1, 2. ¿Toni moneki tikchiuaskej uan ijkon uelis tikpiaskej itatiochiualis Dios?

TINOCHIN tiknekij maj kuali techitakan oksekin. Sayoj ke akin tiktojtokaj Cristo, okachi tiknekij maj kuali techita Jiova. Ta kemej tikmatij, yejuatsin akin okachi Ueyi Taixyekankej uan itech “ualeujtok nemilis” (Sal. 36:9).

² Keman Pedro kimelauak keniuj kineki Jiova maj tinemikan, kijtoj ke ‘moneki tichipaukanemiskej uan tikmouistilijtiyaskej Dios’ (xikonixtajtolti 2 Pedro 3:11). Komo tiknekij tikpiaskej itatiochiualis Dios, moneki timoajsiskej tichipaujkej itech tonemilis, totanemilil uan itech totaueyichiualis. Uan no, moneki ‘tikmouistilijtiyaskej Dios’ porin semi tikpoujkaitaj uan tiktasojtaj. Nejin kijtosneki ke itatiochiualis Dios tikpiaskej amo sayoj ika tein tikchiuaj, ta no ika tein tikmachiliaj. Kemej Jiova ‘kiita tein tikpiaj itech toyolo’, kimati ox tichipaujkanemij uan ox senkis tikueyichiuaj sayoj yejuatsin oso amo (1 Crón. 29:17).

3. ¿Toni motelneki maj timotajtanikan?

³ Satanás amo kineki maj tiksentokakan tikyolpaktikan Jiova. Tein melauj, senkis kitemoua keniuj kichiuas maj tikpolokan tokuali uikalis iuan. Ika tataman takajkayaualis, kineki techtanejnektis uan techxelos iuan Dios (Juan 8:44; 2 Cor. 11:13-15). Yejua ika motelneki maj timotajtanikan: “¿Keniuj Satanás kitemoua nechkajkayauas? ¿Keniuj uelis nikyekpias nokuali uikalis iuan Jiova?”.

4. ¿Toni kitemoua Satanás techijtakouilis uan ijkon tikpoloskej tokuali uikalis iuan Dios uan keyej?

⁴ Momachtijkej Santiago kijkuiloj: “Kuak in pitsotik tanejnekilis de yejua san kiyoltilana in tokniu taneltokke uan kikajkayaua, ijkuakon yejua san iselti uetsis tech in tajtakol [...]. Uan [...] ompa euteua ya ne mikilis”  (Sant. 1:14, 15). Kemej Satanás kitelneki kitamis tokuali uikalis iuan Dios, yejua ika kitemoua kijtakos toyolo kampa ualeujtok totanejnekilis.

5, 6. 1) ¿Keniuj Amokuali kitemoua kijtakos toyolo? 2) Xikonijto katiyejua eyi tamekauilis kikui Satanás tein ika kitemoua maj tikpiakan amo kuali tanejnekilis itech toyolo uan xikonnexti ox tel kuali kikuini.

⁵ ¿Keniuj kitemoua Satanás kijtakos toyolo? Biblia kijtoua: “Nochi in taltikpakuani kinyekana ok yejua in amokuali Satanás” (1 Juan 5:19). Yejua ika, se taman tein kikui Satanás yejua “tajtakolnemilis de nikan taltikpak” (xikonixtajtolti 1 Juan 2:15, 16). Satanás miak xiujmejya kichiuani maj onka miak taman tein ika techkajkayauas nikan taltikpak kampa taixyekantok. Kemej tinemij nikan, moneki timoyekpiaskej maj amo techichtakaui ika nejon tamekauilis (Juan 17:15).

⁶ Satanás kikui tataman tamekauilis tein ika kitemoua keniuj kichiuas maj tikpiakan amo kuali tanejnekilis itech toyolo. Tatitanil Juan kijtoj eyi taman: 1) “tanejnekilis [...] ten eua itech in tonakayo”, 2) “taixnejnekilis kuak kiyokolitaj in toixtololouan” uan 3) “moueyinekilis ten eua itech miak tataman de se kipixtok”. Ika nejon eyi taman, Satanás kinekia kimekauis Jesús keman moajsia taluakyan. Kemej tel miak xiujmejya kitekitiltiani, axkan semi ueli tauetsiltia ika nejon. Uan kemej kimati toni kinyoltilana taltikpakneminij, kimati katiyejua kitekitiltis iuan sejsemej. Achto ke tikitaskej keniuj tikchiuaskej maj amo techmekaui, timomachtitij keniuj kitekitiltij nejon iuan Eva uan iuan iKonetsin Dios uan keniuj tataman tanankilijkej.

