ROSALIND, akin moskaltij Inglaterra, nochipa kinejnekia momachtis. No kinekia kinpaleuis taltikpakneminij. Keman kitamij itamachtilis, kiajsik se kuali tekit kampa kinpaleuiaya taltikpakneminij akin amo kipiayaj se kali kampa nemiskej, akin kinpoloua se taman itech ininnakayo oso akin amo ijsiujka uelij teisa. Sayoj ke maski kuali kitaxtauiayaj uan kiuelitaya nejon tekit, miak xiujmej motajtanij keyej tiyetokej nikan taltikpak.

Taltikpakneminij tanemiliaj, amo ijkon kemej tapialmej. Timomachtiaj ika tein techpanoua itech tonemilis, tikixtaliaj toni tikchiuaskej satepan uan tiknekij tikajsiskej tein techpaleuis maj tikpiakan yolpakilis.

Miakej kinemiliaj ke komo se kitelpia miak tomin oso komo se ueyichiujkej yejua tein kiualkui yolpakilis.

Ke amo motelneki se kichiuas itanejnekilis Dios. Moneki achto tikchiuaskej totanejnekilis.

Ke yolpakilis tein kiualkui keman se kisentilia miak tomin uan se moyolpaktia ika tein onkak nikan taltikpak amo uejkauas. Ijkon kinextia tein kipanok tekiuaj Salomón. Yejua kipiak nochi nejon uan okachiok, sayoj ke kiajsikamatik ke tein yekmelauj teualkuilia yolpakilis yejua nejin: “Xikmoujkatoka Dios tein melauak uan xiktakamati itanauatiluan. Porin yejua nejin tein yekinika moneki kichiuas taltikpaknenkej” (Eclesiastés 12:13). ¿Toni kiualkui se kitakamatis itanauatiluan?

 Se taman tein Dios kinejneki yejua maj tiyolpakikan itech tonemilis. Salomón kijkuiloj: “Uan taltikpaknenkej, amo onkak okse taman tein okachi kuali ta maj takua uan maj yekmelauj tatayi uan maj kiita tein kuali tein kiualkuilia nochi chikauak tekit tein kichiua. Nejin no nikitani, nejua, ke nejin ualeua imako Dios akin melauak” (Eclesiastés 2:24).

Dios no kineki maj tikintasojtakan tochankauan uan maj tikinyekpiakan. Yejua tein tikajsikamatij keman tikitaj tein kinyolmajxitia sejsemej:

• “Teyokichuan [oso tetakauan] ma kintasojtatinemikan ninsiuauan ika ne tetasojtalis tenika cada se teyokich mopialitinemi uan motasojtatinemi.” (Efesios 5:28.)

• “Tesiuau moneki ma momouiskauika iuan iyokich [oso itakauj].” (Efesios 5:33.)

• “Nankonetsitsin, moneki xikintakamatiyakan namotatuan.” (Efesios 6:1.)

Semi melauak ke komo tiktakamatij nejin tamachtilis tein kisa itech Biblia, techualkuilia yolpakilis itech tonemilis, sayoj ke amo senkis. Motelneki maj kuali tikixmatikan Akin techchijchiuak uan maj kuali timouikakan iuan. Biblia techyoleua: “Ximotokikan iuan Dios”. Satepan motenkaua: “Yejuatsin no motokis namouan” (Santiago 4:8). Komo tikseliaj nejin tayoleualis, tikajsiskej yekmelauj yolpakilis.