemakak itech se tepet”. Uan se tokniuj ichpoch kijtoj: “Niktamiixtajtoltij amaix keman peuak nikita. Uan maski nimomattok nikixtajtoltis tein ijkuiliujtok ixtapal, nikmati ke tel miakej okachi kiuelitaj tein ijkuiliujtok euitika”.

Nejin amaix kintelpaleuis akin tajtouaj japonés. ¿Keyej? Porin maski miakej amo semi kimatij tein kijtoua Biblia, kinekij kiixtajtoltiskej. Akin amo keman kipianij se Biblia, axkan uelis kiixtajtoltiskej se tajkuilol tein kipia.

Sayoj ke ¿keyej moixpejpenak amatajkuilol Mateo? Porin itech altepet Japón, keman taltikpakneminij kikakij ke ika motajtoua Biblia, tel miakej itech tanemiliaj Jesucristo. Uan nejin tajkuilol ika tajtoua keman Jesús yolik, iuejkaujtatuan, tamachtilis tein motelixmati tein kitemakak itech se tepet uan tein kijtoj ke mochiuaskia itamian tonalmej. Tel miakej akin nemij Japón kiuelitaj nejon tamachtilis.

 Tokniuan kiteluelitaj kitenextiliskej nejin amaix keman tanojnotsaj uan keman oksepa kinkalpanouaj akin kinekij kimatiskej okachi. Se tokniuj siuat kijtoj: “Axkan okachi ueli tikinkauiliaj iTajtol Dios taltikpakneminij. Tein melauj, satepan ke tamik nechikol, uelik nikauilij se amaix se taltikpaknenkej”.

Miakej akin nemij Japón kiixmatij tajtolmej kemej nejin: “Xikalakikan [...] kampa ne kalteno amo patauak”, “Amo xikinmaktilikan [...] pitsome [...] perlas ten semi telpatio” oso “Amo ximoyolkuejmolokan den toni mochiuas mosta” (Mat. 6:34; 7:6, 13). Sayoj ke miakej amo kimatij ke nejon tajtolmej kijtoj Jesucristo. Yejua ika tokniuan kinnextiliaj kani ijkuiliujtok itech nejin yankuik amaix. Uan taltikpakneminij semi kimoujkaitaj uan kijtouaj ke ipa kinektoyaj kiixtajtoltiskej Biblia maski sayoj sepa.

Keman tokniuan oksepa kinkalpanouaj akin kiselijkej amaix, miakej kijtouaj ke niman peuak kiixtajtoltiaj. ¡Sekin kitamiixtajtoltijkajya! Se takat akin kipia panoua 60 xiujmej kiluij se tokniuj takat: “Miakpaya nikixtajtoltij uan semi nechyolchikauani. ¿Uelis okachi tinechonmachtis ika Biblia?”.

Tokniuan no kitenextiliaj amaix keman tanojnotsaj sentaixpan. Se tokniuj siuat kimakak icorreo electrónico se ichpoch akin kiselij amaix. Se hora satepan, ichpoch kitajkuilouilij tokniuj siuat uan kiluij ke kiixtajtoltij seki taxelolmej tein kipia nejon amaix uan kinekia kimatis okachi. Se semana satepan peuak momachtia Biblia uan satepan peuak youi nechikolmej.

Itech nechikolmej tein moajsij Japón kiselijkej panoua 1,600,000 nejon amaix. Uan sejse metsti, tokniuan tel miak amaixmej kinkauilianij taltikpakneminij. Ipeujyan amaix, tokniuan akin kijkuilojkej kijtouaj: “Ijkuak tikonixtajtoltis nejin amaix tikchiaj maj mitsonolini okachi xikonnejneki tikonmatis tein kijtoua Biblia”.