NIYOLIK itech xiuit 1955 itech xolal Queensland (Australia). Notatuan motokaytiaj Estelle uan Ron. Tepitsin satepan keman niyolik, nomomaj peuak momachtia Biblia iniuan itaixpantijkauan Jiova. Yejua moauij se xiuit satepan, uan nopopaj moauij 13 xiujmej satepan. Nejua nimoauij itech xiuit 1968 itech se xolalkonet tein poui Queensland.

Nochipa nikuelitani nitaixtajtoltis uan nikixmatis okseki tataman tajtolmej. Keman katka nikonetok uan notatuan uejka nechuikayaj itech tepos, nejua nochipa nikixtajtoltijtiyaya se amaix. Niknemilia ke notatuan amo kiajsikamatiaj keyej amo nitatachixtiyaya kampa tipanouayaj. Sayoj ke kemej nikuelitaya nitaixtajtoltis, nechpaleuij keman niyajtoya kaltamachtiloyan. Hasta niktanik miak netetayokolilmej keman nimomachtiaya secundaria itech xolal Glenorchy (Tasmania).

Ijkuak nimomachtijtoyaok, monekik nikixpejpenas ox nikseliskia nepaleuil ika tomin uan ijkon ueliskia niyas ueyi kaltamachtiloyan. Maski semi nikuelitaya nitaixtajtoltis uan nimomachtis, nomomaj nechnextilijka maj okachi niktasojta Jiova ke nochi okseki taman (1 Cor. 3:18, 19). Tein nomomaj nechnextilij nechpaleuij maj nikixtaliani ke nimantsin keman nechmakaskiaj noamauan kampa nimomachtiaya, amo niksentokaskiaok nimomachtiskia uan  nimochiuaskia precursor. Uan notatuan kuali kiitakej nejon. Yejua ika itech metsti enero xiuit 1971, keman nikpiaya 15 xiujmej, nimochiuak precursor.

Itech chikueyi xiujmej satepan nitekitik kemej precursor ompa Tasmania. Ompa nimonamiktij iuan se kuakualtsin ichpoch akin monotsaya Jenny Alcock. Tiomen titekitikej naui xiujmej kemej precursor especial itech xolalkonemej Smithton uan Queenstown.

Itech xiuit 1978, Jenny uan nejua tiyajkej se ueyi nechikol kampa mosentilijkej akin kayomej itech tataman uejueyi altepemej itech xolal Port Moresby (Papúa Nueva Guinea). Okachi nikelnamiki se tanojnots tein kitemakak se tokniuj misionero itech tajtol hiri motu. Amo nikajsikamatik nion se tajtol, sayoj ke peuak niknemilia ke nikuelitaskia nimochiuas misionero. Ijkon ueliskia nimomachtis okseki tajtolmej uan nitemakas tanojnotsmej tein ika nikinyolchikauas tokniuan itech okseki uejueyi altepemej. Nikitak ke kemej nikteluelitaya nimomachtis okseki tajtolmej, ueliskia okachi niktekitilis Jiova.

Keman timokepkej Tasmania, techyoleujkej maj titekitikan kemej misioneros ompa Funafuti (Tuvalu). Nejin se taman tein amo tikchiayaj. Tiajsikej ompa itech metsti enero xiuit 1979. Sayoj moajsiaj eyi itaixpantijkauan Jiova itech nochi Tuvalu.

Techouijmakaya timomachtiskej tajtol tuvaluano, porin nion seko motamachtiaya nejon tajtol nion onkayaj diccionarios. Sayoj onkaya Nuevo Testamento itech nejon tajtol. Yejua ika tikixtalijkej timomachtiskej toselti uan timochikauayaj tiueliskej kemej 10 hasta 20 tajtolmej mojmostaj. Sayoj ke tikitakej ke amo tikyekajsikamatiaj miak tajtolmej. Kemej neskayot, keman tikijtosnekiaj ke amo kuali yetok maj se tajto iniuan amokuali ejekamej, tikijtouayaj ke amo kuali maj se kitekitilti balanzas uan topilmej. Sayoj ke timochikaujkej tiksentokaskej tiueliskej, porin tikinmachtiayaj ika Biblia miakej taltikpakneminij. Xiujmej satepan, semej nejon taltikpakneminij techiluij ke yekinika tel amo kiajsikamatiaj toni tikijtouayaj.

