1. ¿Toni kikauaj miakej taltikpakneminij uan keyej?

TALTIKPAKNEMINIJ kikauaj seki taman porin kinekij kichiuaskej tein kiitaj ke okachi moneki. Tetatmej kikuij inintonaluan, tomin uan chikaualis porin kinekij maj ininkoneuan kipiakan tein kuali. Miakej telpochmej uan ichpochmej akin kinekij motatanitiuij itech Juegos Olímpicos mojmostaj miak horas momachtijtokej keniuj kuali kinkisas maski amo yaskej moixpetanitiuij iniuan inintasojikniuan. Jesús no ijkon kikauak seki taman porin kinekia kichiuas tein kiitaya ke okachi monekia. Ueliskia moteltomintis oso monamiktis uan kinpias konemej, sayoj ke kinekik kitayekanaltis iTekiuajyo Dios (Mat. 4:17; Luc. 9:58). Imomachtijkauan no kikaujkej seki taman porin no kinekiaj kichiuaskej nejon. Kemej kiitayaj ke motelnekia, ika miak pakilis kikaujkej seki taman uan ijkon ueliskiaj okachi kitayekanaltiskej iTekiuajyo Dios (Mat. 4:18-22; 19:27). ¿Uan tejuan? Semi kuali maj tinochin timotajtanikan: “¿Toni okachi niktayekanaltia itech nonemilis?”.

2. 1) ¿Toni seki taman moneki kikauaskej nochin akin yekmelauj kichiuaj kemej Cristo? 2) ¿Toni okseki taman no uelis kichiuaskej sekin?

² Moajsi seki taman tein nochin akin yekmelauj kichiuaj kemej Cristo moneki kikauaskej komo kinekij kipiaskej se kuali uikalis iuan Jiova uan kisentokaskej kipiaskej. Kemej neskayot, moneki kikauaskej seki taman uan ijkon kipiaskej tiempo uan chikaualis tein kinpaleuis maj kichiuakan tein motelneki, kemej motataujtiskej iuan Dios, kiixtajtoltiskej Biblia, taueyichiuaskej kemej kalyetouanij, yaskej nechikolmej uan tanojnotsaskej (Jos. 1:8; Mat. 28:19, 20; Heb. 10:24, 25). * Ika chikaujkayot tein tikchiuaj uan itatiochiualis Dios, tanojnotsalis kisentoka moskaltia uan tel miakej  kisentokaj youij itech “tepet kampa yetok ichan Jiova” (Is. 2:2). Uan no, sekin kikauanij okseki taman uan ijkon ueli tekititij Betel, tapaleuiaj maj mochijchiua Kalmej kampa tiMosentiliaj oso kampa mochiuaj Uejueyi Nechikolmej, kichiuaj tekit tein tapaleuia maj onka uejueyi nechikolmej oso tapaleuiaj kampa mochiua se tetsauit. Maski nejin amo se taman tein Jiova techtajtania maj tikchiuakan uan ijkon tikpiaskej nemilis nochipaya, kemaj moneki maj se kichiua porin ijkon tiktayekanaltiaj iTekiuajyo Dios.

3. 1) ¿Toni techualkuilia ijkuak tikauaj seki taman porin tiknekij tiktayekanaltiskej iTekiuajyo Dios? 2) ¿Katiyejua netajtanilmej moneki tiknankiliskej?

³ Axkan okachi moneki maj tiktayekanaltikan iTekiuajyo Dios. Uan yekmelauj techyolpaktia tikitaskej ke miakej ika nochi ininyolo kikaujtokej seki taman uan ijkon uelis kitekitiliskej Jiova (xikonixtajtolti Salmo 54:6). Komo no ijkon tikchiuaj, okachi tiyolpakiskej itech tonemilis itech nejin tonalmej keman tikchiaj maj ejko iTekiuajyo Dios (Deut. 16:15; Hech. 20:35). Sayoj ke tisejsemej moneki timotajtaniskej: “¿Ueliskia nikauas okseki taman uan ijkon uelis okachi niktayekanaltis iTekiuajyo Dios? ¿Keniuj nikuitok notiempo, notomin, nochikaualis uan tein ueli nikchiua? ¿Toni moneki amo niksenkauas keman niktayekanaltis iTekiuajyo Dios?”. Maj tikitakan toni techmachtia keman ne uejkauj kitemakayaj netetayokolilmej tein kisaya itech ininyolo. Nejin techpaleuis maj tiktekitilikan Jiova ika yolpakilis.

