Smita, * se siuat akin nemia Daca (Bangladés), akin kipiaya 35 xiujmej, kiixmatiaj ke semi tetasojtaya. Nochin kiixmatiaj kemej se siuat akin tel yolpakia iuan itakauj uan tel tekitikej, akin kinpaleuiaya oksekin maj kiixmatiskiaj keniuj tamati Dios. Sayoj ke, ichankauan moteltayokoltijkej keman Smita kikuik se kokolis tein kichiuak maj momikili nion ajsik se semana.

James uan isiuauj, akin kipiayaj kemej 35 xiujmej, no kinixmatiaj ijkon kemej Smita. Seki xiujmej achto, yajkaj costa oeste tein poui Estados Unidos kinkalpanotoj sekin akin iniuan moteluikayaj, sayoj ke amo kemanok mokepkej ininchan tein moajsia Nueva York. Momikilijkej keman mochiuak tein amo kuali ika teposmej, tein kinualkuilij tel ueyi tayokol ininchankauan uan akin iniuan moteluikayaj.

Akin yeski ueli kiita ke noyampa onkak tajyouilis uan mochiua tein amo kuali: itech neteuilismej momikiliaj akin tateuitij uan akin amo; tateuilis uan keman mochiua tein amo kuali kinijtakoua tel miakej akin amo teyi kichiuanij; akin yeski uelis kipanos tein amo kuali uan kikuis se ueyi kokolis; tetsaujmej senkis tauejuelouaj itech xolalmej, uan tachichikouilis uan teikamauiltilis noyampa moita. Tejuatsin xa tikonpanouani teisa kemej nejin.

Yejua ika, taixejekol maj timotajtanikan nejin:

• ¿Keyej kinpanoua tein amo kuali akin yolkualmej?

• ¿Dios itajtakol maj pano nejon?

• ¿Iselti mochiua tein amo kuali, oso taltikpaknenkej kichiua?

• ¿Xe kichiua tein kiixmatij kemej karma, tein kijtosneki ke tikixtaujtokej tein tikchiujkej itech se nemilis tein tikpiakej achto?

• Komo moajsi se Dios akin nochi ueli kichiua, ¿keyej amo kinyekpia akin yolkualmej?

• ¿Kemansa tamis tein amo kuali uan tajyouilis?

Techpaleuis maj tikajsikan tanankilil komo tiknankiliaj ome netajtanilmej tein motelnekij: ¿Keyej panoua tein amo kuali? ¿Uan toni kichiuas Dios?