Kemej amo onkaya kani se kaltaneuis ompa Tuvalu, monekik tinemiskej iniuan seki tokniuan kalyetouanij. Nejon techchikaujkauij maj nochipa titajtouanij tuvaluano uan techpaleuij maj okachi ijsiujka tiuelinij. Uan kemej seki xiujmej amo semi titajtojkej inglés, tajtol tuvaluano mochiuak toyekinika tajtol.

Ompa Tuvalu, miakej kinekiaj momachtiskej Biblia, sayoj ke amo onkayaj amaixmej itech inintajtol. ¿Keniuj nejon taltikpakneminij ueliskiaj kiixmatiskej Jiova, kiueyichiuaskej ika nekuikatilmej, tanankiliskej itech nechikolmej oso hasta moauiskej? Nejon taltikpakneminij akin kipiayaj kuali ininyolo monekia kipiaskej  amaixmej itech inintajtol tein kinpaleuiskia maj kiixmatikan Jiova (1 Cor. 14:9). Kuejmol katka ke nion ajsiaj 15,000 taltikpakneminij akin tajtouayaj tuvaluano. ¿Ajsiskia tonal keman mochijchiuaskiaj amaixmej itech nejon tajtol? Tanankilil tein kitemakak Jiova kinextij ome taman. Yekinika, ke yejuatsin kineki maj akin nemij itech “uejka talmej tein moajsij tatajko ueyiat” no kiixmatikan (Jer. 31:10). Uan ojpatika, ke kineki kinpaleuis akin taltikpakneminij kinitaj kemej amo ueyichiuanimej (Sof. 3:12).

Itech xiuit 1980, itech sucursal technauatijkej maj tiktajtolkepanij amaixmej itech tajtol tuvaluano. Tikmachiliayaj ke amo tiueliskiaj tikchiuaskej nejon tekit, sayoj ke maski ijkon peuak tikchiuaj (1 Cor. 1:28, 29). Kemej itech nejon xiujmej amo onkaya tit oso tekol, tikinkouilijkej tekiuanij se tepos tein uejkaujya kipiayaj tein tiktekitiltiayaj ika tomay uan ika tikixtiayaj amaixmej. Yekinika ika tikixtijkej amaixmej tein tikuiskiaj itech nechikolmej. Satepan ika tikixtijkej amatajkuilol La verdad que lleva a vida eterna itech tajtol tuvaluano. Nikelnamikiok ke techouijmakaya tikchiuaskej nejon tekit porin motelijnekuia tapal uan tel tonaya.

Ouij katka tiktajtolkepaskej amaixmej itech tajtol tuvaluano, porin amo tikpiayaj diccionarios nion amatajkuilolmej tein techpaleuiskiaj. Sayoj ke kemansa nepaleuil tikseliayaj kemej amo tikchiayaj. Kemej neskayot, se tonal nimopoloj uan nitanotsak ichan se takat akin amo kinekia kinkakis itaixpantijkauan Jiova. Nejin takat katka tamachtijkej, sayoj ke amo tekitiaok. Nechelnamiktij ke amo kinekia maj tikalpanouanij. Sayoj ke nechiluij teisa tein nikmoujkaitak. Kijtoj ke toamaixuan itech tajtol tuvaluano amo ijkuiliujtoyaj kemej ipa motajtoua uan nechmelauilij itech toni timopolojtoyaj. Nikintajtanij okseki taltikpakneminij ox melauak tein kijtouaya nejin takat, uan nechiluijkej ke kuali yetoya tein kijtojka. Yejua ika tikpatakej seki taman kemej tiktajtolkepayaj amaixmej. Nikmoujkaitak maj Jiova techpaleuiani itechkopa aksa akin amo kinekia techkakis sayoj ke kemaj kiixtajtoltiaya toamaixuan.

