1, 2. ¿Toni techmachtia Jiova keman kijtoua ke mochiua kemej se ichkatajpixkej?

JIOVA kijtoua ke mochiua kemej se ichkatajpixkej (Ezeq. 34:11-14). Nejin techpaleuia maj tikajsikamatikan keniuj tamati yejuatsin. Se ichkatajpixkej tetasojtakej kimachilia ke moneki kinyekpias iichkauan uan kinmakas tein kinpoloua. Kinuika ixtauat uan kampa uelis tayiskej at (Sal. 23:1, 2); kinyekpia youal uan tonal (Luc. 2:8); kinita maj amo kinkua tekuani (1 Sam. 17:34, 35); kinuika iyolixko tein yekin yolij (Is. 40:11); kintemoua tein poliuij uan kinpajtia tein takokolmej (Ezeq. 34:16).

² Ne uejkauj, miakej israelitas katkaj ichkatajpianij uan tatokanij, yejua ika amo kinouijmakaya kiajsikamatiskej keyej Jiova kijtoua ke mochiua kemej se ichkatajpixkej. Monekia kinyekpiaskej ichkamej uan kinmakaskej tein kinpolouaya. No ijkon panoua iniuan taltikpakneminij (Mar. 6:34). Komo amo kipiaj tein kinpoloua nion itaixyekanalis Dios, semi tajyouiaj. Amo kimatij toni kuali uan toni amo, uelis kinijtakoskej uan nochin momoyauaj ijkon kemej “ichkamej tein amo kipiaj inintajpixkauj” (1 Rey. 22:17). Sayoj ke Jiova ika netasojtalis kinmaka itekitikauan tein kinpoloua.

3. ¿Toni tikitaskej itech nejin tamachtilis?

³ Axkan Jiova kisentoka mochiua kemej se ichkatajpixkej. Kisentoka kinpaleuia itekitikauan akin kinita kemej iichkauan. Maj tikitakan keniuj kinyekana uan kinmaka tein kinpoloua, uan no toni moneki kichiuaskej ichkamej komo kinekij kiseliskej inepaleuil Jiova tein kitemaka ika netasojtalis.

4. ¿Keniuj Jesús kinyekpia iichkauan Jiova?

⁴ Jiova kiixtalij Jesús maj taixyekana itech nechikol kampa kichiuaj kemej Cristo (Efes. 1:22, 23). Jesús yejua “kuali tapixke” akin tamati kemej iTajtsin, porin no  kintasojta uan kinyekpia ichkamej hasta ‘kitemakak ninemilis uan mikis para ijkon kinmakixtis’ (Juan 10:11, 15). Inemilis Cristo tein kitemakak semi kinpaleuia taltikpakneminij (Mat. 20:28). Tein melauj, Jiova kineki maj “nochi ne ten iuantsin [Jesús] takuautamatiske, [...] ma amo ixpoliuikan. Ta, ma kipiakan ne yek nemilis nachipa” (Juan 3:16).

5, 6. 1) ¿Akoni kinixtalia Jesús maj kinyekpiakan iichkauan? 2) ¿Toni moneki kichiuaskej ichkamej uan ijkon uelis kiseliskej nepaleuil tein kitemakaj ichkatajpianij akin Jesús kinixtalia? 3) ¿Toni okachi moneki techolinis maj tikintakamatikan tayekananij?

⁵ ¿Keniuj ichkamej kinextiaj ke kiseliaj Jesucristo kemej ininTajpixkauj? Yejua kijtoj: “Notaneltokakauan keme yeskia noichkauan uan yejuan kuali nechtenixmatij ya; uan nejua no nikinixmati. Ika ya nojon yejuan nechtoktiliaj” (Juan 10:27). Se kikakis itajtol Kuali Tajpixkej kijtosneki se kitojtokas itaixyekanalis itech nochi, tein no ompa moajsi se kintakamatis tokniuan ichkatajpianij akin kinixtalia. Jesús kinextij ke itatitaniluan uan imomachtijkauan monekia kisentokaskej kichiuaskej tekit tein yejua kipeualtij. Monekia kinmachtiskej uan kintamakaskej “iichkauan” (Mat. 28:20; xikonixtajtolti Juan 21:15-17). Keman kimoyaujkej kuali tanauatilmej uan imomachtijkauan momiakilijkej, Jesús kiitak maj moajsinij tokniuan ichkatajpianij akin kipiaj kuali taixejekolis akin kinyekpiaskiaj tokniuan tein monechikouayaj (Efes. 4:11, 12).

