1, 2. 1) ¿Akoni okachi ueyi itaixpantijkauj Jiova? 2) ¿Toni kijtosneki tokayit Jesús? 3) ¿Keniuj iKonetsin Dios kichiuak kemej kijtosneki itokay?

“NIUALA nikan taltikpak niyoliko para sayo nikijtos ten melau.” (Xikonixtajtolti Juan 18:33-37.) Keman kiitstoyaj toni kichiuiliskiaj, Jesús kiluij nejin tajtolmej tekiuaj romano Poncio Pilato akin taixyekantoya Judea. Jesús yekin kiluijka ke katka tekiuaj. Seki xiujmej satepan, tatitanil Pablo ika tajtoj iyolchikaualis Jesús tein kikauak kemej neskayot keman “kitetapouito de Totajtsin Dios hasta inauak in tayekanke Poncio Pilato” (1 Tim. 6:13). Kemaj, kemansa moneki ueyi yolchikaualis uan ijkon uelis se “tanextilijtinemi[s] sayo ika ten melau” itech nejin taltikpak kampa Satanás taixyekantok kampa semi motauelitaj (Apoc. 3:14).

² Kemej Jesús pouia iniuan judíos, keman yolik katkaya se itaixpantijkauj Jiova (Is. 43:10). Tein melauj, yejua okachi ueyi itaixpantijkauj Jiova akin yejuatsin kiixtaliani maj kipaleui itokay. Jesús kichiuak kemej kijtosneki itokay, se tokayit tein Dios kitalilij. Keman se ángel kiluij José, itakpatat Jesús, ke María kipiaskia se konetsin ika ichikaualis iespíritu Dios, kijtoj: “Kiyolitis se ikonetsin uan kitokaytis Jesús Temakixtijke, porin Yejuatsin ne kinmakixtis nochi in pueblojuani den senmanauak de nintajtakoluan” (Mat. 1:20, 21). Miakej akin kitemouaj kiajsikamatiskej seki taman tein moajsi itech Biblia, kijtouanij ke tokayit Jesús ualeua itech se tokayit hebreo, Jesúa, tein tepitsin kipia itokay Dios uan kijtosneki “Jiova Yejuatsin  Nemakixtilis”. Ijkon kemej kijtosneki itokay, Jesús kinpaleuij “pueblojuani de Israel” akin tamatiaj “keme ichkame ten poliutokke” maj moyolnonotsakan ika inintajtakoluan uan ijkon oksepa kipiaskiaj itatiochiualis Jiova (Mat. 10:6; 15:24; Luc. 19:10). Yejua ika senkis kiteixmatiltij iTekiuajyo Dios. Marcos kijkuiloj: “Jesús yajki Galilea kitetapouito kuali tanauatilmej tein kitemaka Dios uan kijtoj: ‘Tonal tein ixyetoya ejkokya, uan itekiuajyo Dios moualtokijya. Ximoyolnonotsakan, uan xitakuaujtamatikan itech kuali tanauatilmej’” (Mar. 1:14, 15, TNM). Jesús no kinextij ika yolchikaualis ke amo kuali tein kichiujtoyaj tayekananij judíos itech taneltokalis, uan yejua ika no kimiktijkej itech se kouit (Mar. 11:17, 18; 15:1-15).

3. ¿Toni panok eyi tonal satepan ke Jesús momikilij?

³ Sayoj ke satepan panok se taman tein se kimoujkaita. Eyi tonal satepan ke Jesús kiteltajyouiltijkej keman kimiktijkej, Jiova kiajokuik, amo kemej se taltikpaknenkej, ta kemej se espíritu akin amo oksepaok momikilis (1 Ped. 3:18). Kemej Jesús kinekia kinextis ke oksepa kiselijka inemilis, monextij kemej se taltikpaknenkej. Itech tonal keman moajokuik monextij kemej makuilpa uan ininixpan tataman imomachtijkauan (Mat. 28:8-10; Luc. 24:13-16, 30-36; Juan 20:11-18).

