¿Keyej kikaua maj onka tajyouilis?

MIAKEJ taltikpakneminij kichiuaj netataujtil, sayoj ke omeyolouaj ox nemi se Dios. ¿Keyej? Xa porin kiitaj miak tajyouilis itech taltikpak. ¿Kemansa tionmotajtaniani keyej Dios kikaua maj onka tajyouilis?

¿Xe Dios techchijchiuak maj titajtakouanij uan maj titajyouikan? Techouijmakaskia tikpoujkaitaskej se dios akin kineki maj titajyouikan. Xikonnemili nejin neskayot: komo tejuatsin tikonitstoskia se yankuik tepostamamajkej uan tikonitaskia ijtakaujtok ipankakaujyo, ¿tikonnemiliskia ke ijkon kinemilij kikauas akin kichijchiuak? ¿Melauj ke amo? Tein kemaj, tiknemiliskej ke tel kuali kichijchiuak uan aksa oso teisa kijtakoj.

No ijkon, itech nochi tein Dios kichijchiuak moita keniuj kualtsin tayekyetok, sayoj ke no tikitaj ke nochi tein amo kuali tein mochiujtok, kintajyouiltia taltikpakneminij. ¿Ijkon kinekia Dios maj mochiuani? Biblia kijtoua ke ijkuak Dios kinchijchiuak yekinika taltikpakneminij amo kipiayaj tajtakol, sayoj ke satepan yejuan ininselti moijtakojkej (Deuteronomio 32:4, 5). Maski ijkon, onkak kuali tanauatilmej: Dios motenkaujtok kiajchiuas tajyouilis uan oksepa kichiuas maj taltikpakneminij amo kipiakanok tajtakol. ¿Keyej amo niman kichiua?

¿Keyej tel uejkaua?

Porin moneki moitas akoni kinamiki maj kinixyekana taltikpakneminij. Jiova kinekia yejua kinixyekanas, amo maj ininselti moixyekanakan. Biblia no kiyekijtoua: “Amo iaxka akin nentok nion kiyekanas itaksalis” (Jeremías 10:23). Tetayokoltij tein kichiujkej Adán uan Eva keman kiixnamikkej itaixyekanalis Dios, uan ika nejon taixnamikilis mochiujkej tajtakouanij (1 Juan 3:4). Yejua ika, amo kipiakejok  nemilis chipauak uan moijtakojkej yejuan uan ininkoneuan.

Tel miak xiujmej Jiova kikauani maj taltikpakneminij moixyekanakan ininselti, uan nochi tein mochiuani kinextia ke yejuan amo uelij kichiuaj nejon. Nejin kinextia ke nochi tekiuajyomej kichiuanij maj onka tajyouilis. Amo akin uelini kichiuani maj amo onka neteuilismej, kokolismej, tachichikouilis uan maj amo kichiuakan tein amo kuali.

¿Keniuj kiyektalis Dios tein moijtakoj?

Biblia kijtoua ke Dios amo uejkaua kichiuas maj onka se yankuik taltikpaknemilis (2  Pedro 3:13). Sayoj nemiskej ompa akin kintasojtaskej oksekin uan kitasojtaskej Dios (Deuteronomio 30:15, 16, 19, 20).

Biblia no kijtoua ke “tech ne tonal de ueyi tatsakuiltilis” tein ijsiujka moachkauia, Dios kitamis tajyouilis uan kinixpolos akin tetajyouiltiaj (2  Pedro 3:7). Ijkuak, Jesucristo, akin Dios kiixtalij kemej Tekiuaj, kinixyekanas taltikpakneminij akin tatakamatiskej (Daniel 7:13, 14). ¿Toni kichiuas nejin tekiuajyot? Biblia kijtoua: “Akin nejmachmej ininaxkatis taltikpak, uan yekmelauj kiajsiskej yolpakilis ika tel miak yolseuilis” (Salmo 37:11).

Tekiuaj Jesucristo tein moajsi iluikak, kichiuas maj amo onkaok kokolis, ueuentsiyot nion mikilis, tein nesiko porin taltikpakneminij kiixnamikkej Jiova, akin ‘itech ualeujtok nemilis’ (Salmo 36:9). Jesús kinpajtis nochin akin mokauaskej maj yejua kinixyekana ika netasojtalis, uan kichiuas nejin tein Biblia kijtoua:

▪ “Nion se taltikpaknenkej kijtos: ‘Nimokokoua’.” (Isaías 33:24.)

▪ “Totajtsin kinelkaualtis de ninchokilisuan de nochi itaneltokakauan. Uan amo  aken momikilis ok; uan amo aken mochoktis ok; uan amo aken motekipachos ok; uan amo aken yoltajyouis ok. Uan ijkon yeski porin nochi tajtamik ya de ne achtopa onkaya.” (Apocalipsis 21:4.)

¿Melauj ke techyolseuia tikmatiskej ke amo uejkaua, Dios kichiuas tein motenkaujtok uan kitamis tajyouilis? Uan maski axkan kikaujtokok maj onka tajyouilis, uelis titakuaujtamatiskej ke yejuatsin kikaki tonetataujtiluan.

Dios touan yetok. Uan yejuatsin kikaki nochi tein tikoniluia ijkuak tionmoyolkokojtok oso tiontayokoxtok. Yejuatsin kitelneki maj ejko tonal keman amo tionomeyolouasok uan amo tiontajyouisok.