7. ¿Keniuj Satanás kiyejyekoj Eva ika “tanejnekilis [...] ten eua itech in tonakayo”?

⁷ Tejuan akin tinemij nikan taltikpak moneki timotamakaskej uan ijkon uelis tiyoltoskej. Yejua ika Dios kichijchiuak taltikpak maj onka miak taman tein se kimajseuas. Sayoj ke Satanás uelis kikuis nejon tein moneki tikchiuaskej mojmostaj, uan ika techtanejnektis maj tikchiuakan tein amo kiyolpaktia Dios. Maj tikitakan keniuj kichiuak iuan Eva (xikonixtajtolti Génesis 3:1-6). Satanás kiiluij ke ueliskia kikuas itakilo “kouit tein kiixnextia taixmatilis ika tein kuali uan tein amo kuali” uan amo mikiskia (Gén. 2:9). Uan no kiyekiluij ke ijkuak kikuaskia, mochiuaskia kemej Dios. Ika nejon tajtolmej kiajsikamatiltij Eva ke amo monekia kitakamatis Jiova uan ueliskia kisentokas nemis. ¡Se ueyi takajkayaualis! ¿Toni kichiuaskia Eva? Ueliskia senkis kiixnamikis nejon tanemilil, oso kisentokas kinemilis uan kikauas maj peua okachi kineki kikuas takilot. Tetayokoltij tikijtoskej ke maski onkaya miak koujtakilomej, kisentokak kinemilij tein Satanás kiiluij ika kouit tein moajsia tatajko xochital. Satepan “peuak kikui takilot uan kikua”. Satanás kichiuak maj Eva kineki tein Dios kitakaualtijka.

8. ¿Keniuj Satanás kiyejyekoj Jesús ika “tanejnekilis [...] ten eua itech in tonakayo” uan keyej amo uelik kiuetsiltij?

 ⁸ Satanás no ika kiyejyekoj Jesús keman moajsia taluakyan. Kemej amo takuajtoya ome poual youal uan ome poual tonal, Satanás kiyejyekoj ika takual tein kinektoya. Kiiluij: “Komo melau [...] tion Tekonetsin de Dios, ijkuakon xiknauati nijin tet ke ma mokuepa se pantsin” (Luc. 4:1-3). Ika ichikaualis Dios, Jesús ueliskia momayanseuis, oso ueliskia amo kichiuas. Yejua kimatia ke ika nejon chikaualis amo ueliskia kichiuas sayoj itanejnekilis. Maski mayantoya kiitak ke okachi monekia amo kipolos ikuali uikalis iuan Jiova. Yejua ika tanankilij: “Kijtoa in Tajkuilolamatsin de Dios ijkuin: ‘In taka ma nemikan amo sayo ika in takualis san. Ta, no ma yolpepexokaltinemikan ika nochi in Tajtoltsin ten Dios techmaktilijtinemi’” (Luc. 4:4).

9. ¿Toni kijtosneki tajtolmej “taixnejnekilis kuak kiyokolitaj in toixtololouan”, uan keniuj Satanás ika nejon kiyejyekoj Eva?

⁹ Juan kijtoj okse tamekauilis uan nejin yejua “taixnejnekilis kuak kiyokolitaj in toixtololouan”. Nejin tajtolmej kiteajsikamatiltia ke uelis peuas tiknejnekiskej teisa maski sayoj tikitaskej. Ika nejon tanejnekilis Satanás kiyejyekoj Eva keman kiiluij: “Nanixtajtapouiskej”. Ijkon kemej kisentokaya kiitaya takilot, okachi kinejnekia. Kemaj, Eva “kiixnekik” takilot.

10. ¿Keniuj Satanás kiyejyekoj Jesús ika “taixnejnekilis kuak kiyokolitaj in toixtololouan” uan keniuj tanankilij?

¹⁰ ¿Uan keniuj Satanás kiyejyekoj Jesús ika “taixnejnekilis kuak kiyokolitaj in toixtololouan”? “Kinextilijtiuetsik Jesús nochi in pueblojme kampa tayekanaj in ueyi chiuanime de nikan taltikpak. Uan [...] kilij Jesús ijkuin: -Nejua uelis nimitsmaktilis nochi in chikaualisme de nojon pueblojme iuan ninueyipanchiukayot.” (Luc. 4:5, 6.) Kemej tikmatij, Jesús amo kiitak nejon tekiuajyomej ika iixtololouan, ta Satanás ika ichikaualis kichiuak maj monexti iixpan Jesús porin kinemiliaya ke kinejnekiskia ijkuak kiitaskia iueiyo. Satepan moixeuij kiiluis: “Takan timotankuaketsas uan timotentokas noixpan uan no takan tinechmouistilis, ijkuakon nochi [...] nimitsmaktilis” (Luc. 4:7). Sayoj ke Jesús senkis amo kinekia mochiuas kemej Satanás kinekia. Yejua ika tanankilij: “Kijtoa tech in Tajkuilolamatsin de Dios ijkuin: ‘[...] Xikmouistiliti [...] Dios, uan sayo Yejuatsin xikmouiskatekitilijtinemi’” (Luc. 4:8).

