¿Keyej miakej motataujtiaj iuan Dios?
“Nochipa nimauiltiaya. Niktataujtiaya Dios porin niknekia niktanis miak tomin. Amo keman uelik niktanik.” (Samuel, * Kenia)
“Itech kaltamachtiloyan sayoj monekia timomachtiskej seki netataujtilmej uan tikinijtoskej.” (Teresa, Filipinas)
“Nimotataujtia iuan Dios keman nikpia kuejmolmej. No niktajtania maj nechtapojpolui notajtakoluan uan maj nimochiua se kuali itatojtokakauj Cristo.” (Magdalene, Ghana)
Tein kijtoj Samuel, Teresa uan Magdalene kinextia ke miak taman kichiua maj taltikpakneminij motataujtikan iuan Dios, sekin tajtanij tein kuali uan oksekin sayoj tein yejuan kinejnekij. Seki netataujtilmej kisaj itech ininyolo uan oksekin sayoj kijtouaj tein kimatij, amo tein kimachiliaj. Sayoj ke, maski tein yeski tein kinolinis maj kitataujtikan Dios, kemej panoskej se examen, maj tatanikan mauiltianij akin okachi kiuelitaj, maj kipiakan tein kuali ininchankauan oso okseki taman, millones kimachiliaj ke moneki kichiuaskej netataujtil. Tein melauj, tein kintajtanianij oksekin kinextia ke hasta akin amo pouij itech se taneltokalis kemansa kitataujtiaj Dios.
Uan tejuatsin, ¿tikontataujtia Dios? Komo ijkon, ¿toni tikontajtania? Maski tejuatsin nochipa tikonchiua netataujtil oso amo, xa tionmotajtaniani: ¿Yekmelauj tapaleuia? ¿Yekmelauj kikaki Dios tonetataujtiluan? Se tajkuilojkej kijtoj ke se kichiuas netataujtil sayoj “se taman tein kichiua maj kuali se momachili”. Sekin tapajtianij no ijkon tanemiliaj, kijtouaj ke netataujtil kemej “se taman tapajtilis”. ¿Tejuatsin toni tikonnemilia? ¿Kichiuaj netataujtil taltikpakneminij porin ijkon momattokej oso sayoj porin kinekij kuali momachiliskej?
Biblia tamachtia okse taman. Kijtoua ke netataujtil amo sayoj tapaleuia maj kuali se momachili. Kiyekijtoua ke Dios yekmelauj kikaki tonetataujtiluan tein tikchiuaj kemej moneki uan keman titajtanij tein kinamiki. ¿Melauak nejon? Maj tikitakan tein kinextia ke melauak nejon.
^ párr. 2 Mopatakej tokaymej.
