1-3. 1) ¿Keyej Josué techkauilij se kuali neskayot? 2) ¿Toni moneki tikelnamikiskej keman monekis titaixpejpenaskej?

 MOTELNEKI maj tikmatikan titaixpejpenaskej. Keman aksa moneki taixpejpenas, moajsi seki taman tein uelis kichiuas uan yejua kiitas toni kitojtokas itech inemilis. Maj tiktalikan se neskayot, se takat akin uejka ojtokatok kiajsi ome ojti. ¿Katiyejua kiixpejpenas tein kiuikas kampa kineki ajsis? Xa se ojti kiajxitis kampa kineki uan okse xa okachi kiuejkatilis.

² Biblia ininka technojnotsa miakej taltikpakneminij akin monekik taixpejpenaskej. Kemej neskayot, Caín monekik kiixpejpenas ox kikauaskia maj kiyekana ikualanyo oso kitsakuiliskia (Gén. 4:6, 7). Uan Josué monekik kiixpejpenas ox kitekitiliskia Dios akin melauak oso kinueyichiuaskia tiotsitsin (Jos. 24:15). Kemej Josué kinekia yetos iuan Jiova, kiixpejpenak ojti tein kipaleuiskia maj ijkon kichiuani. Sayoj ke Caín amo kinekia kichiuas nejon, yejua ika kiixpejpenak se ojti tein okachi kiuejkatilij iuan Dios.

³ Kemansa, tejuatsin xa no monekis tikonixpejpenas katiyejua ojti tikontojtokas. Keman monekis tikonchiuas nejon, xikonelnamiki tein tikonneki tikonchiuas: nochipa tikonueyitalis Jiova uan amo tikonchiuas nion se taman tein mitsonuejkatilis iuan (xikonixtajtolti Hebreos 3:12). Itech nejin tamachtilis uan itech okse ika titajtoskej chikome taman tein moneki amo tikauaskej maj techuejkatili iuan Jiova.

4. ¿Keyej tekit motelneki?

⁴ Tein kichiuaj kemej Cristo moneki motekipanoskej uan kinixpanoltiskej ininchankauan. Biblia kinextia ke akin amo kineki kichiuas, okachi amo kuali kichiuaskia  ke se akin amo taneltoka (2 Tes. 3:10; 1 Tim. 5:8). Moyekita ke tekit motelneki, sayoj ke komo amo timoyekpiaj, uelis techuejkatilis iuan Jiova. ¿Keniuj uelis panos nejon?

5. ¿Toni seki taman motelneki tikitaskej achto ke tikseliskej se tekit?

⁵ Xikonnemili ke tikontemojtok se tekit. Komo tionnemi itech se altepet kampa semi ouij se kiajsis, xa tikonnekis tikonselis yekinika tekit tein tikonajsis maski tein yeski. Sayoj ke, ¿toni tikonchiuaskia komo nejon tekit kitapanauilia se tayolmajxitilis tein kitemaka Biblia? ¿Uan komo horas tein monekis tiontekitis oso kampa monekis tionyas tiontekititiuj kichiuas maj amo semi ueliok xikontekitili Dios oso mitsonxelos iuan mochankauan? ¿Tikonseliskia porin xa tikonnemilia ke okachi kuali xikonpia nejon tekit ke amo tikonpias nion se? Amo xikonelkaua ke komo amo kuali tiontaixpejpena, uelis tionmouejkatilis iuan Jiova (Heb. 2:1). Komo tikontemojtok se tekit oso tikonnemilijtok tikonpatas, ¿toni mitsonpaleuis kuali xiontaixpejpena?

6, 7. 1) ¿Katiyejua tataman tanejnekilis uelis kipias aksa keman kiselia se tekit? 2) ¿Katiyejua tanejnekilis okachi mitsontokis iuan Jiova uan keyej?

⁶ Kemej tikitakejya, moneki tikelnamikiskej tein tiknekij tikchiuaskej itech tonemilis. Xionmotajtani: “¿Toni nikneki nikajsis ika nejon tekit?”. Komo tejuatsin tikonita tekit kemej se taman tein mitsonpaleuis xionmoixpanolti tejuatsin uan mochankauan, uan ijkon uelis nankitekitiliskej Jiova, yejuatsin mitsonpaleuis (Mat. 6:33). Jiova kimati keniuj techpaleuis keman tikpolouaj tekit oso mochiua se ouijkayot tein amo tikchiayaj uan moneki tomin (Is. 59:1). Biblia kiyekijtoua ke “Jiova ueli kinmakixtia itech tayejyekolis taltikpakneminij akin nemij kemej yejuatsin kineki” (2 Ped. 2:9, TNM).

