1, 2. 1) ¿Toni tein kichiuak se tokniuj kinextia ke motelneki maj kuali tiknemilikan netajtanilmej tein tikchiuaskej? (Xikonita taixkopin ipeujyan tamachtilis.) 2) ¿Keyej moneki amo tikmouiliskej ika titajtoskej tamachtilismej tein ouijkej?

SEKI xiujmej achto, se tokniuj siuat tajtojtoya ika Biblia iuan itakauj akin amo katka itaixpantijkauj Jiova. Yejua pouik itech se taneltokalis kampa kijtouaj kitojtokaj Cristo, uan keman tajtojtoyaj kijtoj ke kineltokaya Trinidad. Tokniuj siuat kiitak ke itakauj xa amo yekmelauj kiajsikamatia toni nejon tamachtilis, yejua ika kuali kinemilij keniuj kichiuilis se netajtanil: “Komo ijkon, ¿tiknemilia ke Dios yejua Dios, ke Jesús yejua Dios uan yektikatsin espíritu yejua Dios, sayoj ke amo onkak eyi dioses ta sayoj se?”. Nejon netajtanil semi kimoujkakakik uan kinankilij: “¡Amo, nejua amo nikneltoka nejon!”. Ijkon peuak tajtouaj ika yolpakilis akoni yekmelauj Dios.

² Nejin tein kichiuak tokniuj kinextia ke motelneki maj kuali tiknemilikan netajtanilmej tein tikchiuaskej uan maj kinamiki. No techmachtia se taman tein motelneki: maj amo tikmouilikan ika titajtoskej tamachtilismej tein ouijkej, kemej Trinidad, ox nemi se Tachijchiujkej oso miktan. Komo titakuaujtamatij iuan Jiova uan itech tamachtilis tein techmaka, uelis titemakaskej se tanankilil  tein tetaneltoktia uan tein ajsis itech ininyolo taltikpakneminij (Col. 4:6). Maj tikitakan keniuj tanankilianij seki tokniuan akin kuali tanojnotsaj keman ika tajtouaj nejon tamachtilismej tein ouijkej. Maj tikitakan keniuj 1) kichiuaj netajtanilmej tein kiolinia taltikpaknenkej maj kijto tein kinemilia, 2) kintanemililtiaj ika tein kijtoua Biblia uan 3) kikuij neskayomej tein kichiua maj moajsikamati tanemilil.

3, 4. ¿Keyej motelneki tikchiuaskej netajtanilmej tein techpaleuis maj tikmatikan toni kineltoka taltikpaknenkej? Xikonijto se neskayot.

³ Netajtanilmej uelis techpaleuiskej maj tikmatikan toni kineltoka taltikpaknenkej. ¿Keyej motelneki nejon? Porin Proverbios 18:13 kijtoua ke “keman aksa tanankilia achto ke kitamikakis teisa, kinextia ke amo tamati uan mopinaujkatalia”. Yejua ika, achto moneki tiktemoskej tikmatiskej toni yekmelauj kineltoka akin tiknojnotsaj. Komo amo, xa titeluejkauaskej ompa tiknextilijtoskej ke amo kuali yetok se tamachtilis tein yejua ipa amo kineltoka (1 Cor. 9:26).

⁴ Maj tiknemilikan ke ika titajtojtokej miktan iuan aksa. Amo nochin kineltokaj ke kijtosneki kansaika kampa nochipa kintajyouiltijtokej ika tit. Miakej tataman tanemilil kipiaj. Yejua ika, uelis tikiluiskej teisa kemej nejin: “Kemej taltikpakneminij tataman kinemiliaj ke kijtosneki miktan, ¿uelis nimitsontajtanis toni tikonneltoka tejuatsin?”. Keman tikakiskej itanankilil, okachi amo techouijmakas tikpaleuiskej maj kiajsikamati tein Biblia tamachtia ika nejon.

5. ¿Keniuj netajtanilmej uelis techpaleuiskej maj tikmatikan keyej taltikpaknenkej kineltoka teisa?

⁵ Netajtanilmej tein kuali tiknemiliskej no techpaleuis maj tikmatikan keyej se taltikpaknenkej kineltoka teisa. Kemej neskayot, komo itech tanojnotsalis tikajsij aksa akin techiluia ke amo kineltoka ke nemi Dios, ¿toni ueliskia tiknemiliskej? Xa semi ijsiujka tiknemiliskej ke kineltoka nejon porin kikaua maj kiyekana seki tamachtilis tein motelixmati axkan, kemej tein kinextia ke nemilis iselti peuak (Sal. 10:4). Sayoj ke sekin amo takuaujtamatijok iuan Dios porin semi tajyouianij oso kinitanij oksekin ke tajyouiaj. Kinouijmaka kineltokaskej ke se Dios tetasojtakej kikaua maj onka nochi nejon tajyouilis. Yejua ika, komo aksa techiluia ke amo kineltoka Dios, uelis tiktajtaniskej: “¿Nochipa ijkon tikonnemiliani?”. Komo technankilia ke amo, uelis tiktajtaniskej ox moajsi teisa tein kichiuak maj omeyoloua ke nemi Dios. Itanankilil techpaleuis maj tikmatikan keniuj okachi uelis tikpaleuiskej maj motoki iuan Dios (xikonixtajtolti Proverbios 20:5).

