1. ¿Keyej motelneki maj titakuaujtamatikan? (Xikonita taixkopin ipeujyan tamachtilis.)

¿KEMANSA tionmotajtaniani ox Jiova mitsonmakixtis keman ejkos okachi ueyi tajyouilis? Hebreos 11:6 kijtoua ke “komo se aksa amo takuautamatinemis iuan Dios, ijkuakon amo uelis kiyolpaktijtinemis”, porin takuaujtamatilis kipaleuis maj makisa. Xa aksa kinemilis ke akin yeski uelis kipias takuaujtamatilis. Sayoj ke 2 Tesalonicenses 3:2 kijtoua ke amo nochin taltikpakneminij kipiaj takuaujtamatilis. Nejin ome tajkuilolmej kuali kinextiaj ke motelneki maj timochikauakan tikpiaskej se chikauak takuaujtamatilis.

2, 3. 1) ¿Keyej motelneki tikpiaskej chikauak totakuaujtamatilis? 2) ¿Toni netajtanilmej tiknankiliskej itech nejin tamachtilis?

² Tatitanil Pedro kijtoj ke motelneki “momajxitijtiyas totakuautamatilis” (xikonixtajtolti 1 Pedro 1:7). Kemej okachi ueyi tajyouilis tel amo uejkauaok mochiuas, tiknekij tikpiaskej totakuaujtamatilis tein uelis techpaleuis maj timakisakan (Heb. 10:39). Yejua ika moneki timochikauaskej maj totakuaujtamatilis okachi mochikaujtiuj. Ijkon, Jesús techmakixtis keman kiixpolokiuj nochi tein amo kuali tein onkak nikan taltikpak. Uelis tiktajtaniskej Jiova tein se takat kitajtanij Jesús:  “Xinechonpaleui kuak amo mouan niyektakuautamatis” (Mar. 9:24). Oso no uelis tiktajtaniskej Dios tein itatitaniluan Jesús kitajtanijkej: “Xitechonmajxitili totakuautamatilis kachi ok” (Luc. 17:5).

³ Itech nejin tamachtilis tiknankiliskej eyi netajtanilmej: ¿Keniuj uelis tikchikauaskej totakuaujtamatilis? ¿Keniuj tiknextiaj ke totakuaujtamatilis chikauak? Uan ¿keyej tikyekmatij ke Jiova techmakas takuaujtamatilis komo tiktajtaniaj?

4. ¿Toni neskayomej uelis techpaleuiskej maj okachi mochikaua totakuaujtamatilis?

⁴ Jiova kineki maj tikpiakan chikauak totakuaujtamatilis. Yejua ika kichiuak maj moijkuilouani itech Biblia ininneskayo taltikpakneminij akin kipiakej ueyi takuaujtamatilis (Rom. 15:4). Seki nejon taltikpakneminij yejuan Abrahán, Sara, Isaac, Jacob, Moisés, Rahab, Gedeón uan Barac (Heb. 11:32-35). Sayoj ke no uelis techpaleuis ueyi takuaujtamatilis tein kinextianij miakej tokniuan itech totonaluan. *

5. 1) ¿Keniuj kinextij Elías ke kipiaya chikauak itakuaujtamatilis? 2) ¿Toni uelis timotajtaniskej?

⁵ Ineskayo Elías yejua semej tein moajsij itech Biblia. Maj tikitakan makuil taman keman kinextij ke kipiaya chikauak takuaujtamatilis. Yekinika, se tonal Elías kiluij tekiuaj Acab ke Jiova kichiuaskia maj amo kioui. Uan kiluij ke kiyekmatia ke ijkon panoskia porin Jiova kijtojka (1 Rey. 17:1). Ojpatika, Elías takuaujtamatia ke Dios kiyekpiaskia yejua uan okseki taltikpakneminij keman amo kiouiskia (1 Rey. 17:4, 5, 13, 14). Expatika, Elías takuaujtamatia ke Jiova ueliskia kiajokuis ikonetsin se siuat akin amo nemiaok inamik (1 Rey. 17:21). Naujpatika, Elías kiyekmatia ke Jiova kiualtitaniskia tit tein kichichinoskia inetetayokolil itech tepet Carmelo (1 Rey. 18:24, 37). Uan makuiltika, hasta keman ayamo moitaya ke kiouiskia, Elías kiyekmatia ke oksepa kiouiskia porin kiluij Acab: “Xitakua uan xitatayi; porin mokaki ke ijkoyokatok se ueyi kiouit” (1 Rey. 18:41). Satepan ke tikitakej nejin neskayomej, uelis timotajtaniskej: “¿Nikpia chikauak notakuaujtamatilis kemej Elías?”.