4. ¿Toni kiseliayaj israelitas keman kitemakayaj netetayokolilmej?

⁴ Ne uejkauj, israelitas monekia kitemakaskej netetayokolilmej uan ijkon Jiova kintapojpoluiaya inintajtakoluan uan kinmakaya itatiochiualis. Seki monekia kitemakaskej uan okseki kisaya itech ininyolo kitemakaskej (Lev. 23:37, 38). Itech netetayokolilmej tachichinolmej kampa tapial ajsitok kimakayaj Dios, ueliskia kisas itech ininyolo kitemakaskej kemej netetayokolil iixpan Jiova. Se tonal tein motelita ke israelitas kitemakakej nejon netetayokolilmej yejua keman kitemaktijkej templo itech itonaluan Salomón (2 Crón. 7:4-6).

5. ¿Toni kijtoj Jiova ke ueliskia kitemakaskej akin moajsiskiaj itech tatasojtilis?

⁵ Jiova kiajsikamatia ke amo nochin ueliskiaj kitemakaskej seki taman tapialmej, yejua ika kiniluij israelitas maj kitemakanij kemej ueliskiaj. Kinnauatiaya maj kitemakanij tapialmej  uan maj kitoyauanij ininesyo porin nejon netetayokolilmej kinextiaya “tatiochiualisme de Dios” tein ualaskia satepan itechkopa Jesús (Heb. 10:1-4). Sayoj ke Jiova motemakaya kipatas tein ixyetoya uan teajsikamatia. Kemej neskayot, komo se israelita amo uelia kitemakaya se ichkat oso se kuakuej, yejuatsin kijtouaya ke ueliskia kitemakas seki tórtolas. Ijkon, hasta akin kipanotoyaj tatasojtilis ueliskia kipiaskej yolpakilis tein kiualkuia keman kitemakayaj netetayokolilmej (Lev. 1:3, 10, 14; 5:7). Sayoj ke maski tataman katkaj tapialmej tein kitemakayaj, Jiova kintajtaniaya maj kichiuanij ome taman akin kitemakayaj netetayokolilmej tein kisaya itech ininyolo.

6. ¿Toni ome taman Jiova kitajtaniaya maj kichiua akin kitemakaya netetayokolilmej tein kisaya itech iyolo, uan keyej motelnekia kichiuas nejon?

⁶ Yekinika, israelita monekia kitemakas tein okachi kuali. Jiova kiseliaya kemej netetayokolilmej sayoj tapialmej tein amo mokokouayaj (Lev. 22:18-20). Yejua ika, komo se tapial amo kuali moajsia, amo kiseliaya nejon netetayokolil. Ojpatika, akin kitemakaya netetayokolil monekia moajsis chipauak kemej kijtouaya Tanauatil. Komo amo moajsia chipauak, achto monekia kitemakas se netetayokolil porin tajtakoj oso se netetayokolil porin kipiak nepolol uan ijkon ueliskia oksepa kipias itatiochiualis Dios (Lev. 5:5, 6, 15). Monekia amo kiauilmatiskej nejon, porin Tanauatil kijtouaya ke monekia mikis akin amo moajsia chipauak uan kikuaya se netetayokolil tein kisaya itech iyolo kitemakas (Lev. 7:20, 21). Sayoj ke komo moajsia chipauak iixpan Dios uan inetetayokolil kuali katka, ueliskia yolpakis uan amo kikuejmoloskia itanemilil (xikonixtajtolti 1 Crónicas 29:9).