6. ¿Toni moneki tikchiuaskej satepan ke teisa tiktajtaniskej taltikpaknenkej?

⁶ Satepan ke teisa tiktajtaniskej taltikpaknenkej, moneki kuali tikakiskej uan tikajsikamatiskej tein kimachilia. Kemej neskayot, xa techiluis ke kipanok teisa tein tel amo kuali uan nejon kiuikak maj omeyoloua ke nemi se Dios. ¿Toni tikiluiskej? Achto ke tikiluiskej seki taman tein kinextia ke nemi Dios, okachi kuali yeskia maj tikiluikan ke techyolkokoua tein kipanok uan tikiluiskej ke amo kijtosneki ke amo kuali yetok maj se tajtani keyej titajyouiaj (Hab. 1:2, 3). Komo amo tiyolijsiuij uan titeajsikamatij, xa uelis tikchiuaskej maj kineki kimatis okachi. *

7. ¿Toni moneki tikchiuaskej uan ijkon uelis kuali titamachtiskej itech tanojnotsalis?

⁷ Axkan maj tikitakan keniuj tiktanemililtiskej taltikpaknenkej ika tein kijtoua Biblia. Kemej tikmatij, Biblia yejua manamik tein okachi tikuij itech tanojnotsalis. Akin yeski uelis kipaleuis maj “mochiuaki yek  yolmajsitok [...], uan ijkon uelis kichiutiyas miak tataman den kuali tekit” (2 Tim. 3:16, 17). Timochiuaj kuali titamachtianij itech tanojnotsalis, amo porin tikuij miak textos, ta porin kuali tikmelauaj tajkuilolmej tein tikixtajtoltiaj uan ika tiktanemililtiaj taltikpaknenkej (xikonixtajtolti Hechos 17:2, 3). Maj tikitakan eyi neskayomej tein techpaleuis maj tikmatikan keniuj tikchiuaskej.

8, 9. 1) ¿Keniuj uelis tiktanemililtiskej aksa akin kineltoka ke Jesús yejua Dios? 2) ¿Keniuj tikontanemililtiani taltikpakneminij keman ika tiontajtouani nejin tamachtilis?

⁸ Yekinika neskayot. Tikajsij aksa akin kineltoka ke Jesús kipia tanauatil kemej Dios. ¿Ika katiyejua textos uelis tiktanemililtiskej? Uelis tikyoleuaskej maj kiixtajtolti Juan 6:38 kampa ixnesi nejin itajtoluan Jesús: “Niualpantemok de ne eluiyaktsinko amo para nikchiuakiu tensa de nejua notanejnekilis san. Ta, niuala para nikchiutinemis ten Notajtsin Dios kimonekiltia, porin Yejuatsin nechualtitanik”. Satepan ke tikmelauaskej nejin tajkuilol, uelis tikijtoskej nejin tein kitanemililtis: “Komo Jesús yejua Dios, ¿akoni ne iluikak kiualtitanik? Nejon Akin kiualtitanik, ¿amo okachi ueyichiujkej ke Jesús? ¿Melauj ke akin kititanij amo okachi ueyichiujkej ke akin kititanik?”.

⁹ No uelis tikixtajtoltiliskej Filipenses 2:9 kampa tatitanil Pablo kimelauak tein Jiova kichiuak satepan ke Jesús momikilij uan moajokuik. Ompa kijtoua: “Dios kiueyipantalij Cristo ma tayekana inpan nochi tayekanani. Uan no Totajtsin Dios kimouiskatokaytij Cristo ika se tokay ten kachi ueyi chiuke inpan nochi oksekin chiuanime”. Kemej tiknekij tikpaleuiskej taltikpaknenkej maj tanemili ika nejin tajkuilol, uelis tiktajtaniskej: “Komo Jesús katka kemej Dios achto ke momikiliskia uan Dios kimakak satepan okachi ueyi tanauatil, ¿amo kijtosnekiskia nejon ke Jesús okachi ueyichiujkej ke Dios? Sayoj ke ¿keniuj uelis aksa mochiuas okachi ueyichiujkej ke Dios?”. Komo taltikpaknenkej kipoujkaita iTajtol Dios uan yolmelauak, nejon tein ika tiktanemililtiskej xa kiolinis maj kineki okachi momachtis (Hech. 17:11).