4. 1) ¿Toni nechikol kiixyekanak Jesús itech tonal keman moajokuik? 2) ¿Toni tekit kinnauatij imomachtijkauan maj kichiuanij?

⁴ Keman ika makuil Jesús monextij, yajki ininixpan itatitaniluan uan oksekin akin iniuan monechikojtoyaj. Itech nejon tonal tein amo kielkauaskiaj, uelis tikijtoskej ke kinmakak se nemachtil ika iTajtol Dios. “Senkis kintapouilij inintanemilil uan ijkon kiajsikamatiskiaj tein kijtosneki Tajkuilolmej.” Ijkon kiajsikamatkej ke itech Biblia achtook moijtojka ke akin kiixnamikiaj Dios kimiktiskiaj Jesús uan ke oksepa kiseliskia inemilis. Satepan ke tamik nejon nechikol, itech tonal keman moajokuik, Jesús kinyekiluij ke monekia kichiuaskej se tekit. Kiniluij ke “ika itokay, itech nochi altepemej, tein peuaskia Jerusalén, motanojnotsaskia maj moyolnonotsanij uan ijkon kintapojpoluiskiaj inintajtakoluan”. Uan no kijtoj: “Namejuan nanyeskij nantaixpantinij ika nejin taman” (Luc. 24:44-48, TNM).

5, 6. 1) ¿Keyej kijtoj Jesús “nanyeskij nannotaixpantijkauan”? 2) ¿Toni monekia kiteixmatiltiskej imomachtijkauan Jesús?

⁵ Cuarenta tonalmej satepan, keman Jesús monextij uan amo oksepaok monextiskia, tatitanilmej xa tel kuali kiajsikamatkej tein kijtosnekik ika nejin tanauatil tein amo ouij sayoj ke se kimoujkakaki: “Nanyeskij nannotaixpantijkauan itech altepet Jerusalén ijkon kemej itech nochi Judea uan Samaria uan hasta kampa okachi uejka itech taltikpak” (Hech. 1:8, TNM). ¿Keyej kijtoj Jesús “nanyeskij nannotaixpantijkauan”, uan amo itaixpantijkauan Jiova? Tein melauj ueliskia kijtoskia nejon, sayoj ke kinnojnotstoya israelitas, uan yejuan katkajya itaixpantijkauan Jiova.

⁶ Axkan imomachtijkauan kiteixmatiltiskiaj ke Jiova kikuitoya inemilis Jesús tein kitemakak uan ijkon kinmakixtiskia taltikpakneminij. Nejin se taman nemakixtilis tein okachi ueyi ke ijkuak Jiova kinmakixtij israelitas ompa Egipto kampa kinteltekitiltiayaj uan keman kinuikakaj Babilonia. Imikilis uan ineajokuilis Jesucristo tapaleuia maj kinkixtilikan taltikpakneminij se okachi ueyi taman tein kemej yeskia kinkitskijtok: tajtakol uan mikilis. Itech Pentecostés xiuit 33, imomachtijkauan Jesús akin yankuixtok kinixpejpenkaj ika iespíritu Dios kiteixmatiltijkej “ueyi itatiochiualisuan de Dios”, uan miakej kiselijkej inintamachtilis. Ijkon, Jesús, akin moajsi iyekmakopa ipopaj ompa iluikak, peuak kiita keniuj itokay motelnekia porin tel miakej moyolnonotsayaj uan takuaujtamatiaj iuan kemej akin Jiova kikui tein ika kinmakixtia taltikpakneminij (Hech. 2:5, 11, 37-41).

7. ¿Toni kinextij tein mochiuak itech Pentecostés xiuit 33?

⁷ Tein mochiuak itech Pentecostés xiuit 33 kinextij ke Jiova kiselij inemilis Jesús tein amo kipiaya tajtakol tein ika taxtauak uan ijkon techtapojpoluis totajtakoluan (Heb. 9:11, 12, 24). Jesús kimelauak nejin: “Amo niuala para ma aksame nechtekitilikan. Ta, niuala sayo para ma nitetekitilis, uan para ma niktemakas nonemilis para nikixtauas in tajtakol, uan para nikinmakixtis nijin taltikpakuani” (Mat. 20:28). “Taltikpakuani” akin kinpaleuiskia taxtauil tein kitemakak Jesús amo sayoj yeskiaj judíos akin moyolnonotskaj. Ta Dios kinejneki maj “nochi in taltikpakuani ma makisakan” porin taxtauil “kinajchiuilis nintajtakoluan de nochi taltikpakuani” (1 Tim. 2:4-6; Juan 1:29).

