Ijkon kemej kijtoua Biblia, takuaujtamatilis kijtosneki se kineltokas teisa porin moajsi seki taman tein kinextia ke melauak. Akin kipiaj takuaujtamatilis iuan Dios kiyekmatij ke yejuatsin kichiuas nochi tein motenkaua.

Ika tein kiixpejpenak kichiuas itech nochi inemilis kinextij ke takuaujtamatia itech nochi tein Dios motenkaua kichiuas (Génesis 22:15-18). Maski ueliskia kipias se kualtsin nemilis uan amo teyi kipoloskia ompa Egipto, “kiyolnejnekik ma no tajyouijtinemi ijkon keme tajyouitinemi[a]j ipueblojkauan de Dios. Uan Moisés amo no kiyolnejnekik mopakiltijtinemis tech in tajtakolnemilis ten uejkauas sayo para seki tonalme san” (Hebreos 11:25). ¿Ijsiujka kinemilij kichiuas nejon? ¿Moyolnonotsak satepan? Amo, Biblia kijtoua ke “kisentokaya takuaujtamatik [...] maski Moisés amo kitstinemik Totajtsin Dios” (Hebreos 11:27). Yejua amo keman moyolnonotsak ika tein kiixtalij kichiuas porin takuaujtamatia itech nochi tein Dios motenkaua kichiuas.

Uan no, Moisés kitemoj kichikauas inintakuaujtamatilis oksekin. Kemej neskayot, maj tikitakan tein panok keman moitaya ke israelitas amo ueliskiaj choloskej porin taikampa ualayaj itateuijkauan Faraón uan taixpan moajsia ueyiat Chichiltik. Keman yejuan moajsiaj itech nejon ouijkayot, kimoujkatsajtsilijkej Jiova uan Moisés maj kinpaleuianij. ¿Toni kichiuak Moisés?

Yejua xa nion tepitsin kinemiliaya ke Dios kixeloskia ueyiat Chichiltik uan ijkon ueliskiaj choloskej israelitas itech tal uakik. Sayoj ke kiyekmatia ke Dios kichiuaskia teisa uan ijkon kinmakixtiskia, uan kinekia kinpaleuis oksekin maj no ijkon kineltokanij. Itech Éxodo 14:13 kijtoua: “Moisés kiiluij xolal: ‘Amo ximouikan. Amo ximoolinikan uan xikitakan keniuj namechmakixtiti Jiova axkan’”. ¿Uelik kichikauak inintakuaujtamatilis israelitas? Kemaj, porin Biblia kijtoua ke Moisés uan nochi xolal “takuautamatinenke iuan Dios. Ika ya nojon yejuan panokke tatajko tech in ne ueyiat ten kiliaj chichilat [...] [itech] taluak” (Hebreos 11:29). Takuaujtamatilis tein kipiak Moisés amo sayoj yejua kipaleuij ta nochin akin no ijkon kinextijkej.

Moneki titakuaujtamatiskej itech nochi tein Dios motenkaua kichiuas uan tiknextiskej ika tein tikixpejpenaskej tikchiuaskej. Kemej neskayot, Dios motenkaua ke techpaleuis maj tikpiakan tein ika timoixpanoltiskej komo tiktayekanaltiaj itekiyo itech tonemilis (Mateo 6:33). Uelis techouijmakas maj amo tiktayekanaltikan tominpialis porin miakej kichiuaj nejon, sayoj ke uelis tikyekmatiskej ke Jiova techmakas tein techpolos komo timotasojkamatij ika tein tikpiaskej uan tiktayekanaltiaj itekiyo Jiova. Yejuatsin motenkaua: “Amo keman nimitssekokauas uan nion no nimitssenkauas moselti” (Hebreos 13:5).

Uan no moneki tiktemoskej keniuj tikchikauaskej inintakuaujtamatilis oksekin. Kemej neskayot, tetatmej moneki kimatiskej ke uelis kichiuaskej miak taman tein kinpaleuis ininkoneuan maj mochikaua takuaujtamatilis tein kipialiaj Dios. Keman nojnelmejok, moneki peuas kimatiskej ke Dios nemi uan kipia tanauatilmej tein techiluia tein kuali uan tein amo. No moneki kintaneltoktiskej ke moneki kitakamatiskej itanauatiluan uan ijkon kuali yetoskej (Isaías 48:17, 18). Tetatmej kinmakaj tein okachi kuali keman kinpaleuiaj maj takuaujtamatikan ke “ongak se Dios uan [...] kinpaleuis nekes ten kiyoltemoske” (Hebreos 11:6).