6. ¿Toni moneki tiktajtaniskej Dios komo tiknekij tikchikauaskej totakuaujtamatilis?

⁶ Komo tiknekij tikchikauaskej totakuaujtamatilis, moneki tiktajtaniskej Dios maj techmaka iyektikatsin espíritu. ¿Keyej? Porin takuaujtamatilis poui itech itakilo espíritu (Gál. 5:22). Jesús techyolmajxitij maj tiktajtanikan Jiova maj kisentoka techmaka yektikatsin espíritu uan kiyekijtoj ke Dios kinmaka akin kitajtaniaj (Luc. 11:13).

7. Xikonmelaua ika se neskayot toni moneki tikchiuaskej tein techpaleuis maj nochipa chikauak moajsi totakuaujtamatilis.

 ⁷ ¿Uan komo chikauakya totakuaujtamatilis? Komo ijkon, moneki tikyekitaskej maj kisentoka chikauak. ¿Keyej? Porin totakuaujtamatilis tamati kemej tit tein xotatok. Yekinika, xa chikauak xotatos. Sayoj ke komo amo se kitatokilia, seuis. No ijkon panoua ika totakuaujtamatilis. Komo amo tiknekij tikpoloskej, moneki tikixtajtoltiskej uan timomachtiskej Biblia mojmostaj. Ijkon, okachi tiktasojtaskej Jiova uan Biblia, uan totakuaujtamatilis nochipa chikauak yeski.

8. ¿Toni techpaleuis maj mochikaua totakuaujtamatilis?

⁸ Kemej tikitaj, moneki maj amo sayoj timokauakan ika tein tikajsikamatkej achto ke timoauiskiaj (Heb. 6:1, 2). Kemej neskayot, uelis timomachtiskej keniuj mochiuani seki taman tein Biblia achto kijtojka ke panoskia, porin nejon kichikaua totakuaujtamatilis. Uan no, keman timomachtijtoskej Biblia, moneki tiktemoskej tikitaskej ox tiknextijtokej itech tonemilis ke yekmelauj chikauak totakuaujtamatilis (xikonixtajtolti Santiago 1:25 uan 2:24, 26).

9, 10. ¿Keniuj techpaleuiaj maj mochikaua totakuaujtamatilis... 1) ...tokniuan? 2) ...nechikolmej? 3) ...tanojnotsalis?

⁹ Tatitanil Pablo kijtoj ke akin tikchiuaj kemej Cristo uelis “timoyolmajxitiske ika ne totakuautamatilis” (Rom. 1:12). ¿Toni kijtosnekia? Ke totakuaujtamatilis okachi mochikaua keman tiyetokej iniuan tokniuan itech nechikol, okachiok iniuan tokniuan akin amo kikauanij Dios keman kipanouanij ouijkayomej (Sant. 1:3). Amo kuali tasojiknimej kijtakouaj totakuaujtamatilis, sayoj ke kuali tasojiknimej techpaleuiaj maj okachi titakuaujtamatikan (1 Cor. 15:33). Yejua ika Biblia techiluia maj amo timopolouilikan nechikolmej, porin ompa timoyolchikauaj tinochin (xikonixtajtolti Hebreos 10:24, 25). Uan no, tein timomachtiaj itech nechikolmej techpaleuia maj okachi mochikaua totakuaujtamatilis. Romanos 10:17 kijtoua ke keman okachi timomachtiaj tein Biblia kijtoua, okachi titakuaujtamatij. Yejua ika moneki timotajtaniskej: “¿Amo nimopolouilia nion se nechikol?”.