Yekinika amaix itech tajtol tuvaluano tein titemakakej kajkalpan yejua tein ika tikinyoleujkej  taltikpakneminij maj touan mosentilianij keman tikelnamikiskiaj imikilis Cristo. Ojpatika amaix yejua Tanauatilmej ika iTekiuajyo Dios tapoual 30, tein no kisak keman kisak itech tajtol inglés. Semi tiyolpakiaj titemakaskej amaixmej itech inintajtol taltikpakneminij. Satepan no kiskej okseki amaixmej uan hasta seki libros itech tajtol tuvaluano. Itech xiuit 1983, sucursal tein moajsi Australia peuak kikixtia amaix Tanejmachtijkej itech tajtol tuvaluano. Sejse tapoual kipiaya 24 páginas uan kisaya ejeyi metstika. Taltikpakneminij kiuelitayaj taixtajtoltiskej, yejua ika nochipa kinpaktiaya toamaixuan. Nochipa keman kisaya se yankuik amaix itech tajtol tuvaluano, radio tein kikuij tekiuanij akin ompa taixyekanaj kiteixmatiltiayaj nejon, uan kemansa nochi tonal ika tajtouayaj. *

Sayoj ke ¿keniuj tiktajtolkepayaj amaixmej? Yekinika tikmaijkuilouayaj tein tikepayaj. Satepan tikijkuilouayaj ika máquina uan tikixtajtoltiayaj. Komo kipiaya nepololmej, oksepa tikijkuilouayaj ika máquina. Uan ijkon tikchiuayaj hasta maj kuali mokauani uan ueliskiaya tiktitaniskej amamej hasta sucursal tein moajsi Australia. Ompa, ome tokniuan siuamej kipanoltiayaj itech computadora. Sayoj ke yejuan amo tajtouayaj tuvaluano. ¿Toni kinpaleuiaya maj amo mopolouanij keman kipanoltiayaj? Sejse tokniuj kijkuilouaya iselti uan satepan kiitayaj ox tataman katka. Satepan, okseki tokniuan kitaliayaj taixkopimej tein kiuikaya tajkuilol. Ompa, itech avión techtitaniliayaj nejon amamej maj tikitanij ox amo kipiayajok nepololmej. Uan satepan oksepa tiktitaniaj sucursal kampa kichijchiuaskiaj amaixmej.

¡Semi mopatakya miak taman! Axkan, akin kikepaj amaixmej itech okseki tajtolmej amo monekiok ijsiujka kiuikaskej kampa kititaniskej tein kitajtolkepkej. Axkan, yejuan kitajtolkepaj uan kiyektaliaj tajkuilol itech se computadora. Miakpa, se tokniuj akin iniuan tekiti kitalia taixkopimej tein kiuika tajkuilol. Uan keman amaix kuali mokauakya, kititanij ika Internet itech sucursales kampa kikixtiskej amaix.

Itech xiujmej tein panotiyajkej, Jenny uan nejua techtitankej maj titapaleuitij itech miak talmej tein moajsij tatajko ueyiat Pacífico. Itech xiuit 1985 techtitankej sucursal tein moajsi Samoa. Ompa tiksentokayaj tiktajtolkepayaj amaixmej itech tajtol tuvaluano, sayoj ke no tikinpaleuiayaj tokniuan akin kitajtolkepaj amaixmej itech tajtolmej samoano, tongano uan toquelao. * Uan itech xiuit 1996 techtitankej sucursal tein moajsi Fiyi maj tikinpaleuianij akin kitajtolkepaj amaixmej itech tajtolmej fiyiano, kiribatiano, nauruano, rotumano uan tuvaluano.