8. 1) ¿Keniuj yekinika imomachtijkauan Jesús uelik ika tajtojkej yejua? 2) ¿Hasta kani ajsik inintanojnotsalis imomachtijkauan Jesús?

⁸ ¿Kipiakej yekinika imomachtijkauan Jesús yolchikaualis tein kinpaleuiskia maj kisentokaskiaj ika tajtoskiaj yejua? Tikyekmatij ke kemaj, maski amo kichiujkej ika ininchikaualis. Iespíritu Jiova tein kipia chikaualis kinolinij uan kinyolchikauak maj kisentokaskiaj tanojnotsaskiaj (xikonixtajtolti Hechos 5:30-32). Kemej veintisiete xiujmej satepan ke mochiuak Pentecostés itech xiuit 33 uelik moijtoj ke “melauak Tajtoltsin de Dios” kinixmatiltijkajya judíos uan akin amo judíos “tech nochi in senmanauak” (Col. 1:5, 23).

9. Ijkon kemej Jesús achtook kijtojka, ¿toni kipanok nechikol itech nejon tonalmej?

⁹ Tetayokoltij tikijtoskej ke nechikol kampa kichiuayaj kemej Cristo itech nejon tonalmej moijtakoj (Hech. 20:29, 30; 2 Ped. 2:2, 3; Jud. 3, 4). Ijkon kemej Jesús achtook kijtojka, “amokuali”, Satanás, kichiuak maj momiakilianij akin kinekepiliayaj Jiova uan maj amo moitani akonimej yekmelauj kichiuayaj kemej Cristo hasta keman ejkoskia “itamiampa nochi tein mochiujtok itech taltikpak” (Mat. 13:37-43, TNM). Satepan Jiova kiixtaliskia Jesús kemej ininTekiuaj taltikpakneminij. Nejon mochiuak itech metsti octubre xiuit 1914 tein ika peuak “itamian tonalmej” tein amo kuali tein mochiujtok itech taltikpak kampa Satanás taixyekantok (2 Tim. 3:1, TNM).

10. 1) ¿Katiyejua xiuit kinextijkej tokniuan taixpejpenalmej ke mochiuaskia se taman tein motelneki? 2) ¿Toni mochiuak itech metsti octubre xiuit 1914, uan keniuj moyekitani nejon?

¹⁰ Tokniuan taixpejpenalmej itech totonaluan,  achtook kinextijkej ke itech metsti octubre xiuit 1914 mochiuaskia se taman tein motelneki. Kiajsikamatkej nejon porin momachtijkej ke Daniel achtook kijtojka ke se ueyi kouit kitamotaskiaj uan oksepa moskaltiskia satepan ke panoskia “chikome xiuit” (Dan. 4:16). Jesús kitokaytij nejon tonalmej kemej “tonalme ke Dios kintekauilij ne analtekokayome” keman ika tajtojtoya iyetolis uan “itamiampa nochi tein mochiujtok itech taltikpak”. Itech nejon xiuit 1914 tein motelneki peuak moyekita “neskayot” tein kinextia ‘iyetolis’ Cristo (Mat. 24:3, 7, 14, TNM; Luc. 21:24). Yejua ika, ijkuak peuak moteixmatiltia kemej semej “ueyi itatiochiualisuan de Dios” ke Jesús kiixtalijkej kemej ininTekiuaj taltikpakneminij.

11, 12. 1) ¿Toni peuak kichiua yankuik Tekiuaj itech taltikpak itech xiuit 1919? 2) ¿Toni moyekitak itech xiuit 1935? (Xikonita taixkopin ipeujyan tamachtilis.)