¹⁰ Keman tikinmachtiaj okseki taltikpakneminij tein Biblia kijtoua no techpaleuia maj mochikaua totakuaujtamatilis. ¿Keyej? Porin keman titanojnotsaj techpaleuia maj senkis titakuaujtamatikan iuan Jiova uan maj tiyolchikaujkej, ijkon kemej yekinika itatojtokakauan Cristo (Hech. 4:17-20; 13:46).

11. 1) ¿Keyej Josué uan Caleb kipiayaj chikauak inintakuaujtamatilis? 2) ¿Keniuj uelis tikchiuaskej kemej Josué uan Caleb?

¹¹ Keman tikitaj keniuj Jiova kinankilia tonetataujtiluan uan techpaleuia, okachi mochikaua totakuaujtamatilis. Yejua nejon kinpanok Josué uan Caleb. Keman tapijpiatoj itech talmej tein Jiova motenkaujka kinmakas, yejuan kinextijkej ke semi takuaujtamatiaj. Ijkon kemej panotiyajkej xiujmej, inintakuaujtamatilis okachi mochikaujtiyajki  porin kiitayaj ke Dios nochipa kinpaleuiaya. Yejua ika Josué kinyekiluij israelitas ke Jiova nochipa kichiujka nochi tein motenkaujka. Yejua ika kinyolmajxitij: “Xikmoujkatokakan Jiova uan xiktekitilikan”. Uan no kijtoj: “Nejua uan nochankauan, tejuan tiktekitiliskej Jiova” (Jos. 23:14; 24:14, 15). Komo tejuan no titakuaujtamatij iuan Jiova, tikitaskej keniuj techpaleuia, uan totakuaujtamatilis okachi mochikauas (Sal. 34:8).

12. ¿Keniuj tiknextiaj ke totakuaujtamatilis chikauak?

¹² Santiago kijtoj: “Nimitsnextilis notakuautamatilis ika por in kuali chiualis ten nikchiutinemi” (Sant. 2:18). Ika nejin tajtolmej, Santiago kijtosnekik ke tiknextiaj ke chikauak totakuaujtamatilis ika tein tikchiuaj. Maj tikitakan seki taman kemej uelis tiknextiskej totakuaujtamatilis.

13. ¿Keyej tiknextiaj ke titakuaujtamatij keman titanojnotsaj?

¹³ Keman titanojnotsaj, tiknextiaj ke titakuaujtamatij. ¿Keyej? Porin keman titanojnotsaj tiknextiaj ke tikneltokaj ke amo uejkaua ejkos tamilis uan ke “amo ejkos tiotak” (Hab. 2:3). Komo tiknekij tikmatiskej ox totakuaujtamatilis chikauak, moneki timotajtaniskej: “¿Yekmelauj nikita ke motelneki nitanojnotsas? ¿Nikchiujtok nochi tein niueli uan ijkon nikintapouis nochin taltikpakneminij keniuj tamati Dios? ¿Niktemoua keniuj okachi nitanojnotsas?” (2 Cor. 13:5). Komo timochikauaj titanojnotsaskej, tiknextiskej ke totakuaujtamatilis chikauak (xikonixtajtolti 2 Corintios 4:13).

14, 15. 1) ¿Keniuj uelis tiknextiskej mojmostaj ke titakuaujtamatij? 2) Xikonijto keniuj kinextijkej seki kalyetouanij akin kayomej Asia ke kipiayaj chikauak inintakuaujtamatilis.

¹⁴ No uelis tiknextiskej ke titakuaujtamatij komo tikxikouaj ouijkayomej tein  tikpanouaj mojmostaj. Komo tikijyouiaj kokolismej, tiyolkuetauij, titeltayokoyaj, tikpanouaj tatasojtilis oso okseki taman ouijkayomej kemej nejon, maj titakuaujtamatikan ke Jiova uan Jesús techpaleuiskej ijkuak monekis (Heb. 4:16). Komo tiktajtaniaj Jiova maj techpaleui, tiknextiskej ke iuan titakuaujtamatij. Jesús kijtoj ke uelis tiktajtaniskej Dios maj techmaka “totaxkaltsin ten monekis” sejse tonal (Luc. 11:3). Itech Biblia moajsij miak neskayomej kampa moita ke Jiova ueli techmaka tein yeski taman tein techpolos. Kemej neskayot, keman miak tonalmej amo kioujtoya ompa Israel, Jiova kimakak Elías at uan takual. Biblia kijtoua ke seki totomej “kiualkuiliayaj pan uan nakat kualkampa, uan pan uan nakat tiotakpa”, uan ke tayia at itech se ueyiat (1 Rey. 17:3-6). Tejuan uelis titakuaujtamatiskej ke Jiova no techmakas tein techpolos.