⁷ ¿Uan komo tikonneki tikonpias nejon tekit sayoj porin tikonneki tikontanis miak tomin? Xa uelis tikonajsis tein tikonixtalijtok. Sayoj ke semi tamouilil maj se tekiti sayoj porin se kineki se motomintis (xikonixtajtolti 1 Timoteo 6:9, 10). Komo tikitaj ke okachi moneki tikpiaskej tekit uan tomin, sayoj timouejkatiliskej iuan Jiova.

8, 9. ¿Toni netajtanilmej moneki mochiuiliskej tetatmej ika tekit uan keyej?

⁸ Komo tejuatsin tiontepopaj, xikonnemili neskayot tein tikonkauilijtok mokoneuan. ¿Toni kiitaj ke okachi tikontayekanaltia, tekit oso mokuali uikalis iuan Jiova? Komo yejuan kiitaj ke okachi tikonneki tionmoueyichiuas oso tikonsentilis tomin, ¿tikonnemiliani ke no yejua kiixpejpenaskej kichiuaskej tein sayoj kinualkuilis tajyouilis? ¿Uelis kichiuas nejon maj amo semiok mitsonpoujkaitakan kemej tepopaj? Xikonita tein kijtoj se tokniuj ichpoch: “Hasta kampa nejua ueli nikelnamiki, nopopaj nochipa tel tekiti. Achto moitaya ke tel tekitia porin amo kinekia maj nion teyi techpolo. Sayoj ke nejin xiujmej, mopatani teisa. Kisentoka tel tekiti, amo porin moneki kikouas tein ika timoixpanoltiskej, ta porin kikoua miak taman tein patiyoj uan amo moneki. Yejua ika techixmatij kemej kalyetouanij akin kitelpiaj tomin, uan amo kemej akin kinyolchikauaj oksekin maj okachi kitekitilikan Jiova. Okachi niyolpakiskia komo nopopaj techpaleuiskia maj timotokikan iuan Dios uan amo maj kitani miak tomin”.

⁹ Tetatmej, amo xikauakan maj tekit namechuejkatili iuan Jiova. Xikinnextilikan nanmokoneuan ke yekmelauj nankineltokaj ke okachi moneki se kipias se kuali uikalis iuan Dios uan amo se kipias miak tomin uan okseki taman (Mat. 5:3).

10. Telpoch oso ichpoch, ¿toni moneki tiknemilis achto ke tikixpejpenas se tekit?

¹⁰ Komo tejua titelpoch oso tiichpoch uan tiknemilijtok toni tikchiuas itech monemilis, ¿keniuj uelis kuali titaixpejpenas?  Kemej tikitakejya, moneki kuali tikixtalis toni tikneki tikchiuas. Xa tiknekis tikpias se taman tekit. Sayoj ke, nemachtil tein monekis tikselis uan tekit tein tikneki tikajsis, ¿mitspaleuis okachi xiktekitili Jiova oso mitsuejkatilis iuan? (2 Tim. 4:10.) ¿Tikuelitaskia tiyeski kemej taltikpakneminij akin yolpakij sayoj keman kipiaj miak tomin oso tel kuali kinyoui itech tanamakalis? ¿Oso tikpias takuaujtamatilis kemej tein kipiak David? Yejua kijtoj: “Nejua katka nitelpoch, no niueuentsintiakya, sayoj ke amo akin nikitani akin yolmelauak maj kisenkauakan, nion ikoneuan maj kitemojtokan tein kikuaskej” (Sal. 37:25). Xikelnamiki ke se ojti mitsuejkatilis iuan Jiova uan okse mitspaleuis xikpia nemilis tein okachi kuali (xikonixtajtolti Proverbios 10:22 uan Malaquías 3:10). ¿Katiyejua tikixpejpenas? *

11. ¿Toni techmachtia Biblia ika neixpetanilis, sayoj ke toni moneki amo tikelkauaskej?

¹¹ Biblia amo kinextia ke amo kuali yetok maj se moixpetani nion kijtoua ke sayoj ika se tonalpoloua. Tatitanil Pablo kijkuilouilij Timoteo ke techpaleuia komo tikmachtiaj tonakayo “ma molini uan ma techtakamati ika kuali ijkon keme tejuan tiknekij” (1 Tim. 4:8). Uan no, Biblia kinextia ke moajsi ‘tonal keman se uetskas’ uan ‘tonal keman se ajkotsikuinis’, uan techiluia maj kuali se moseui (Ecl. 3:4; 4:6). Sayoj ke komo amo timoyekpiaj, neixpetanilis uelis techuejkatilis iuan Jiova. Yejua ika, moneki tikitaskej toni taman neixpetanilis tikixpejpenaj uan tonalmej tein tikuij itech, uan ijkon amo timouejkatiliskej iuan.