¹¹ Kemej yankuik Tekiuaj itech taltikpak, Jesucristo niman peuak kinkixtia itatojtokakauan taixpejpenalmej itech ‘Ueyi Babilonia’ kampa kemej yeskia tsaktoyaj (Apoc. 18:2, 4). Itech xiuit 1919, tepitsin satepan ke tamik Yekinika Neteuilis tein Mochiuak itech Nochi Taltikpak, tokniuan taixpejpenalmej ueliskiaj peuaskej itech nochi taltikpak kiteixmatiltiskej kuali tanauatilmej ika iTekiuajyo Dios uan nemakixtilis tein kitemaka yejuatsin ika inemilis Jesús. Yejuan kemaj tanojnotskej, uan nejin kichiuak maj tel miakej kiseliskiaj tamachtilis tein melauak uan maj kinixpejpenaskiaj kemej akin iuan tekiuajtiskej Cristo ompa iluikak.

¹² Itech xiuit 1935, moyekitak ke Cristo peujkaya kinsentilia tel miakej ‘okseki iichkauan’, akin yeskiaj “uel miak tagayot” akin noyampa kayomej. Ika inintaixyekanalis tokniuan taixpejpenalmej, nejin “uel miak tagayot” no kinextiaj yolchikaualis kemej Jesús kinextij uan kiteixmatiltiaj senteixtenoj ke ueli momakixtiaj ika inepaleuil Dios uan Cristo. Kemej kisentokaj tanojnotsaj uan takuaujtamatij itech taxtauil tein kitemakak Cristo, kipiaskej tatiochiualis makisaskej itech “ueyi tatsakuiltilis” tein kiixpolos tein Satanás kiixyekantok nikan taltikpak (Juan 10:16; Apoc. 7:9, 10, 14).

13. 1) ¿Toni tikixtaliaj tikchiuaskej kemej tiitaixpantijkauan Jiova? 2) ¿Toni techpaleuis maj ijkon tikchiuakan?

¹³ Maj tiksentokakan tikpatiuitakan ueyi tatiochiualis tein tikpiaj maj tikteixmatiltikan “ueyi itatiochiualisuan” Jiova tein kichiuani uan tein motenkaua kichiuas. Semi melauak ke nejon kemansa techouijmakas. Miakej tokniuan tanojnotsaj kampa amo kinekij kinkakiskej uan kinkejkelouaj, uan oksekin kintajyouiltiaj. No uelis tikchiuaskej tein kichiujkej tatitanil Pablo uan akin iuan tanojnotsayaj. Yejua kijtoj: “Totajtsin Dios techyolchikauak para tamechnojnotsaske ika in  Tajtoltsin de Dios ten kualkui ne nemakixtilis, maski no techtajyouiltiayaj” (1 Tes. 2:2). Maj amo keman timosenkauakan. Okachi kuali, maj tikixtalikan tiksentokaskej tikchiuaskej kemej tikiluijkej Jiova ijkuak iuan timotemaktijkej hasta keman kemej yeskia xitinis tein mochiujtok nikan taltikpak kampa Satanás taixyekantok (Is. 6:11). Uan kemej amo uelis tikchiuaskej ika tejuan tochikaualis, maj tiktajtanikan Jiova maj ika iespíritu techmaka “chikaukauelilis [tein] ualeutok imako”, ijkon kemej kichiujkej tokniuan itech yekinika siglo (xikonixtajtolti 2 Corintios 4:1, 7; Luc. 11:13).

14, 15. 1) ¿Keniuj taltikpakneminij itech yekinika siglo kinitayaj tokniuan? 2) ¿Keniuj tatitanil Pedro kinyolchikauak tokniuan? 3) ¿Keniuj moneki timomachiliskej komo techchiuiliaj tein amo kuali porin tiitaixpantijkauan Jiova?

