IPOPAJ Ian tel tauanaya. Maski yejua amo teyi kipolouaya, tel tajyouij porin ipopaj amo keman kinextilij netasojtalis. Yejua kijtoj: “Amo semi niktasojtaya. Amo nikuelitaya maj tel tauana nion maj kiteui nomomaj”. Satepan Ian kinemilij ke amo nemi Dios, porin motajtaniaya: “Komo nemi, ¿keyej kikaua maj titajyouikan?”.

Maski tejuan amo semi titajyouijtoskej, kemej tiknekij maj mochiua tein melauak, tikualanij keman tikinitaj ke tajyouiaj akin amo kichiujtokej tein amo kuali. Uan okachi tiknekiskej tikajsiskej tanankilil komo tejuan, ijkon kemej Ian, tikpanotokej ouijkayomej oso se akin tiktasojtaj kokolispeua uan momikilia.

Sekin kinemiliaj ke Dios kikaua maj onka tajyouilis porin kineki techmachtis maj tiknextikan yolyemanilis uan teiknelilis. Oksekin kinemiliaj ke tikixtaujtokej tajtakolmej tein tikchiujkej achto.

Ke Dios tel amo yolkuali uan amo kitekipachoua tajyouilis tein tikpanouaj, uan yejua ika, semi ouij maj se kitasojta.

Ke Jiova amo kichiua maj onka tajyouilis. Biblia kijtoua: “Keman aksa moajsis itech tayejyekolis, maj amo kijto: ‘Dios nechtalilia tayejyekolis’. Porin Dios amo uelis kipias se tayejyekolis ika tein amo kuali, nion kitalilia tayejyekolis aksa” (Santiago 1:13, TNM). Uan no, ijkon kemej Biblia kimelaua keniuj tamati Dios, kinextia ke amo yejuatsin itajtakol maj onka tajyouilis. ¿Keyej amo?

Porin se taman tein Dios okachi kinextia yejua netasojtalis (1 Juan 4:8). Biblia kinextia ke inetasojtalis Dios tamati kemej netasojtalis tein se temomaj kipialia ikonetsin. Dios tajtani: “¿Uelis se tesiuauj kielkauas ipilkonetsin akin kitamakaok, uan amo kiiknelis ikonetsin akin kiyolitij?”. Uan satepan kijtoua: “Hasta nejin siuamej uelis  kielkauaskej;  sayoj ke nejua amo nimitselkauas” (Isaías 49:15). ¿Melauj ke nion se temomaj akin yolkuali kitemoskia kikokos ikonetsin? Tein kemaj, kitemoskia keniuj kichiuas maj amo tajyoui. No ijkon, Dios amo keman kintajyouiltiskia akin amo kichiujtokej tein amo kuali (Génesis 18:25).

Sayoj ke xa tionmotajtania: “Komo ijkon, ¿keyej tel miakej tajyouiaj? Komo Dios kitekipachoua tein techpanoua uan kipia nochi chikaualis, ¿keyej ayamo kiixpoloua tein kiualkui tajyouilis?”.

Moajsi seki taman tein motelneki uan yejua ika Dios ayamo kiixpoloua. Maj tikitakan se: miakej taltikpakneminij kichiuaj maj oksekin tajyouikan. Kemej neskayot, moajsij tel miakej akin teikamauiltiaj uan tetajyouiltiaj uan semi taijtakouaj uan amo kinekij mopataskej. Yejua ika, Dios monekis kinixpolos nochin tein kichiuaj tein amo kuali uan ijkon kitamis tein kitelualkui tajyouilis.

Sayoj ke xa no tionmotajtania: “¿Uan keyej ayamo kichiua?”. Tatitanil Pedro kimelauak keyej: “Jiova amo tel uejkaua ika tein motenkaujtok kichiuas, kemej sekin kinemiliaj ke tel uejkaua, sayoj ke amo yolijsiui ta namechchia, porin amo kineki maj nion akin ixpoliui; ta maj nochin moyolnonotsakan” (2 Pedro 3:9, TNM). Tein melauj, kemej Dios mochiaok, kinextia ke semi tetasojta uan teiknelia.

Maski ijkon, amo uejkaua “kintaxtauis ika tajyouilis nekes ten namechtajyouiltijtinemij axkan”. Akin amo yolkualmej, tein kinchiuiliaj tein amo kuali oksekin, “tajyouiske ika ne ueyi tatsakuiltilis” keman senkis kinixpolos (2 Tesalonicenses 1:6-9).