10. 1) ¿Keniuj uelis tiktanemililtiskej aksa akin kineltoka miktan? 2) ¿Keniuj tikontanemililtiani taltikpakneminij keman ika tiontajtouani miktan?

¹⁰ Ojpatika neskayot. Se aksa tel taneltokakej kijtoua ke kiouijmaka kineltokas ke akin amo yolkualmej amo tajyouitiuij miktan nochipaya. Xa nejon kinemilia porin kineki maj kintatsakuiltikan akin kichiuanij tein amo kuali. ¿Keniuj uelis tikpaleuiskej? Yekinika, maj tikyekiluikan ke akin amo yolkualmej kemaj kintatsakuiltiskej (2 Tes. 1:9). Keman tikmelauiliskejya nejon, uelis tikyoleuaskej maj kiixtajtolti Génesis 2:16, 17 tein kinextia ke Jiova kiluij Adán ke komo tajtakoskia kitatsakuiltiskia ika mikilis. Satepan uelis tikpaleuiskej maj kiita ke  Dios amo keman kijtoj ke kintatsakuiltiskia miktan, uan tiktajtaniskej: “Komo Adán uan Eva ueliskia yaskej kampa chichinaujtoskiaj nochipaya, ¿keyej Dios amo kinnejmachtij? ¿Melauj ke taixejekol maj kiniluiani?”. Ompa uelis tikixtajtoltiskej Génesis 3:19 kampa moijtoua tatsakuiltilis tein Dios kinmakak satepan ke tajtakojkej uan tiknextiskej ke nejon tonal amo no teyi ika tajtoj miktan. Ta kiluij Adán ke oksepa mochiuaskia talnex. Uan no uelis tikiluiskej: “¿Taixejekol yeskia maj kiluiani ke oksepa mokepaskia talnex komo tein melauj yaskia miktan tajyouitiuj?”. Komo taltikpaknenkej yolmelauak, se netajtanil kemej nejin uelis kitanemililtis.

11. 1) ¿Keniuj uelis tiktanemililtiskej akin kineltoka ke nochin akin yolkualmej youij iluikak? 2) ¿Keniuj tikontanemililtiani taltikpakneminij keman ika tiontajtouani nejin tamachtilis?

¹¹ Expatika neskayot. Tikajsij akin kineltoka ke nochin akin yolkualmej youij iluikak. Tikyekmatij ke nejon tein kineltoka kiuikas maj taman kiajsikamati tein kijtoua Biblia. Maj tiknemilikan ke yekin tikixtajtoltijkej Apocalipsis 21:4 (xikonixtajtolti). Taltikpaknenkej xa kinemilis ke tatiochiualismej tein ompa moijtoua, kijtosneki nemilis ompa iluikak. ¿Keniuj uelis tikpaleuiskej? Amo tikuiskej okseki textos, ta uelis tiknextiliskej seki tajtolmej tein kipia nejin versículo, kampa kijtoua ke “amo aken momikilis ok”, uan maj tiktajtanikan: “¿Melauj ke komo teisa amo onkasok, achto monekik onkas?”. Xa kijtos ke kemaj. Ompa uelis tiknextiliskej ke ne iluikak amo keman onkani mikilis; taltikpakneminij sayoj momikilianij nikan taltikpak. Yejua ika, taixejekol maj tikijtokan ke Apocalipsis 21:4 ika tajtoua tatiochiualismej tein onkas nikan taltikpak (Sal. 37:29).

12. ¿Keyej Jesús kikuia neskayomej?

¹² Jesús amo sayoj kikuik netajtanilmej itech tanojnotsalis, ta no kikuik neskayomej (xikonixtajtolti Mateo 13:34, 35). Nejon tapaleuiaya maj monextiani ox akin kikakiaj katkaj yolmelaujkej (Mat. 13:10-15). Uan neskayomej no tapaleuiayaj maj kiuelkakinij itamachtilis uan maj amo niman kielkauanij. ¿Keniuj no uelis tikuiskej neskayomej keman titamachtiskej?

13. ¿Toni neskayot uelis tikuiskej tein ika tiknextiskej ke Dios okachi ueyichiujkej ke Jesús?

