¿Akoni “takeual takuaujtamach uan tamatkej”?
“¿Akoni yekmelauj takeual takuaujtamach uan tamatkej akin iteko kiixtalij maj kinixyekana okseki takeualmej [...]?” (MAT. 24:45, TNM)
1, 2. ¿Akoni Jesús kikui uan ijkon techtamaka axkan, uan keyej motelneki maj tikmatikan akoni yejua?
“NOKNIUAN, tel miakpaya nikseliani tamachtilis tein nechpaleuiani keman okachi nechpolojtoya.” Ijkon motasojkamatik se tokniuj siuat itech se amat tein kititanik itech ueyi kali kampa motaixyekana noyampa taltikpak. ¿No ijkon mitsonpanouani? Timiakej kemaj. Uan nejon amo moneki tikmoujkaitaskej.
2 Takual ika iTajtol Dios tein tikseliaj keman moneki, kinextia ke Jesús, Taixyekankej itech nechikol, techtamakatok ijkon kemej motenkauak kichiuas. ¿Akonimej kinkui? Keman kijtoj seki taman tein kinextiskia iyetolis, kinextij ke kikuiskia “takeual takuaujtamach uan tamatkej” uan ijkon kintamakaskia okseki takeualmej “keman moneki” (xikonixtajtolti Mateo 24:45-47, TNM). Ika nejin takeual takuaujtamach, Jesús kintamaka akin yekmelauj imomachtijkauan itech nejin itamian tonalmej. Motelneki maj tikmatikan akoni porin uelis yeski chikauak totakuaujtamatilis uan tokuali uikalis iuan Dios komo tikseliaj tein kitemaka nejon takeual (Mat. 4:4; Juan 17:3).
3. ¿Keniuj momelauani itech toamaixuan neskayot kampa ika tajtoua takeual takuaujtamach?
3 ¿Keniuj moneki tikajsikamatiskej neskayot kampa Jesús ika tajtoj takeual takuaujtamach uan tamatkej? Achto itech toamaixuan momelauani nejin: itech Pentecostés xiuit 33 Jesús kiixtalij takeual takuaujtamach maj kiixyekana okseki takeualmej; itech nejon xiuit uan itech nochi xiujmej tein panoskiaj satepan, takeual katka senolochmej tokniuan taixpejpenalmej akin nemiskiaj nikan taltikpak; oksekin takeualmej no yejuan tokniuan taixpejpenalmej sayoj ke sejsemej; uan itech xiuit 1919 Jesús kiixtalij takeual takuaujtamach “itech nochi tein iaxka”, tein kijtosneki nochi tein mouika iuan iTekiuajyo Dios nikan taltikpak. Sayoj ke, keman timomachtijkej nejin taman ika okachi nejmachkayot uan ika netataujtil, tikitaj ke moneki tikpataskej kemej tikajsikamatij neskayot kampa Jesús ika tajtoj takeual takuaujtamach uan tamatkej (Prov. 4:18). Maj timomachtikan nejin neskayot uan maj tikitakan keniuj motelneki itech tonemilis, yeski tikchiaskej tinemiskej ne iluikak oso nikan taltikpak.
¿KEMANIAN MOCHIUA NEJIN NESKAYOT?
4-6. ¿Keyej ueli tikijtouaj ke neskayot kampa Jesús ika tajtoj takeual takuaujtamach sayoj peuak mochiua satepan ke panok xiuit 1914?
4 Versículos tein moajsi achto, kinextia ke neskayot kampa Jesús ika tajtoj takeual takuaujtamach uan tamatkej, amo peuak mochiua itech Pentecostés xiuit 33, ta itech nejin itamian tonalmej. Maj tikitakan keniuj Biblia techpaleuia maj ijkon tikijtokan.
5 Nejin neskayot no yejua se taman tein Jesús achtook kijtoj ke kinextiskia ‘iyetolis uan itamiampa nochi tein mochiujtok itech taltikpak’ (Mat. 24:3, TNM). Tein achtook kijtojka Jesús itech Mateo 24:4-22 ojpa mochiua. Yekinika, peuak mochiuak itech xiuit 33 hasta 70, uan ojpatika, tein okachi uejkaua, tikitstokej itech totonaluan. ¿Kijtosneki nejin ke neskayot kampa ika tajtoj Jesús takeual takuaujtamach no ojpa mochiuaskia? Tein melauj amo.