¹⁴ Itech nejin tonalmej moajsij tel miakej taltikpakneminij akin kijtouaj ke kichiuaj kemej Cristo uan kiueyichiuaj Dios, sayoj ke “ika nijin pitsotik chiualisme niman mota ke amo melau ke yejuan kineltokaj Dios. Uan yejuan semi tamajkaualme ya, uan semi eliuistitinemij san. Uan yejuan amo uelij kichiutinemij tachiualisme ten kuali” (Tito 1:16). Maj tikelnamikikan ke itech yekinika siglo miakej kintauelitayaj akin yekmelauj kichiuayaj kemej Cristo. Yejua ika tatitanil Pedro kinyolchikauak keman kiniluij: “Xikpiakan ueyi yolpakilis kuak aksame namechkejkeloske [...] ika por namotakuautamatilis tech itokaytsin de Cristo [...] porin in Yektikatsin Espíritu de Dios yetinemi namoyolijtik” (1 Ped. 4:14).

¹⁵ ¿No techpanoua tiitaixpantijkauan Jiova axkan nejon tein moijkuiloj ika ichikaualis yejuatsin? Kemaj, porin tikteixmatiltiaj iTekiuajyo Jesús. Tein melauj, komo techtauelitaj porin timoteixmatiltiaj kemej itaixpantijkauan Jiova no techtauelitaj porin tikteixmatiltiaj “itokaytsin de Cristo”, akin kiniluij akin kiixnamikiaj: “Niuala nikan taltikpak itenkopaka Notajtsin Dios uan namejuan amo nannechneltokilia[j]” (Juan 5:43). Yejua ika, keman oksepa techchiuiliskej tein amo kuali ijkuak titanojnotsaj, uelis timoyolchikauaskej. ¿Keyej? Porin nejon kijtosneki ke tikpiaj itatiochiualis Dios uan ke iespíritu ‘yetinemi toyolijtik’.

16, 17. 1) ¿Toni mochiujtok miakkan ika tanojnotsalis? 2) ¿Toni moneki tiksentokaskej tikchiujtoskej?

¹⁶ No ijkon, maj tikelnamikikan ke miakkan itech taltikpak miakej kiselijtokej tamachtilis tein melauak. Hasta kampa miakpaya titanojnotsaj, tiksentokaj tikinajsij akin kinekij kikakiskej kuali tanauatilmej ika nemakixtilis. Maj timochikauakan oksepa tikinkalpanoskej akin kuali techkakij uan komo ueli, maj tikinmakakan se nemachtil ika Biblia tein kinpaleuis maj motemaktikan iuan Jiova uan maj moauikan. Xa timomachiliaj kemej Sarie akin nemi Sudáfrica, akin panouaya sesenta xiujmej kiteixmatiltia kuali tanauatilmej. Yejua kijtoua: “Nikteltasojkamati maj ika inemilis Jesús tein kitemakak ueli nikpia se kuali uikalis iuan Jiova, okachi Ueyi Taixyekankej itech iluikak uan taltikpak, uan nechyolpaktia maj ueli nikteixmatilti itokay tein semi ueyi”. Yejua uan itakauj, Martinus, kinpaleuianij eyi ininkoneuan uan miakejok taltikpakneminij maj mochiuakan itekitikauan Jiova. Sarie no kijtoua: “Amo onkak okseki tekit tein teualkuilia okachi yolpakilis, uan ika iespíritu, Jiova techmaka tinochin chikaualis tein techpaleuia maj tiksentokakan tikchiujtokan nejin tekit tein kiualkui nemakixtilis”.

¹⁷ Komo timoauijkejya oso tiknemilijtokej tikchiuaskej, tikpiaj miak taman keyej tiktasojkamatiskej ueyi tatiochiualis maj tipouikan iniuan itaixpantijkauan Jiova akin moajsij noyampa taltikpak. Yejua ika, maj tiksentokakan ajsitok titanojnotsakan uan maj amo tikchiuakan tein pitsotik tein onkak nikan taltikpak kampa Satanás taixyekantok. Komo ijkon tikchiuaj, tikueyitaliskej toTajtsin tetasojtakej akin moajsi iluikak uan tiksentokaskej tikpiaskej ueyi tatiochiualis timoteixmatiltiskej kemej itaixpantijkauan.