⁶ Itech yekinika siglo, tatitanil Pablo kiniluij tayekananij itech nechikol tein moajsia Éfeso ke yektikatsin espíritu kinixtalij maj ‘kinyekyekantiyakan nochi in taneltokani tokniuan’ (Hech. 20:28). No ijkon axkan uelis moijtos ke tayekananij kinixtaliaj ika itaixyekanalis espíritu porin achto kiitaj ox kichiujtokej kemej tajtani Biblia tein moijkuiloj ika iespíritu Jiova. Yejua ika, keman tikintakamatij tiknextiaj ke tikinpoujkaitaj okachi uejueyi Ichkatajpianij, Jiova uan Jesús (Luc. 10:16). Yejua nejin okachi moneki techolinis maj timokauakan maj techyekanakan tokniuan tayekananij. Sayoj ke moajsi okseki taman keyej moneki tikchiuaskej.

7. ¿Keniuj tayekananij mitsonpaleuiaj xikonpia se kuali uikalis iuan Jiova?

⁷ Keman tayekananij kinyolchikauaj uan kinyekanaj tokniuan, nochipa kichiuaj ika Biblia. Ijkuak kitemakaj nejon taixyekanalis, amo kitemouaj kiniluiskej keniuj moneki nemiskej (2 Cor. 1:24). Ta kinnextiliaj tayolmajxitilis itech Biblia tein kinpaleuis maj kuali taixpejpenakan uan maj amo xexeliujtokan itech nechikol ta maj onka yolseuilis (1 Cor. 14:33, 40). Tayekananij “ki[n]yekpixtinemij” tokniuan. Nejin kinextia ke kinekij maj nochin kipiakan se kuali uikalis iuan Jiova. Yejua ika, niman kipaleuiskej aksa komo kiitaj ke yajtok itech se amo kuali ojti oso “uetstiuetsik tech in tajtakol” (Gál. 6:1, 2; Jud. 22). ¿Melauj ke yejua nejin seki taman tein techolinia maj ‘tikintakamatiyakan totayekankauan’? (Xikonixtajtolti Hebreos 13:17.)

8. ¿Keniuj tayekananij kinyekpiaj iichkauan Dios?

⁸ Tatitanil Pablo akin no katka se ichkatajpixkej iixpan Dios, kinijkuilouilij tokniuan akin nemiaj Colosas: “Ximoyekpiakan [...] ma amo aken namechkajkayaua ika tamachilis [...] uan [...] ika ne tajtolteuilis ten amo teyi ika namechpaleuis. Porin ne takajkayauani amo motachikauilijtinemij tech Cristo. Ta, [...] sayo tech miak tataman taneltokalis den uejkaukayome” (Col. 2:8). Nejin tanejmachtilis kinextia okse taman keyej moneki tikakiskej tayolmajxitilis tein tayekananij techmakaj ika Biblia. Yejuan kinyekpiaj ichkamej keman kinnejmachtiaj ika tein uelis kinxelos iuan Dios. Pedro tanejmachtij ke moajsiskiaj “tanauatiani ten takajkayauani” uan “tamachtiani takajkayauani” akin kitemoskiaj ‘kinyolkuepaskej in tokniuan taneltokani ten ayamo semi yolmajsitinemij tech nintakuautamatilis’ porin  kinekij maj uetsikan itech tajtakol (2 Ped. 2:1, 14). Axkan tayekananij no ijkon moneki tanejmachtiskej keman kinamikis. Yejuan kipiaj kuali taixejekolis, yejua ika kimatij tein panoua itech nemilis. Uan no, achto ke kinixtaliskiaj kemej tayekananij, kinextijkej ke kuali kiajsikamatijya Biblia uan kuali ueliskiajya tamachtiskej ika tajtoltsin tein melauak (1 Tim. 3:2; Tito 1:9). Kemej kipiaj kuali taixejekolis uan tamatilis tein kitemaka Biblia, kinpaleuia maj uelikan kinixyekanakan ichkamej kemej moneki.

9. ¿Keniuj kinyekanaj uan kintamakaj tokniuan akin mosentiliaj axkan?

⁹ Jiova ika inechikol kinmaka tel miak takual ika iTajtol nochin itekitikauan akin moajsij noyampa taltikpak. Itech toamaixuan motemaka miak tayolmajxitilis tein mokixtia itech Biblia. Uan no, kemansa inechikol Jiova kitemaka tanauatilmej itechkopa tayekananij tein kiseliaj ika amat oso inintechkopa tokniuan takalpanouanij. Ika nochi nejin, kinixyekanaj uan kintamakaj nochin ichkamej.