11. ¿Keniuj Satanás kikajkayauak Eva?

¹¹ Keman Juan ika tajtoj tein poui nikan taltikpak, no kinextij “moueyinekilis ten  eua itech miak tataman de se kipixtok”. Keman sayoj Adán uan Eva nemiaj nikan taltikpak, amo ueliaj kinextiayaj nochi tein kipiayaj ininixpan oksekin. Sayoj ke kemaj kinextijkej ke moueyinekiaj. ¿Keniuj? Keman Satanás kiyejyekoj Eva, kiajsikamatiltij ke Jiova kitsakuiltilijtoya teisa tein kualtsin. Kiiluij ke tonal keman kiyekoskia itakilo “kouit tein kiixnextia taixmatilis ika tein kuali uan tein amo kuali”, mochiuaskia ‘kemej Dios, uan kiixmatiskia tein kuali uan tein amo kuali’ (Gén. 2:17; 3:5). Ika nejin tajtolmej, kiajsikamatiltij ke ueliskia kikauas Jiova. Moita ke iueyinekilis kiolinij maj kineltoka nejon takajkayaualis. Kemej Eva kinemiliaya ke amo mikiskia, kikuaj takilot. ¡Semi mopolojtoya!

12. ¿Toni okse taman kikuik Satanás tein ika kiyejyekoj Jesús sayoj ke keniuj tanankilij?

¹² Sayoj ke Jesús amo kichiuak kemej Eva, ta yejua techkauilij se yekmelauj neskayot ika yolyemanilis. Satanás oksepa kinekia kitanejnektis Jesús maj kichiuani teisa tein kimoujkaitaskiaj oksekin uan tein ika kiyejyekoskia Jiova, sayoj ke kimatia ke komo kichiuaskia, kinextijtoskia ke moueyinekia. Yejua ika senkis tanankilij: “Kijtoa in Tajkuilolamatsin [...]: ‘Amo xiktelpanoltis in [i]tapaleuilis [...] Dios’” (xikonixtajtolti Lucas 4:9-12).

13, 14. ¿Keniuj Satanás axkan kikui itamekauilis?

¹³ Axkan Satanás no kikui tayejyekolis kemej tein kitekitiltij iuan Eva uan Jesús. Yejua kikui “tanejnekilis [...] ten eua itech in tonakayo”, uan ika nejon kinyejyekoua taltikpakneminij maj auilnemikan oso maj tel takuakan oso tel tatayikan. No kikui “taixnejnekilis kuak kiyokolitaj in toixtololouan” uan ika nejon kintanejnektia maj kiitakan kampa nesi auilnemilis uan okachiok itech Internet. Uan no, kitemoua kichiuas maj kinekikan moueyitaliskej, mochiuaskej uejueyi chiuanimej, kipiaskej tomin, uan ijkon kinekiskej kipiaskej “moueyinekilis ten eua itech miak tataman de se kipixtok”.

¹⁴ “Tajtakolnemilis de nikan taltikpak” tamati kemej takual tein kikui se amichkitskijkej. Moita ke tel kuali takual, sayoj ke ompa yetok tepos tein ika motsikos amichij. Satanás kikui tein taltikpakneminij xa kiitaj ke kinpoloua itech ininnemilis uan ika kichiua maj kinejnekikan tein Dios techtakaualtia. Nejon tayejyekolis teichtakauia  uan chijchiujtok kemej kichiuas maj peua tikpiakan tanejnekilis tein amo kuali uan ijkon kijtakos toyolo. Ika nejon, Satanás kitemoua maj tiknemilikan ke tikpiaskej tein tiknejnekij uan tein techpoloua yejua tein okachi moneki ke tiktakamatiskej Jiova. ¿Timokauaskej maj techtsiko itamekauilis?

15. ¿Keniuj techpaleuia neskayot tein kikauak Jesús maj tikxikokan tayejyekolis tein kitalia Satanás?