Nochipa nikmoujkaitani maj tokniuan akin kitajtolkepaj amaixmej kitasojtakan tekit tein kichiuaj, maski semi ouij uan tesioujtij. Ijkon kemej Jiova, yejuan kinekij maj nochin taltikpakneminij kikakikan kuali tanauatilmej ika Tekiuajyot itech inintajtol (Apoc. 14:6). Kemej neskayot, keman tikitstoyaj keniuj peuaskia motajtolkepas amaix Tanejmachtijkej itech tajtol tongano, nimonechikoj iniuan nochin tokniuan tayekananij akin pouiaj Tonga uan nikintajtanij akoni ueliskia momachtis keniuj kitajtolkepas amaixmej. Semej nejon tokniuan katka mecánico, uan kampa tekitia tel kuali kitaxtauiayaj. Sayoj ke motemakak kikauas itekiuj mostika uan niman  peuas kitajtolkepas amaixmej. Yejua amo kimatia keniuj kitaniskia tomin tein ika kinixpanoltiskia ichankauan, sayoj ke senkis takuaujtamatia iuan Jiova. Yejua miak xiujmej tapaleuij maj motajtolkepakan amaixmej uan Jiova nochipa kinyekpiak yejua uan ichankauan.

Tokniuan Oloch Taojtokaltianij no kinejnekij maj onka amaixmej itech nochi tajtolmej, hasta itech tajtolmej tein amo miakej tajtouaj. Se tonal kintajtanijkej tokniuan Oloch Taojtokaltianij ox amo nenkaj katka maj mosentokani motajtolkepa amaixmej itech tajtol tuvaluano. Tein tanankilijkej semi nechyolchikauak. Kijtojkej ke amo onkaya keyej amo se kitajtolkepasok amaixmej itech nejon tajtol. Kimelaujkej ke maski amo miakej tajtouaj tuvaluano, yejuan no moneki kikakiskej kuali tanauatilmej ika Tekiuajyot itech inintajtol.

Jenny uan nejua titekitikej Kampa Motajtolkepaj Amaixmej ompa Fiyi hasta xiuit 2003. Itech nejon xiuit techixtalijkej maj titekitikan iniuan Akin Kinpaleuiaj akin Kitajtolkepaj Amaixmej, akin tekitiaj itech xolal Patterson, itech Betel tein moajsi Estados Unidos. Nejin ipa tiknekiaj tikchiuaskej. ¿Keyej? Porin itech nejin tekit kiitaj maj amaixmej motajtolkepakan itech okachi tajtolmej. Itech panoua ome xiujmej tein titapaleuijkej itech nejin tekit, tiyajkej miak uejueyi altepemej tikinpaleuitoj tokniuan akin kitajtolkepaj amaixmej itech okseki tajtolmej.

Axkan maj timokepakan itech xiuit 2000, itech nechikol tein motelneki tein ika nitajtoj yekinika. Itech nejon xiuit, Oloch Taojtokaltianij kiitakaj ke nochin tokniuan tajtolkepanij itech nochi taltikpak monekia kinmachtiskej keniuj kitajtolkepaskej amaixmej. Miakej amo keman kinmachtijkaj keniuj kichiuaskej nejon tekit. Yejua ika, satepan ke mochiuak nejon nechikol iniuan tokniuan Akin Kiixyekanaj tein Moijkuiloua itech Amaixmej, Oloch Taojtokaltianij kiixtalijkej ke nochin akin kitajtolkepaj amaixmej moneki kiseliskej nemachtil. Nejin kinpaleuia maj okachi kuali kiajsikamatikan tajkuilol itech tajtol inglés, maj kimelauakan teisa tein teouijmaka se kikepas uan maj sentekitikan.

Ika nejin tamachtilis tein motemaka, okachi kuali motajtolkepaj toamaixuan uan moajsij itech okachi miak tajtolmej ke achto. Keman peuak titekitij kemej misioneros itech xiuit 1979, amaix Tanejmachtijkej sayoj mokixtiaya itech 82 tataman tajtolmej. Uan itech miak nejin tajtolmej, nejin amaix mokixtiaya okachi satepan ke itech tajtol inglés. Sayoj ke axkan, amaix Tanejmachtijkej motajtolkepa itech panoua 240 tataman tajtolmej. Uan itech miak nejin tajtolmej, amaix no mokixtia keman mokixtia itech tajtol inglés. Axkan, toamaixuan moajsij itech panoua 700 tataman tajtolmej. Seki xiujmej achto, nejin moitaskia ke amo keman ueliskia mochiuas.