10. ¿Toni moneki kichiuaskej ichkatajpianij keman semej ichkamej mouejkatilia?

¹⁰ Tayekananij moneki kinpaleuiskej maj amo moijtakokan akin pouij itech nechikol uan kiitaj maj kuali moajsikan iixpan Dios, uan okachiok kitemouaj kipaleuiskej akin amo chikauak itakuaujtamatilis oso kichiuani tajtakolmej (xikonixtajtolti Santiago 5:14, 15). Sekin ichkamej kisenkauanij nechikol uan amo kichiuajok itekiyo Dios. ¿Melauj ke tayekankej tetasojtakej kichiuaskia  nochi tein kipaleuis maj kinajsi nejon ichkamej uan kinyolchikauas maj mokepakan itech nechikol? Jesús kijtoj: “Dios ten yetika ne eluiyaktsinko amo no kimonekiltia de ke ma xiixpoliuikan senme de namejuan ten nanpouij iuantsinko” (Mat. 18:12-14).

11. ¿Keyej sekin tokniuan kinouijmaka kintakamatiskej tayekananij?

¹¹ Ichkatajpianij Jiova uan Jesús amo kipiaj nepololmej, sayoj ke amo ijkon tokniuan ichkatajpianij akin kinixtalijtokej maj kinyekpiakan nechikolmej. Yejua ika, sekin tokniuan xa kinouijmaka kintakamatiskej. Xa kinemiliaj: “Yejuan no tajtakouanij kemej nejua. ¿Keyej nechiluiaj toni moneki nikchiuas?”. Semi melauak ke tayekananij no tajtakouanij. Sayoj ke moneki maj amo sayoj tikitakan ininnepololuan uan tein kinouijmaka kichiuaskej.

12, 13. 1) ¿Toni uelis tikijtoskej ika ininnepololuan seki takamej akin Jiova kinixtalijka? 2) ¿Keyej itech Biblia moijkuiloj ininnepololuan seki takamej akin Jiova kinkuik?

¹² Biblia kiyekijtoua nepololmej tein kipiakej sekin taltikpakneminij akin Jiova kinkuik maj kiixyekanakan ixolal ne uejkauj. Kemej neskayot, kiixtalij David kemej tekiuaj uan ijkon kiixyekanaskia Israel. Sayoj ke satepan tajtakoj, ta yejua auilnemik uan temiktij (2 Sam. 12:7-9). Maj no ika titanemilikan tatitanil Pedro. Maski kiselijka uejueyi tekit itech inechikol Dios, kipiak uejueyi nepololmej (Mat. 16:18, 19; Juan 13:38; 18:27; Gál. 2:11-14). Tein melauj, ijkuak tajtakojkej Adán uan Eva uan hasta axkan, sayoj Jesús amo kipiak tajtakol. Tejuan tinochin titajtakouanij.

¹³ ¿Keyej Jiova kichiuak maj moijkuilo itech Biblia ininnepololuan takamej akin kinixtalij maj taixyekanakan? Se taman, porin ijkon kinextia ke ueli kinkui takamej tajtakouanij maj kiixyekanakan ixolal. Tein melauj, nochipa ijkon kichiuani. Yejua ika, amo monekiskia tiknemiliskej ke porin kipiaj nepololmej akin taixyekanaj uelis tikinijijtoskej oso amo tikpoujkaitaskej tanauatil tein kipiaj kemej tayekananij. Jiova kichia maj tikinpoujkaitakan uan maj tikintakamatikan (xikonixtajtolti Éxodo 16:2, 8).

14, 15. ¿Toni techmachtia keman tikitaj keniuj Jiova ne uejkauj kimakak tanauatilmej ixolal?