6 Itech Mateo 24:29 uan tein kisentoka, Jesús okachi ika tajtojtoya tein mochiuaskia itech totonaluan (xikonixtajtolti Mateo 24:30, 42, 44). Kijtoj ke itech okachi ueyi tajyouilis taltikpakneminij ‘kiitaskej [...] ualajtos ya mixtsalan’. Satepan kinyolchikauak akin nemiskiaj itamian tonalmej maj tachixtoskiaj keman kiniluij: “Amo nankimatij toni horas ualas Namotayekankateko [...] porin [...] nimoualuikas ya kuak namejuan amo [...] nannechchixtoske”. * Niman keman kijtoj tachiualismej tein panoskia itamian tonalmej, kitetapouij neskayot kampa ika tajtoj takeual takuaujtamach. Yejua ika, moyekita ke itajtoluan tein kinextia ke moajsiskia takeual takuaujtamach sayoj peuak mochiua satepan ke panok xiuit 1914, keman peuak itamian tonalmej. ¿Keyej taixejekol maj ijkon tikijtokan?
7. ¿Toni netajtanil motelnekia monankilis keman peuak tatekilis uan keyej?
7 Maj titanemilikan itech nejin netajtanil tein Jesús kichiuak: “¿Akoni yekmelauj takeual takuaujtamach uan tamatkej[?]”. Itech yekinika siglo amo monekia motajtanis. Kemej tikitakej itech achto tamachtilis, tatitanilmej kichiuayaj uejueyi taman ika ichikaualis Dios uan hasta kinpanoltiliayaj oksekin nejon tatiochiualis, uan nejon kiyeknextiaya ke yejuan kipiayaj inepaleuil Dios (Hech. 5:12). Yejua ika, ¿keyej aksa motajtaniskia akoni kiixtalijka Jesús maj kinyekana iichkauan? Sayoj ke itech xiuit 1914 amo ijkon katka. Nejon xiuit peuak tatekilis. Ajsikaya tonal keman kixeloskiaj amo kuali xiuit uan trigo (Mat. 13:36-43). Sayoj ke keman peuak tatekilis, moajsiaj akin mochiuayaj kemej yeskiaj itatojtokakauan Cristo akin kijtouayaj ke katkaj melaujkej. Yejua ika onkaya se netajtanil tein motelneki: ¿keniuj ueliskia momatis akonimej tamatiaj kemej trigo, tein kijtosneki, tokniuan taixpejpenalmej? Neskayot tein Jesús kijtoj kitemakak tanankilil. Tokniuan taixpejpenalmej yeskiaj akin tel kuali kintamakatoskiaj ika iTajtol Dios.
¿AKONI TAKEUAL TAKUAUJTAMACH UAN TAMATKEJ?
8. ¿Keyej kinamiki maj sayoj tokniuan taixpejpenalmej pouikan itech takeual takuaujtamach?
8 Akin pouij itech takeual takuaujtamach moneki yeskij tokniuan taixpejpenalmej akin nemij nikan taltikpak. Yejuan kintokaytiaj ‘tiopixkame’ uan kinkauilijtokej maj ‘kitenextilijtinemikan in uelilisme de Totajtsin Dios. Porin Yejuatsin kinnotsak ya maj ualkisakan ya ne kampa tayouayanijtik uan maj kalakikan kampa ueyi takualtsinkan kampa kualtsin tanaltontok’ (1 Ped. 2:9). Yejua ika, sayoj akin kintokaytiaj ‘tiopixkame’ uelij kinmakaj takual ika iTajtol Dios oksekin tokniuan (Mal. 2:7; Apoc. 12:17).
9. ¿Nochin tokniuan taixpejpenalmej pouij itech takeual takuaujtamach? Xikonmelaua.
9 ¿Nochin tokniuan taixpejpenalmej akin nemij nikan taltikpak pouij itech takeual takuaujtamach? Amo. Tein melauj amo nochin tokniuan taixpejpenalmej kinmakaj takual ika iTajtol Dios oksekin tokniuan akin nemij noyampa taltikpak. Semi melauak ke itech trigo, sekin tokniuan taixpejpenalmej tekitij kemej tapaleuianij oso tayekananij itech nechikol. Yejuan tamachtiaj kajkalpan uan kampa monechikouaj, uan senkis kitakamatij tanauatilmej tein kitemakaj itech ueyi kali kampa motaixyekana noyampa taltikpak, sayoj ke amo kinmakaj takual ika iTajtol Dios tokniuan tein moajsij semanauak taltikpak. Uan no, moajsij sekin tokniuan siuamej taixpejpenalmej akin yolyemankej tein amo keman kiyejyekoskiaj kipiaskej tekit kemej tamachtianij itech nechikol (1 Cor. 11:3; 14:34).