12. ¿Toni moneki tiknemiliskej keman tikixpejpenaskej neixpetanilis?

¹² Yekinika, maj tikitakan toni taman neixpetanilis tikixpejpenaj. Tikyekmatij ke uelis tikajsiskej neixpetanilis tein kuali. Sayoj ke axkan moajsi miak taman neixpetanilis tein mouika iuan tachiualismej tein Dios kitauelita, kemej tateuilis, naualot oso auilnemilis. Yejua ika, maj tikitakan ika nejmachkayot katiyejua taman neixpetanilis tikuelitaj. Maj timotajtanikan: “¿Toni necholinia maj nikchiua? ¿Necholinia maj nikneki nitateuis, maj nochipa nikneki nitatanis oso maj niknemili ke noaltepeuj okachi kuali?” (Prov. 3:31). “¿Moneki nitaxtauas tel patiyoj? ¿Uelis kinkuejmolos inintanemilil  oksekin?” (Rom. 14:21.) “¿Akonimej iniuan nechuika maj nimosentili?” (Prov. 13:20.) “¿Necholinia maj nikneki nikchiuas teisa tein amo kuali?” (Sant. 1:14, 15.)

13, 14. ¿Keyej moneki titanemiliskej itech tonalmej tein tikuij itech neixpetanilis?

¹³ Axkan maj ika titajtokan tonalmej tein tikuij itech neixpetanilis. ¿Tiktelkuij miak tonalmej itech neixpetanilis uan amo semi ueliok tikchiuaj itekiyo Dios, kemej tanojnotsalis uan nechikolmej? Komo ijkon, toneixpetanilis amo semi techyolpaktis kemej monekiskia. Tein melauj, akin amo kitelkuij tonalmej itech neixpetanilis, okachi moyolpaktiaj keman kichiuaj. ¿Keyej? Porin kimatij ke kichiujkejya tein okachi motelneki, uan amo kinkuejmoloua inintanemilil keman moseuiaj (xikonixtajtolti Filipenses 1:10, 11).

¹⁴ Maski moita ke semi kualtsin maj se kitelkui tonalmej itech neixpetanilis, nejon uelis techuejkatilis iuan Jiova. Kim, se tokniuj siuat akin kipia 20 xiujmej, kipanok nejon. Yejua kijtoua: “Nochi itamian semana, viernes, sábado uan domingo, niyaya iluimej. Sayoj ke axkan nikmati ke moajsi seki taman tein okachi motelneki se kichiuas. Kemej neskayot, kemej nikchiujtok tekit kemej precursor, nimeua chikuasen hora kualkan uan ijkon uelis nikisas nitanojnotsatiuj, yejua ika amo uelis nimoixpetanijtos hasta se oso ome hora kualkan. Moyekita ke amo nochi iluimej amo kuali yetok, sayoj ke uelis semi tetonalpololtis. Kemej itech nochi, moneki kuali taixejekolis”.

15. ¿Keniuj uelis tetatmej kitemoskej neixpetanilis tein kuali?

¹⁵ Tetatmej moneki kinixpanoltiskej ininchankauan, kinpaleuiskej maj motokikan iuan Dios, maj yolpakikan uan maj kimachilikan ke kintasojtaj. Nejin no kijtosneki ke moneki kitemoskej keniuj moixpetaniskej. Komo tejuatsin tiontepopaj, amo xikonnemili ke nochi neixpetanilis amo kuali yetok, maski kemaj moneki tikonyekpias ika tein uelis kinijtakos (1 Cor. 5:6). Komo tiontaixpejpena ika nejmachkayot, tikonajsis keniuj kuali nanmoixpetaniskej kemej kalyetouanij. * Ijkon, tejuatsin uan mochankauan nankiixpejpenaskej ojti tein okachi namechtokis iuan Jiova.

16, 17. ¿Toni tein tetayokoltij kipanotokej miakej tetatmej, uan keniuj tikmatij ke Jiova kinajsikamati?

¹⁶ Kemej netasojtalis tein tetatmej uan konemej mopialiaj semi chikauak, Jiova ika kiixnextiani netasojtalis tein kinpialia itekitikauan (Is. 49:15). Yejua ika, keman se tochankauj kikaua Jiova, semi timotayokoltiaj. Se tokniuj siuat akin isiuapil kikalankixtijkej itech nechikol kijtoj: “Tel amo kuali nimomachiliaya. Nimotajtaniaya keyej nosiuapil kikauak Jiova. Niksentokaya nimotajtakoltiaya tein panok”.