Itech xiuit 2004, tokniuan Oloch Taojtokaltianij kiixtalijkej okse taman tein motelneki. Kiixtalijkej ke Traducción del Nuevo Mundo moneki motajtolkepas itech okachi miak tajtolmej kemej okachi ijsiujka ueliskia mochiuas. Nejon tein kiixtalijkej tel tapaleuij, porin axkan okachi miakej uelij kiixtajtoltiaj Biblia itech inintajtol. Itech xiuit 2014, nejin Biblia ajsitok oso sayoj tajko moajsia itech 128 tataman tajtolmej, seki tein motajtoua itech xolalmej tein pouij Pacífico sur.

Nikelnamiki ika miak netasojtalis se ueyi nechikol tein mochiuak Tuvalu itech xiuit 2011. Itech miak  metsti amo kioujtoya itech nochi altepet, uan tokniuan kinemiliayaj ke monekia maj amo mochiuaok ueyi nechikol. Sayoj ke tiotak keman tiajsikej ompa peuak tel kioui chikauak, yejua ika uelik mochiuak ueyi nechikol. Nikpiak tatiochiualis nikinmatiltis tokniuan ke Traducción del Nuevo Mundo de las Escrituras Griegas Cristianas moajsiaya itech tajtol tuvaluano. Maski amo miakej tokniuan tajtouaj nejin tajtol, no kiselijkej nejin kualtsin inetetayokolil Jiova. Keman tatamik, oksepa peuak kioui. Yejua ika uelis moijtos ke nejon tonal tokniuan kiselijkej ome netetayokolilmej tein ualeuayaj iluikak.

Nechtayokoltia nikijtos ke nonamik amo yetoya itech nejon ueyi nechikol. Momikilij itech xiuit 2009, satepan ke tajyouij 10 xiujmej porin kipiaya cáncer. Tiuejkaujkej 35 xiujmej kemej namikuanij. Keman yejua moajokuis, semi yolpakis keman kimatis ke motajtolkepak Biblia itech tajtol tuvaluano.

Satepan oksepa nimonamiktij iuan okse kuakualtsin siuat. Motokaytia Loraini Sikivou uan yejua okse inetetayokolil Jiova. Yejua no tapaleuiaya maj motajtolkepa amaixmej, uan tekitik iuan Jenny itech Betel tein moajsi Fiyi. Yejua ika oksepa ninamikej iuan se siuat akin kitekitilia Jiova ika nochi iyolo uan no kiteluelita momachtis tataman tajtolmej kemej nejua.

Itech nochi nejin xiujmej nikitani keniuj Jiova kinyekpia nochin taltikpakneminij, hasta akin tajtouaj tajtolmej tein amo semi moixmatij (Sal. 49:1-3). No nikitani ke yejuan semi yolpakij keman yekinika kiseliaj amaixmej uan mokuikatiaj iixpan Jiova itech inintajtol. Keman panoua nejon niknemilia ke Jiova semi techtasojta (Hech. 2:8, 11). Kuali nikelnamiki se tokniuj akin xiuejya akin kayot Tuvalu uan motokaytia Saulo Teasi. Satepan ke yekinika mokuikatij semej tonekuikatiluan itech itajtol, nechiluij maj nikiniluiani tokniuan Oloch Taojtokaltianij ke tonekuikatiluan okachi kuali mokakij itech tajtol tuvaluano ke itech tajtol inglés.

Itech metsti septiembre xiuit 2005 nikselij se taman tein amo nikchiaya. Nechmakakej tatiochiualis nipouis iniuan tokniuan Oloch Taojtokaltianij akin kinixyekanaj iTaixpantijkauan Jiova. Maski amo ueli nitapaleuiaok maj motajtolkepakan amaixmej, ueli nikinpaleuiaok tokniuan akin kitajtolkepaj amaixmej noyampa taltikpak. Uan niktasojkamatilia Jiova maj nechmaka nejon tatiochiualis. Nechyolpaktia nikitas keniuj yejuatsin kinyekpia nochin itekitikauan, hasta akin nemij itech uejka talmej tein moajsij tatajko ueyiat Pacífico. Kemej kijtoua Salmo 97:1: “¡Jiova mochiuakya Tekiuaj! Maj yolpaki taltikpak. Maj yolpakikan miakej talmej tein moajsij tatajko ueyiat”.