10. ¿Akoni takeual takuaujtamach uan tamatkej?
10 Komo ijkon, ¿akoni takeual takuaujtamach uan tamatkej? Ijkon kemej ne uejkauj Jesús kintamakak tel miakej ika sayoj sekin, itech nejin takeual moajsij sekin tokniuan taixpejpenalmej akin amo miakej tein kikixtiaj uan kitemakaj takual ika iTajtol Dios itech iyetolis Cristo. Ijkon kemej panouani itamian tonalmej, tokniuan taixpejpenalmej akin pouij itech takeual takuaujtamach senolochmej tekitinij itech ueyi kali kampa motaixyekana noyampa taltikpak. Axkan nejin takeual yejuan Oloch Taojtokaltianij akin kinixyekanaj iTaixpantijkauan Jiova. Sayoj ke maj tikitakan ke maski itech nejin takeual moajsij sekin taltikpakneminij, tajtol takeual kinextia ke moajsi sayoj se. Yejua ika, Oloch Taojtokaltianij tekitij kemej yeskia sayoj se, tein kijtosneki ke kisenixejekouaj tein moixtalia mochiuas.
¿AKONIMEJ OKSEKI TAKEUALMEJ?
11, 12. 1) ¿Itech toni ome taman Jesús kiixtalij takeual takuaujtamach uan tamatkej? 2) ¿Kemanian Jesús kiixtalij takeual takuaujtamach maj kinyekana okseki itakeualuan uan akoni kiixpejpenak?
11 Moneki tikitaskej ke itech neskayot tein Jesús kijtoj, kinextij ke yejua kiixtaliskia takeual takuaujtamach uan tamatkej itech ome taman. Yekinika kiixtalia maj kinixyekana okseki takeualmej, uan ojpatika, kiixtalia itech nochi tein iaxka. Neskayot tein kijtoj Jesús sayoj mochiua itech itamian tonalmej, yejua ika kiixtaliskia itech nejin ome taman satepan ke panoskia xiuit 1914 keman peuak iyetolis Cristo kemej Tekiuaj.
12 ¿Kemanian Jesús kiixtalij takeual takuaujtamach maj kinixyekana okseki takeualmej? Tein techpaleuis maj tikmatikan tanankilil, moneki timokepaskej itech xiuit 1914, keman peuak tatekilis. Kemej timomachtijkejya, itech nejon tonalmej moajsiaj miak olochmej tein kijtouayaj ke katkaj itatojtokakauan Cristo. ¿Katiyejua oloch kiixpejpenaskia Jesús uan kiixtaliskia takeual takuaujtamach? Netajtanil monankilij satepan keman yejua uan iTajtsin tachiatoj itech templo, (se taman taueyichiualis tein Dios kiixtalij), itech xiuit 1914 hasta ipeujyan xiuit 1919 (Mal. 3:1). * ¡Semi yolpakkej kiitaskej ke seki Momachtianij ika Biblia akin amo miakej katkaj kinextijkej ke kiteltasojtayaj Jiova uan iTajtol! Kemej tikmatij, monekia mochipauaskej itech seki taman, sayoj ke moyolyemanijkej uan mokaujkej maj kinyektalianij keman mochiuak tayejyekolis uan tachipaualis tein uejkauak seki tonalmej (Mal. 3:2-4). Nejon yolmelaujkej Momachtianij ika Biblia katkaj senkis trigo. Itech 1919, xiuit keman oksepa peujkej okachi kichiuaj itekiyo Dios, Jesús kinixpejpenak itech nochi nejon tokniuan seki taixpejpenalmej ixmachmej akin mochiuaskiaj takeual takuaujtamach uan tamatkej uan kinixtalij maj kinixyekanakan okseki itakeualuan.
13. ¿Akonimej no mopouaj iniuan okseki takeualmej, uan keyej?