¹⁵ Eva uetsik itech itamekauilis Satanás, sayoj ke Jesús taxikoj. Yejua nochipa kikuia tein kijtoua Biblia ijkuak tanankiliaya: “Kijtoa in Tajkuilolamatsin”. Komo ika nejmachkayot timomachtiaj Biblia uan kuali tiktekitiltiaj, no uelis tikelnamikiskej textos tein techpaleuis maj tikixnamikikan tayejyekolis keman tikpiaskej (Sal.1:1, 2). Uan no, komo tikinelnamikij itekitikauan Dios akin ixnesij itech Biblia akin kixikojkej tayejyekolis, techolinis maj no ijkon tikchiuakan (Rom. 15:4). Uan komo senkis tikpoujkaitaj Jiova, tiktasojtaj tein kitasojta uan tiktauelitaj tein kitauelita, techpaleuis maj titaxikokan (Sal. 97:10).

16, 17. ¿Keniuj komo ‘se kitekitiltia se itanemilil’ techpaleuia maj tikitakan tein tikpiaj itech toyolo?

¹⁶ Tatitanil Pablo techiluia ke moneki “se kitekitiltis se itanemilil”, uan ijkon uelis titanemiliskej kemej Dios tanemilia uan amo kemej akin pouij nikan taltikpak (Rom. 12:1, 2, TNM). Pablo kinextij ke moneki tikyekpiaskej totanemililuan keman kijkuiloj: “Tikinijtakojtinemij nochi tataman tamachilis tenika [...] techtsajtsakuilijtinemis para ma amo tikixmatikan Dios. [...] Uan no tikinchiualtijtiyoue ma kintakamatikan Cristo” (2 Cor. 10:5). Ijkon kemej tikpiaskej totanemilil, no ijkon titamatiskej, yejua ika moneki tikpiaskej itech totsontekon tein techpaleuis (Filip. 4:8).

¹⁷ Komo tiknekij timoajsiskej tichipaujkej, moneki tikixnamikiskej tanemilil uan tanejnekilis tein amo kuali. Jiova kineki maj tiktasojtakan ika “yolchipaualis” (1 Tim. 1:5). Sayoj ke maj amo tikelkauakan ke toyolo semi takajkayaua; xa amo tikitaskej keniuj techijtakoua “tajtakolnemilis de nikan taltikpak” (Jer. 17:9). Moneki maj tikchiuakan nejin tein Pablo tayolmajxitij: “Ximoyoltatemolikan ika nejmach para nankitaske kox melau nankipiaj ok takuautamatilis” (2 Cor. 13:5). Keman timomachtiskej Biblia, maj timotajtanikan: “¿Kiyolpaktia Dios tein niknemilia uan tein niknejneki?”.

18, 19. ¿Keyej moneki timochiuaskej kemej Jiova kineki?

¹⁸ No techpaleuis maj tikixnamikikan “tajtakolnemilis de nikan taltikpak” komo titanemiliaj itech nejin tajtolmej tein kijkuiloj Juan: “Nochi in tajtakolnemilis tantiu ya iuan nochi nijin tanejnekilis [...]. Pero ne naken kichiutinemi ten kimonekiltia Dios, yejua ne nachipa [moajsis]” (1 Juan 2:17). Nikan taltikpak kampa taixyekantok Satanás chijchiujtok maj nesi ke tel kuali uan ke uejkauas nochipaya, sayoj ke amo uejkaua senkis ixpoliuis. Maj amo timokauakan maj techkajkayaua; nion se taman tein poui nikan taltikpak uejkauas nochipaya.

¹⁹ Tatitanil Pedro techyoleua maj timochiuakan kemej Dios kineki axkan ke ‘tikchixtokej uan tikelnamiktokej [...] itonal Jiova, keman iluikak tein xotatos, xinis, uan tein itech eua tein tel totonik, atias’ (2 Ped. 3:12, TNM). Amo uejkaua Jiova kiixpolos nochi tein amo kuali tein onkak nikan taltikpak. Sayoj ke axkan Satanás kisentokas techtanejnektis ika “tajtakolnemilis de nikan taltikpak”, kemej kichiuak iuan Eva uan Jesús. Maj amo tikchiuakan kemej Eva akin sayoj kitemoj itanejnekilis. Komo tikchiuaskiaj, tikselijtoskiaj Satanás kemej todios. Okachi kuali, maj tikchiuakan kemej Jesús uan maj tikixnamikikan nochi tataman tayejyekolis maski semi ouij tikchiuaskej. Maj timochiuakan kemej Jiova kineki.