7, 8. 1) ¿Keniuj momachiliaj miakej tokniuan keman kikauaj seki taman uan ijkon kitayekanaltiaj iTekiuajyo Dios? 2) ¿Toni uelis kimakaskej Jiova nochin akin kichiuaj kemej Cristo?

⁷ Itech totonaluan, miakej tokniuan ika nochi ininyolo kitekitiliaj Jiova uan ijkon semi kiyolpaktiaj. Uan yejuan no tel kuali momachiliaj keman kinpaleuiaj oksekin. Se tokniuj takat akin tapaleuia maj mochijchiua Kalmej kampa tiMosentiliaj uan tapaleuiti kampa mochiuaj tetsaujmej, kijtoua ke semi kiouijmaka kimelauas yolpakilis tein kiualkuilia. Yejua kijtoua: “Keman nikita ke tokniuan tel yolpakij uan motasojkamatij porin kipiajya se yankuik kalnechikol oso porin kiselijkej nepaleuil satepan ke panok se tetsauit, nikmati ke amo nenkaj chikaujkayot tein mochiuak”.

 ⁸ Itech inechikol Jiova itech totonaluan nochipa moitani keniuj motayekanaltis iTekiuajyo. Itech xiuit 1904, tokniuj Charles T. Russell kijkuiloj nejin: “Sejse akin kichiua kemej Cristo moneki kiajsikamatis ke toTekotsin kemej yeskia kikauak imako itiempo, tein ueli kichiua, itomin uan okseki tamanok, uan maj kitekitilti nejon nochi tein uelis uan ijkon kiueyitalis toTekotsin”. Kemaj, kiualkui uejueyi tatiochiualismej se kitayekanaltis iTekiuajyo Jiova, maski monekis se kikauas seki taman (2 Sam. 24:21-24). Yejua ika, tisejsemej moneki timotajtaniskej: “¿Uelis okachi kuali niktekitiltis tein nikpia?”.

9. ¿Toni techmachtia itajtoluan Jesús tein moajsi itech Lucas 10:2-4?

⁹ Totiempo. Moneki miak tiempo uan chikaualis uan ijkon ueli motajtolkepa uan mokixtia amatajkuilolmej, mochijchiua kalmej kampa titaueyichiuaj, moyekana tekit tein tapaleuia maj onka uejueyi nechikolmej, motapaleuia kampa mochiua tetsauit uan okseki tekit tein motelneki. Sayoj ke tonal kipia sayoj 24 horas. ¿Toni uelis tikchiuaskej uan ijkon okachi kuali tikuiskej totiempo? Maj tikitakan tein Jesús kiniluij imomachtijkauan keman kintitanik maj tanojnotsatij: “Amo aken xikinmatajpalotiyakan tech ojti” (Luc. 10:2-4). ¿Toni kinekia kiteajsikamatiltis? Se akin kitemoua tein kijtoua Biblia, kimelaua: “Ne uejkauj itech nejon altepemej, keman motajpalouayaj amo sayoj tepitsin moixpilouayaj oso momamelauayaj kemej tejuan tikixmatij, ta miakpa monauayaj uan motankuaketsayaj uan hasta moixtokayaj talpan. Semi mouejkauayaj keman kichiuayaj nejin”. Jesús amo kiniluijtoya imomachtijkauan maj amo tetajpalouanij, ta kinekia kinpaleuis maj kiitanij ke amo miak tonalmej kipiayaj uan monekia kuali kitekitiltiskej uan ijkon kichiuaskiaj tein yekmelauj moneki (Efes. 5:16). ¿No ijkon uelis tikchiuaskej kemej techmachtia itajtoluan Jesús uan ijkon okachi tiktayekanaltiskej iTekiuajyo Dios?

10, 11. 1) ¿Keniuj motekitiltia tomin tein motemaka maj ika mochiua tekit tein mouika iuan iTekiuajyo Dios? 2) ¿Keniuj uelis techpaleuis tayolmajxitilis tein moajsi itech 1 Corintios 16:1, 2?