13 ¿Akonimej nejon okseki takeualmej oso domésticos? Yejuan akin kiseliaj takual ika iTajtol Dios. Keman peuak itamian tonalmej, nochin akin katkaj okseki takeualmej kichiayaj kiseliskej nemilis iluikak. Sayoj ke satepan tel miakej taltikpakneminij akin moixmatij kemej okseki ichkamej no mopoujkej iniuan okseki takeualmej. Nejin tel miakej taltikpakneminij yejuan akin axkan no pouij itech ‘sen oloch yetolis de iichkauan’ Cristo akin kitojtokaj (Juan 10:16). Tokniuan taixpejpenalmej uan okseki ichkamej nochin kiseliaj sayoj se taman takual ika iTajtol Dios tein kitemaka takeual takuaujtamach “keman moneki”. ¿Uan toni uelis tikijtoskej iniuan Oloch Taojtokaltianij akin axkan pouij itech takeual takuaujtamach uan tamatkej? Yejuan no moneki motamakaskej ika iTajtol Dios, uan ika yolyemanilis kiajsikamatij ke sejsemej no mopouaj iniuan okseki takeualmej ijkon kemej nochin tokniuan.
Yeski tikchiaskej tinemiskej ne iluikak oso nikan taltikpak, tinochin timopouaj kemej okseki takeualmej uan moneki tikseliskej takual ika iTajtol Dios keman moneki
14. 1) ¿Toni ueyi tekit kimakakej takeual takuaujtamach uan toni nejon? 2) ¿Toni Jesús kinejmachtij takeual takuaujtamach uan tamatkej? (Xikonita recuadro “Komo kemansa nejon takeual amo yolkuali...”.)
14 Jesús kimakak takeual takuaujtamach uan tamatkej se ueyi tekit. Ne uejkauj, se takeual oso tayekankatakeual, kikauiliayaj maj kinyekana nochin okseki takeualmej akin moajsiaj ichan iteko (Luc. 12:42). No ijkon, takeual takuaujtamach uan tamatkej kikauilijkej maj kinyekana nochin oksekin itekitikauan Jiova. Seki tekit tein kichiua yejua nejin: kiita maj kuali mokui nochi taman tein ika mochiua itekiyo Dios, kiixyekana tanojnotsalis, kiita maj mokixti tamachtilis tein motemakas itech uejueyi nechikolmej uan maj mokixti amaixmej tein mokui itech tanojnotsalis, tein ika timomachtiaj tosejselti uan itech nechikol. Okseki takeualmej kikuij nochi taman takual ika iTajtol Dios tein kitemaka nejin takeual takuaujtamach.
¿KEMANIAN KIIXTALIAJ ITECH NOCHI TEIN IAXKA ITEKO?
15, 16. ¿Kemanian Jesús kiixtalia takeual takuaujtamach itech nochi tein iaxka?
15 ¿Kemanian Jesús kiixtalia takeual itech ojpatika taman, tein kijtosneki keman kikauilia imako “nochi tein iaxka”? Yejua kijtoj: “¡Yolpaki nejon takeual komo iteko keman ejkos, kiajsikiuj ijkon kichiujtok! Yekmelauj tein namechiluia: Kiixtalis itech nochi tein iaxka” (Mat. 24:46, 47, TNM). Tikitaj ke Jesús kiixtalia takeual itech ojpatika taman, satepan keman ejko uan kiita ke “ijkon kichiujtok”, tein kijtosneki ke kisentoka kitemaka takual ika iTajtol Dios. Nejin techajsikamatiltia ke panoskia seki xiujmej keman kiixtaliskia itech se taman iuan okse. Sayoj ke, ¿keniuj uan kemanian kiixtalia Jesús takeual itech nochi tein iaxka? Tein techpaleuis maj tiknankilikan nejin netajtanil, moneki tikmatiskej ome taman: kemanian ejko yejua uan toni nejon tein iaxka.
16 ¿Kemanian ejko Jesús? Tanankilil tikajsij itech versículos tein moajsi achto. Tajtol ‘ualas’ tein Jesús ompa kikuik, kijtosneki tonal keman ualas uan kijtos toni kiseliskej taltikpakneminij itech itamian tein mochiujtok nikan taltikpak (Mat. 24:30, 42, 44). * Yejua ika, keman ualas oso ejkos Jesús ijkon kemej kijtoj itech neskayot kampa ika tajtoj takeual takuaujtamach mochiuas itech okachi ueyi tajyouilis.
17. ¿Toni iaxka Jesús?