¹⁴ Motelneki maj tikintakamatikan akin axkan techixyekanaj. Maj tiknemilikan keniuj ne uejkauj Jiova kimatiltij ixolal toni kichiuaskia keman moajsia itech uejueyi ouijkayomej. Keman israelitas kiskej Egipto, Jiova kiniluij itechkopa Moisés uan Aarón toni monekia kichiuaskej. Nejon youak monekia kipiaskej se takualis tein motelnekia uan kikuijkuiltiskej nochi ininkaltenkouj tepitsin iesyo ichkat tein kimiktiskiaj, tein kinpaleuiskia maj momakixtianij keman panoskia majtaktika chauis. Amo mokakik ne iluikak maj kinualiluianij toni kichiuaskej. Ta monekia kinkakiskej tayekananij itech nochi Israel akin Moisés kiniluijka toni monekia kichiuaskej (Éx. 12:1-7, 21-23, 29). Itech nejon tonalmej, Moisés uan tayekananij kitematiltijkej itanauatiluan Dios. Uan axkan tokniuan tayekananij no kichiuaj nejon tein motelneki.

¹⁵ Xa tikelnamikij miakkan itech Biblia kampa ixnesi ke Jiova kintitanik ángeles oso taltikpakneminij maj kinmakatij itekitikauan tanauatilmej tein kinpaleuiskia maj momakixtikan. Keman ijkon panok, Dios kiitak ke ueliskia kinmakas tepitsin itanauatil. Tanauatianij tajtojkej ika itokay Jiova uan kiiluijkej xolal toni monekia kichiuas tein kipaleuiskia maj momakixtikan. ¿Xe Jiova amo no ijkon uelis kichiuas keman ejkos Armagedón? Sayoj  ke tayekananij akin axkan kinmakaj tatiochiualis maj tajtokan itokaykopa Jiova oso inechikol, moneki motelyekpiaskej maj nochipa kitekitiltikan tanauatil kemej moneki.

16. ¿Toni “tajtol” moneki kuali tikakiskej?

¹⁶ Ixolal Jiova mochiua sayoj ‘se sen oloch yetolis de ichkamej uan [...] sayo se tapixke’ Jesucristo (Juan 10:16). Jesús kinyekiluij imomachtijkauan ke yetoskia iniuan “nochi tonalmej hasta itamiampa nochi tein mochiujtok itech taltikpak” (Mat. 28:20, TNM). ¿Keniuj kichiujtok kemej motenkauak? Kemej Tekiuaj ompa iluikak, senkis kipia chikaualis itech nochi tachiualismej tein kiuikas maj ixpoliui tein amo kuali nikan taltikpak kampa taixyekantok Satanás. Komo tiknekij tipoujtoskej iniuan iichkauan Dios uan tikselijtoskej inepaleuil, moneki tikakiskej “se tajtol” toikampa tein techiluia ojti kampa moneki tinejnemiskej. Nejon “tajtol” no kijtosneki tein yektikatsin espíritu techiluia itech amatajkuilol Biblia uan tein kijtoua Jiova uan Jesús itechkopa tayekananij akin kinixtaliaj (xikonixtajtolti Isaías 30:21 uan Apocalipsis 3:22).

17, 18. 1) ¿Toni tein tamouilil uelis kinpanos ichkamej, sayoj ke toni uelis tikyekneltokaskej? 2) ¿Toni tikitaskej itech okse tamachtilis?

¹⁷ Tatitanil Pedro kijtoj ke Satanás “tsajtsitinemi [...] keme yeskia se kuoutajtekuani ten kitemo[j]tinemi akoni kixi[j]xikos” (1 Ped. 5:8). Ijkon kemej se tekuani tein mayana, Satanás ichtakayetok, kinpijpixtok ichkamej uan sayoj kichixtok kiitas kemanian uelis kitokateuas tein amo motachilia oso poliujtok. Yejua nejin okse taman tein moneki techolinis maj timoajsikan iniuan ichkamej uan iuan Jiova akin ‘techyekpixtinemi uan techyekantinemi’ (1 Ped. 2:25). Apocalipsis 7:17 techyekiluia ke akin makisaskej ijkuak ualas okachi ueyi tajyouilis, Jesús, akin “tamati keme ichkatsin, [...] kinixpanoltijtiyas nochi itekitikauan uan kinyekanas ma tayitij atsin ten kitemaka in yek nemilis [...]. Uan Totajtsin Dios kinelkaualtis de ninchokilis uan kinixuajuatsas”. ¿Melauj ke amo onkak okse okachi kuali netenkaualis kemej nejin?

¹⁸ Axkan ke tikitakejya ke motelneki tekit tein kichiuaj tokniuan tayekananij kemej ichkatajpianij, motelneki maj tikchiuakan nejin netajtanil: “¿Keniuj nejin takamej akin kinixtaliaj uelis kiyekitaskej ox kinyekpixtokej iichkauan Jesús kemej moneki?”. Itech okse tamachtilis tikitaskej tanankilil.