¹⁰ Totomin. Moneki miak tomin tein ika mochiuas tekit tein mouika iuan iTekiuajyo Dios. Xijxiujtika mokui miak millones de dólares tein ika moixtaua tein moneki ijkuak kichiuaj tekit tokniuan takalpanouanij, precursores especiales uan misioneros. Uan no, itech xiuit 1999 uan satepan, mochijchiuakya panoua 24,500 Kalmej kampa tiMosentiliaj itech altepemej kampa semi tatasojti, uan monekijok 6,400. Uan no, sejse metstika mokixtiaj kemej 100 millones amaixmej Tanejmachtijkej uan ¡Despertad! Nochi nejin mochiua ika tomin tein titemakaj ika nochi toyolo.

¹¹ Tatitanil Pablo kitemakak se tayolmajxitilis tein uelis techpaleuis keman titemakaskej totomin (xikonixtajtolti 1 Corintios 16:1, 2). Ika ichikaualis Dios, Pablo kinyolchikauak tokniuan akin nemiaj Corinto maj amo mochianij hasta itamian sejse semana uan ijkuak kiitaskiaj toni mokauaya, ta maj kiixtalianij kanachi ueliskiaj kitemakaskej keman peuaskia semana. No ijkon, axkan achto tikixtaliaj kanachi titemakaskej ijkon kemej tiueliskej (Luc. 21:1-4; Hech. 4:32-35). Tikyekmatij ke Jiova kitasojkamati maj tikuelitakan titemakaskej.

12, 13. 1) ¿Toni uelis techtsakuilis maj amo okachi tikuikan tochikaualis oso tein tiuelij tikchiuaj tein ika tiktayekanaltiskej iTekiuajyo Dios? 2) ¿Keniuj uelis techpaleuis Jiova?

¹² Tochikaualis uan tein tiuelij tikchiuaj. Jiova techpaleuia keman tikuij tochikaualis uan tein tiuelij tikchiuaj uan ijkon tiktayekanaltiaj iTekiuajyo Dios. Yejuatsin motenkaua ke techmakas chikaualis komo tikmachiliaj ke techpoloua (Is. 40:29-31). ¿Uan komo tikmachiliaj ke amo tiueliskej oso ke oksekin okachi kuali tekit kichiuaskiaj? Maj tikelnamikikan ke Jiova uelis kichiuas maj okachi kuali tiuelikan teisa tein tikmatij, ijkon kemej kichiuak iuan Bezalel uan Oholiab (Éx. 31:1-6; xikonita taixkopin ipeujyan tamachtilis).

 ¹³ ToDios techyolchikaua maj titemakakan tein okachi kuali uan maj amo teyi tiktsakuiltilikan (Prov. 3:27). Keman oksepa kichijchiujtoyaj templo, Jiova kiniluij judíos akin moajsiaj Jerusalén maj ‘kitalianij ininyolo itech ininojuan’, tein kijtosnekia ke monekia kinemiliskej keniuj tapaleuijtoyaj maj mochiua nejon tekit (Ageo 1:2-5). Yejuan kikaujkaj maj kintapololtiani okseki taman uan amo kiitayaj toni okachi tayekantoya. Tejuan no semi kuali maj timotajtanikan: “¿Niktayekanaltia itanejnekilis Jiova? ¿Uelis kemej yeskia niktalis noyolo itech noojuan uan ijkon okachi uelis niktayekanaltis iTekiuajyo Dios itech nejin itamian tonalmej?”.

14, 15. 1) ¿Keniuj techyolchikaua neskayot tein kikauaj miakej tokniuan akin kipanouaj tatasojtilis? 2) ¿Toni moneki tikixtaliskej tikchiuaskej?

¹⁴ Miakej tokniuan nemij itech altepemej kampa semi onkak kuejmolmej uan tatasojtilis, uan inechikol Dios kampa tipouij kitemoua kinpaleuis (2 Cor. 8:14). Maski ijkon, seki nejin tokniuan kiitaj se tatiochiualis maj tapaleuikan ika tomin. ¡Jiova semi kiyolpaktia kiitas ke ininyolo nejon tokniuan kinolinia maj kitemakakan maski amo miak! (2 Cor. 9:7.)