17 ¿Toni “nochi tein iaxka” Jesús? Yejua amo kijtoj nion teyi maj kinextiani ke sayoj nikan taltikpak kipia tein iaxka. Tein melauj, Jesús kipia ueyi taixyekanalis ompa iluikak. Yejua kijtoj: “Dios nechmaktilij ya nochi in tanauatil tech in eluiyaktsinko uan nikan taltikpak” (Mat. 28:18; Efes. 1:20-23). Uan tein no iaxka Jesús yejua iTekiuajyo Dios, tein kiselij itech xiuit 1914 uan tekiuajtis iniuan itatojtokakauan taixpejpenalmej (Apoc. 11:15).
18. ¿Keyej Jesús ika miak pakilis kiixtalis takeual takuaujtamach itech nochi tein iaxka?
18 ¿Toni techajsikamatiltia nejin tein timomachtijkej? Keman Jesús ualas kemej Juez itech okachi ueyi tajyouilis, kiitas ke takeual takuaujtamach kisentoka kintamaka okseki takeualmej keman moneki. Kemej kiitas nejon, ika miak pakilis kiixtalis itech ojpatika taman: kiixtalis itech nochi tein iaxka. Akin pouij itech takeual takuaujtamach, Cristo kinixtalis itech nochi tein iaxka keman kiseliskej netetayokolil ompa iluikak uan mochiuaskej tekiuanij iuan Cristo.
19. ¿Kiselia takeual takuaujtamach okachi ueyi netetayokolil ne iluikak ke oksekin taixpejpenalmej?
19 ¿Kiselia takeual takuaujtamach okachi ueyi netetayokolil ne iluikak ke oksekin taixpejpenalmej? Amo. Keman itech se tonal aksa motenkaua iniuan sekin akin amo miakej ke kinmakas se netetayokolil, no uelis kiseliskej oksekin taltikpakneminij. Kemej neskayot, maj tiknemilikan tein Jesús kiniluij 11 itatitaniluan tatakamatinij youak achto ke momikiliskia (xikonixtajtolti Lucas 22:28-30). Yejua motenkauak iniuan nejon takamej akin amo miakej ke kinmakaskia se ueyi netetayokolil porin amo kikauayaj: Jesús kiniluij ke iuan tekiuajtiskiaj. Sayoj ke seki xiujmej satepan kinextij ke nochin 144,000 taixpejpenalmej kiseliskiaj tekiuajyot uan iuan taixyekanaskiaj (Apoc. 1:1; 3:21). No ijkon mochiua tein kijtoua Mateo 24:47. Yejua motenkauak iniuan seki takamej akin amo miakej, tokniuan taixpejpenalmej akin pouij itech takeual takuaujtamach, ke kinixtaliskia itech nochi tein iaxka. Sayoj ke tein melauj, nochin 144,000 kiseliskej nejon ueyi tanauatil tein kipia Cristo ne iluikak (Apoc. 20:4, 6).
Nochin 144,000 tokniuan taixpejpenalmej, kiseliskej ueyi tanauatil ne iluikak kemej Jesús (Xikonita párrafo 19)
20. ¿Keyej Jesús kiixtalij takeual takuaujtamach, uan toni tiknekij tikchiuaskej?
20 Ika takeual takuaujtamach uan tamatkej, Jesús kichiujtok kemej itech yekinika siglo: kintamaka tel miakej ika sayoj sekin. Kiixtalij nejon takeual porin ijkon itech itamian tonalmej akin yekmelauj imomachtijkauan, yeskij taixpejpenalmej oso okseki ichkamej, nochipa kipiaskiaj takual ika iTajtol Dios “keman moneki”. ¡Semi tiktasojkamatij! Yejua ika maj tiknextikan ke tiktasojkamatij. Nejon tiknextiaj keman tikinpaleuiaj tokniuan taixpejpenalmej akin pouij itech takeual takuaujtamach uan tamatkej (Heb. 13:7, 17).
^ párr. 6 Párrafo 6: Keman Cristo “ualas” (itech tajtol griego érkjomai) no taman kijtosneki ke “iyetolis” (parousía). Iyetolis tein amo moita peua achto ke ualas uan kiualkuis tatsakuiltilis.
^ párr. 12 Párrafo 12: Xikonita itech nejin amaix tamachtilis “Niyetok namouan nochi tonalmej”, páginas 16 hasta 18, párrafos 5 hasta 8.
^ párr. 16 Párrafo 16: Xikonita itech nejin amaix tamachtilis “¿Kemanian mochiuas nochi nejin?”, página 13 uan 14, párrafos 14 hasta 18.