¹⁵ Tikyekmatij ke komo tiktakamatij tein Biblia tayolmajxitia, uelis tikinmakaskej tochankauan tein kinpoloua. Xikonita tein kinpanok seki kalyetouanij ompa Asia. Se tonal, tepopaj kiitak ke tekit tein kichiujtoya kijtakojtoya ikuali uikalis iuan Jiova. Yejua uan inamik kinekiaj kitakamatiskej tein kijtoua Mateo 6:33 uan Proverbios 10:4. Yejua ika kiixtalijkej ke tokniuj takat kikauaskia nejon tekit uan kinamakaskiaj takual uan ijkon moixpanoltiskiaj. Siuat kijtoua ke tel chikauak tekitiaj, sayoj ke kemej Jiova kinyekpiak, amo keman kipanokej mayan. ¿Mitsonpanouani tejuatsin se taman kemej nejon tein kichikauani motakuaujtamatilis?

16. ¿Toni panos komo titakuaujtamatij iuan Jiova?

 ¹⁶ Maj amo keman tiomeyolouakan ke komo titakuaujtamatij iuan Jiova uan tikchiuaj tein techtajtania, yejuatsin techpaleuis. Yejua nejin kijtosnekia Pablo keman kielnamikik se taman tein kijtoj tanauatijkej Habacuc: “Tagat ten Dios kipouas yolchipauak, yejua ne yoltinemis sen nachipa porin takuautamati” (Gál. 3:11; Hab. 2:4). Uan no, Pablo kijtoj ke Dios kipia chikaualis tein ika techpaleuis kemej nion ueli tiknemiliaj (Efes. 3:20). Tejuan tikchiuaj nochi tein tiuelij uan ijkon tiktekitiliaj Dios, sayoj ke tikmatij ke amo nochi ueli tikchiuaj. Yejua ika timochikauaj uan titakuaujtamatij ke Jiova techtatiochiuis. Tein melauj, semi tiktasojkamatij maj yejuatsin techpaleui.

17. 1) ¿Keniuj Jesús kinnankilij itatitaniluan keman kitajtanijkej okachi takuaujtamatilis? 2) ¿Keniuj tikmatij ke Jiova techmakas okachi takuaujtamatilis komo tiktajtaniaj?

¹⁷ Satepan ke tikixtajtoltijkej nejin tamachtilis, xa timomachiliaj kemej itatitaniluan Jesús keman kiluijkej: “Xitechonmajxitili totakuautamatilis kachi ok” (Luc. 17:5). Jesús kinnankilij itech Pentecostés xiuit 33 ika se taman tein semi kipia ipatiuj. Ijkuak, kintitanilij yektikatsin espíritu uan kinpaleuij maj okachi kuali kiajsikamatinij katiyejua itanejnekilis Dios. Nejin kinpaleuij maj okachi mochikauani inintakuaujtamatilis. Yejua ika, yejuan peujkej kiteixmatiltiaj kuali tanauatilmej kemej amo keman ijkon mochiujtoya (Col. 1:23). Jiova motenkaua ke techmakas tein yeski tein tiktajtaniskej komo mouika ika itanejnekilis (1 Juan 5:14). Yejua ika tikmatij ke komo tiktajtaniaj okachi takuaujtamatilis, yejuatsin techmakas.

18. ¿Keniuj kintatiochiuia Jiova akin chikauak inintakuaujtamatilis?

¹⁸ Komo senkis titakuaujtamatij iuan Jiova, yejuatsin techtatiochiuis uan techmakas okachi takuaujtamatilis keman tiktajtaniskej. Uan no, tikpiaskej okachi chikauak totakuaujtamatilis uan yejuatsin kiitas ke technamiki tikseliskej tatiochiualis tein kiualkuis iTekiuajyo (2 Tes. 1:3, 5).