¹⁷ Komo tejuatsin tikonpanotok nejon ouijkayot, Jiova kimati tein tikonmachilia. Yejuatsin no “moteltayokoltij” keman yekinika takat uan tel miakej akin nenkej achto ke ualaskia Tetsaujkakiouit, kiixnamikkej (Gén. 6:5, 6). Akin amo kipanouanij nejon, xa amo kiajsikamatij ke semi teyolkokoj. Sayoj ke semi amo kuali komo tikonkaua maj iamo kuali tachiualis se mochankauj akin kikalankixtijkej itech nechikol mitsonuejkatili iuan Jiova. ¿Toni mitsonpaleuis xikonxiko nejon tayokol?

18. ¿Keyej tetatmej moneki amo motajtakoltiskej komo semej ininkoneuan kikaua Jiova?

¹⁸ Amo xionmotajtakolti ika tein panok. Jiova tinochin techkaua maj tikixpejpenakan ox tiknekij tiktekitiliskej, uan sejsemej kalyetouanij akin motemaktijkejya iuan  Dios uan moauijkejya “moneki kichiutinemis[kej] in tekit ijkon keme Dios ki[n]maktilij ya” (Gál. 6:5). Tein melauj, Jiova kitajtania akin tajtakolchiua maj yejua tanankili ika tein kichiuak, amo tejuatsin (Ezeq. 18:20). Uan moneki tionmopias maj amo xikontajtakolti oksekin. Ta moneki xikonpoujkaita tein Jiova kiixtalijtok keniuj kinmelauaskej itekitikauan. Xikonixnamiki Amokuali, amo tayekananij akin kiyekpiaj nechikol (1 Ped. 5:8, 9).

19, 20. 1) ¿Keniuj tetatmej uelis kixikoskej tayokol tein kipanouaj keman semej ininkoneuan kikalankixtiaj itech nechikol? 2) ¿Toni uelis kichiaskej tetatmej?

¹⁹ Uan no, komo tejuatsin tionkualani iuan Jiova, nejon uelis mitsonuejkatilis iuan. Mokonetsin moneki kiitas ke itatuan kiixtaliaj kitayekanaltiskej Dios ke netasojtalis tein kinpialiaj ichankauan. Yejua ika, moneki xikonchikaua mokuali uikalis iuan Dios uan xikonsentoka xionmosentili iniuan tokniuan akin amo kikauaj, uan nejon mitsonpaleuis xikonxiko tayokol (Prov. 18:1). Xikontapoui Jiova keniuj tionmomachilia (Sal. 62:7, 8). Amo xikontemo tionmotenpaleuis uan ijkon tikonsentokas tionmonojnotsas iuan akin kikalankixtijkej itech nechikol, xa ika correo oso celular (1 Cor. 5:11). Xikonsentoka xikonchiua itekiyo Dios (1 Cor. 15:58). Tokniuj siuat akin achto tikijtojkej kijtoj: “Nikmati ke moneki niksentokas nikchiujtos itekiyo Dios uan niksentokas nikpias kuali uikalis iuan. Ijkon, keman nosiuapil mokepas iuan Jiova, uelis nikpaleuis”.

²⁰ Biblia kinextia ke netasojtalis nochi kichia (1 Cor. 13:4, 7). Yejua ika, amo xikonnemili ke amo kuali yetok komo tikonchia maj mokonetsin mokepa iuan Jiova. Tein melauj, nochi xiujmej miakej moyolnonotsaj uan mokepaj itech inechikol Dios. Jiova amo kinelnamikilia tein kichiujkej satepan ke moyolnonotsaj, ta yejuatsin ‘niman kintapojpoluia’ (Sal. 86:5).

21, 22. ¿Toni tikonixpejpenas tikonchiuas itech monemilis?

²¹ Jiova, akin techchijchiuak, techkaua maj tejuan titaixpejpenakan (xikonixtajtolti Deuteronomio 30:19, 20). Sayoj ke moneki amo tikauilmatiskej. Tinochin akin tikchiuaj kemej Cristo moneki timotajtaniskej: “¿Katiyejua ojti niktojtokatok? ¿Nikauani maj tekit, neixpetanilis oso netasojtalis tein nikinpialia nochankauan nechuejkatili iuan Jiova?”.

²² Netasojtalis tein toTajtsin techpialia amo keman tami. Yejua ika, timouejkatiliskej iuan komo tejuan tikixpejpenaj se ojti tein amo kuali (Rom. 8:38, 39). Sayoj ke amo onkak keyej techpanos nejon. Maj amo tikauakan maj nion teyi techuejkatili iuan Jiova. Itech okse tamachtilis tikitaskej naui tamanok kampa moneki tiknextiskej ke amo tiknekij timouejkatiliskej iuan Dios.