¹⁵ Ompa África, itech se altepet kampa semi tatasojti, seki tokniuan kixelouaj sentayoual tal kampa tatokaj uan kiixtaliaj kinamakaskej tatok uan kitemakaskej tomin tein ika mochiuas itekiyo Dios. Ompa no motelnekia maj mochijchiua se yankuik kalnechikol. Tokniuan kinekiaj tapaleuiskej, sayoj ke moixtalij motekitis keman monekia tatokaskej. ¿Kintsakuilij nejon? Amo. Tonayan tapaleuiayaj kampa mochijchiujtoya kali uan youak tekitiaj inintalpan. ¡Semi kiuelitayaj tapaleuiskej! Nejin techelnamiktia tokniuan itech yekinika siglo akin nemiaj Macedonia. “Maski semi pobres” katkaj, kitataujtijkej Pablo maj kinkauani maj no kinpaleuianij oksekin tokniuan akin kipanotoyaj tatasojtilis (2 Cor. 8:1-4.) No ijkon axkan, maj tisejsemej titemakakan “ijkon kemej [tikselianij] itatiochiualis Jiova” (xikonixtajtolti Deuteronomio 16:17).

16. ¿Toni uelis tikchiuaskej uan ijkon Jiova kiselis netetayokolilmej tein tikmakaskej?

¹⁶ Sayoj ke moneki tikelnamikiskej se taman. Ijkon kemej israelitas, moneki tikyekitaskej maj Jiova kiyolpakti tonetetayokoliluan tein kisa itech toyolo titemakaskej. Moneki tikpiaskej kuali taixejekolis uan ijkon amo tiksenkauaskej tein okachi moneki, kemej tikinyekpiaskej tochankauan uan tikueyichiuaskej Dios. Komo tikuij totonaluan uan tein tikpiaj uan tikinpaleuiaj oksekin, moneki maj nejon amo techtsakuili maj tikinpaleuikan tochankauan maj motokikan iuan Dios nion maj amo tikinixpanoltikan. Komo tikchiuaskiaj nejon, tein melauj titemakatoskiaj tein amo tikpiaj (xikonixtajtolti 2 Corintios 8:12). No moneki maj tiksentokakan tikchikauakan tokuali uikalis iuan Dios (1 Cor. 9:26, 27). Komo tikchiuaj kemej tayolmajxitia Biblia, tiyolpakiskej uan kuali timomachiliskej keman titemakaskej netetayokolilmej uan Jiova ‘kiueyipouas totapaleuilis’.

17, 18. 1) ¿Keniuj tikinitaj tokniuan akin kikauaj seki taman uan ijkon kitayekanaltiaj iTekiuajyo Dios? 2) ¿Toni moneki tiknemiliskej tinochin?

¹⁷ Itech nochi taltikpak moajsij tokniuan akin senkis kitayekanaltiaj iTekiuajyo Dios maski moneki kikauaskej seki taman. Uelis tikijtoskej ke yejuan mochiuaj “kemej se kualtsin nemaktil” kemej ijkuak kitoyauayaj vino itech altar (Filip. 2:17). ¡Yejua ika semi tikintasojtaj! No ijkon tiktasojkamatij ika nochi toyolo tein kitemakaj uan seki taman tein kikauaj ininnamik uan ininkoneuan tokniuan takamej akin kiixyekanaj tekit tein mouika iuan iTekiuajyo Dios.

¹⁸ Onkak miak tekit tein mouika iuan iTekiuajyo Dios. Maj tiktataujtikan Jiova uan maj tiknemilikan keniuj uelis okachi titapaleuiskej. Tikyekmatij ke uelis tikseliskej uejueyi tatiochiualismej axkan uan okachi uejueyi “tech ne tonal ten uitsa ok” (Mar. 10:28-30).