¹³ Neskayomej tein amo ouij se kiajsikamati okachi tapaleuiaj. Kemej neskayot, keman tikmelauaskej ke Dios okachi ueyichiujkej ke Jesús, xa uelis tikintanemililtiskej ijkon: yekinika, uelis tikijtoskej ke Dios uan Jesús kinextijkej ke kuali uikalis tein kipiaj tamati kemej tein kipia se tepopaj iuan ikonetsin: Dios kijtoj ke Jesús iKonetsin, uan Jesús kijtoj ke Dios iTajtsin (Luc. 3:21, 22; Juan 14:28). Ompa uelis tiktajtaniskej: “Komo tejuatsin tikonnekiskia tikonmelauas ke ome taltikpakneminij tel ixtamatij, ¿akonimej tikonijtoskia? ¿Se tepopaj uan ikonetsin, oso ome iknimej, xa akin senyolkej?”. Taltikpaknenkej xa tanankilis ke ome iknimej. Komo ijkon, uelis tiksentokaskej tikiluiskej: “Komo tejuatsin uan nejua amo techouijmaka ijkon titanankiliskej, ¿keyej Jesús, akin katka okachi Ueyi Tamachtijkej amo kijtoj nejon? Ta kijtoj ke Dios iTajtsin, tein kijtosneki ke okachi ueyichiujkej uan okachi kipia tanauatil ke yejua”.

14. ¿Toni neskayot kinextia ke amo taixejekol yeskia maj Dios kikauiliskia Amokuali maj kintajyouilti miktan taltikpakneminij?

¹⁴ Maj tikitakan okse neskayot. Moajsij sekin akin kineltokaj ke Dios kikauiliani Amokuali maj kintajyouilti miktan taltikpakneminij. Komo tikuij se neskayot, xa kipaleuis se tepopaj maj kiita ke nejon amo taixejekol. Uelis tikiluiskej teisa kemej nejin: “Maj tikijtokan ke mokonetsin peua tel taixnamiki uan kichiua miak taman tein amo kuali. ¿Toni tikonchiuaskia?”. Tepopaj xa kijtos ke kitemoskia kimelauas ikonetsin uan amo sayoj sepa, ta miakpa (Prov. 22:15).  Ompa uelis tiktajtaniskej toni kichiuaskia komo ikonetsin senkis amo kinekiskia takakis maski mochikaua kipaleuis. Xa kijtos ke monekiskiaya kitatsakuiltis. Satepan uelis tiktajtaniskej: “¿Uan komo tikonmatiskia ke aksa akin tel amo yolkuali kitajtolmakak maj peua taixnamiki?”. Tikyekmatij ke tepopaj kijtos ke semi kualaniskia iuan nejon taltikpaknenkej. Tapaleuis maj moajsikamati nejin neskayot komo tikijtouaj nejin: “Kemej tikonmatikya ke nejon taltikpaknenkej kichiuak maj amo kuali monejnemilti mokonetsin, ¿tikoniluiskia maj yejua kitatsakuilti mokonetsin uan amo tejuatsin?”. Tikmatij ke tanankilis ke amo. Ika nejin moita ke Dios amo kikauiliskia Satanás maj kintatsakuilti taltikpakneminij akin yejua Satanás kichiuak maj amo kuali monejnemiltikan.

15, 16. 1) ¿Keyej moneki amo tikchiaskej maj nochin taltikpakneminij kiselikan tamachtilis ika iTekiuajyo Dios? 2) ¿Moneki timochiuaskej kuali titamachtianij uan ijkon uelis tikchiuaskej maj tapaleui totanojnotsalis? ¿Keyej ijkon tiontanankilia? (No xikonita recuadro “ Se kuali manamik tein tapaleuia maj kuali titanankilikan”.)

¹⁵ Maski tikuiskej netajtanilmej tein kuali tiknemiliskej, tanemililmej tein okachi tetaneltoktiaj uan neskayomej tein okachi tapaleuiaj, amo nochin taltikpakneminij kiseliskej tamachtilis ika iTekiuajyo Dios (Mat. 10:11-14). Kemej tikmatij, semi amo miakej akin kiselijkej itamachtilis Jesús, maski yejua katka okachi kuali Tamachtijkej akin moajsini nikan taltikpak (Juan 6:66; 7:45-48).

¹⁶ ¿Uan komo tikmachiliaj ke amo semi kuali titamachtianij? Maski ijkon, uelis tikchiuaskej maj tapaleui totanojnotsalis kemej moneki (xikonixtajtolti Hechos 4:13). ITajtol Dios techyekiluia ke ‘nochin akin kipiaj kuali tanejnekilis tein kinuikas itech nemilis nochipaya’ kiseliskej kuali tanauatilmej (Hech. 13:48, TNM). Yejua ika moneki taixejekolis. Moneki timochikauaskej maj kuali titamachtikan, sayoj ke maj amo timoyolkokokan keman amo kiseliskej kuali tanauatilmej. Maj kuali tikuikan tamachtilis tein Jiova techmaka. Ijkon timochiuaskej kuali titamachtianij, uan nejon techpaleuis tejuan uan akin techkakij (1 Tim. 4:16). Jiova techmachtia keniuj tiknankiliskej sejse taltikpaknenkej. Itech okse tamachtilis tikitaskej se taman keniuj okachi kuali kisas totanojnotsalis komo tiktojtokaj se tamachtilis tein Jesús kitemakak tein motelixmati.