“¡Kualtsin Kali kampa tiMosentiliaj!”. Ijkon kijtoj nicole, se tokniuj ichpoch de Colombia. ¿Keyej kiteluelita kali kampa mosentilia? Yejua kijtoua: “Ompa niyetok iniuan tokniuan akin kemej yeskia nochankauan”. ¿Tionmomachilia kemej Nicole?

 Itech nochi taltikpak, tiitaixpantijkauan Jehová timosentiliaj kemej itech 63,000 kalmej kampa timosentiliaj. Itech nejin kalmej amo sayoj tikueyichiuaj Dios. David, se precursor regular de Colombia, kimelaua: “Nejin Kalmej kampa tiMosentiliaj kichiua maj oksekin kiuelitakan tein Dios tamachtia porin akin techkalpanouaj, kimojkaitaj maj nochipa yekyetokan kalmej kampa timosentiliaj”. Nejon amo iselti mochiua. Moneki tikinchipauaskej uan tikinyektaliskej kalmej kampa timosentiliaj. ¿Keniuj ueli tikchiuaj nejon?

 Tokniuan akin mosentiliaj itech se kali, yejuan kiyektaliaj. Yejua ika yejuan tachipauaj uan kiyektaliaj tein uejueliui.

 Para mochiuas nejin tekit, akin tekitij Kampa Moixtalia uan Moixyekana Kalchiualis kinixtaliaj tokniuan takamej akin tamachtiaj keniuj moyektalis kalmej. Sejse tokniuj tekiti para chikuasen hasta majtakti kalmej. Kinkalpanoua uan kinmachtia tokniuan para kimatiskej keniuj kuali kiyektaliskej kali. Ejeyi xiuit kinitati kalmej uan kijtoua toni moneki moyektalis.

 Nochin tokniuan akin kinmachtiaj keniuj kiyektaliskej kalmej semi motasojkamatij. Indhumathi, se tokniuj siuat de India kijtoua: “Semi kualtsin tein techmachtijkej. Tikuelitaj tikyektaliskej Kali kampa tiMosentiliaj”. Evans, se tokniuj de Kenia, kijtoua: “Tikitakej ke motelneki maj niman tikyektalikan teisa para amo okachi uejueliuis uan ijkon amo motelnekis miak tomin”.

 Moneki miak dolares a para mokuis uan moyektalis se Kali kampa tiMosentiliaj, okachiok itech seki xolalmej, okachi uejkauj kayot, oso amo semi miakej ompa mosentiliaj. ¿Keniuj moixtaua nochi tein moneki?

 Moyektalia Kali kampa tiMosentiliaj ika tomin tein kitemakaj. Se tokniuj de Kazajistán akin monotsa Alexander kimelaua: “Tomin mokui para moixtauas internet, at, luz uan okseki taman. Uan no mokui para mokouas amat para se momauajuatsas, guantes, tein ika se tachipauas uan pintura”. Tein mokaua tomin, tiktemakaj para ika mochiuas itekiyo Dios uan ijkon no uelis moixtauas tein moneki para moyektalis uejueyi kalmej kampa moneki okachi tomin itech nochi taltikpak.

 Kemansa, moneki okachi tomin para moyektalis se Kali kampa tiMosentiliaj ke tein monekiskia para mokuis ome oso eyi metsti. Keman ijkon panoua, tayekananij tajtouaj iuan capacitador tein kiixtalianij tokniuan akin tekitij Kampa moixtalia uan moixyekana kalchiualis. Komo yejuan kijtouaj ke kemaj moneki nejon tomin para moyektalis kali, kikuij tomin tein kitemakaj para mochiuas itekiyo Dios. Itech xiujtekit 2023, mochiuak 8,793 tataman tekit kampa monekik motaxtauas 76,6 millones de dolares. Maj tikitakan ome de nejon tekit.

 Ompa Angola, se Kali kampa tiMosentiliaj tein mochiujchiujka 15 xiujmej achto, amo yekyetoya. Monekia kiyektaliskej sistema eléctrico uan tepamit ixtajtapantoya. Uan no, vecinos kitemaktiltiayaj ke at kalakia ininkalijtik. Yejua ika, akin tekitij Kampa moixtalia uan moixyekana Kalchiualis kijtojkej maj moyektali nejon uan monekik moixtauas 9,285 dólares. Vecinos kimojkaitakej keniuj tekitikej uan semi kitasojkamatkej.

 Ompa Polonia, itech se Kali kampa tiMosentiliaj tajxikaya uan amo kuali yetoya alfombra. Akin tekitij Kampa moixtalia uan moixyekana Kalchiualis kijtojkej maj moyektali tein ika pantsaktok kali uan kipatilijkej alfombra. Moixtauak 9,757 dólares. Nejon tapaleuij maj amo monekiskiaok satepan uejueyi taman kiyektaliskej.

 Keman tikyektaliaj kalmej kampa timosentiliaj tapaleuia maj amo mokui miak tomin tein kitemakaj para mochiuas itekiyo Dios, uan no kiueyitalia Jehová nejon. Se tokniuj akin monotsa Shaun, akin nemi Tonga, kijtoua: “Itech kali tein tikyektalianij, ueli tikueyichiuaj Jehová kampa tachipaujkan, tayekyetok uan tein nochi kualtia. Uan no kuali ika tajtouaj Jehová akin nemij itech xolal. Ika yolpakilis titayoleuaj maj monechikokan touan itech Kali kampa tiMosentiliaj”.

 Tinochin uelis titapaleuiskej maj motachipaua uan maj moyektali kali kampa titaueyichiuaj. Marino, se akin tamachtia keniuj se kiyektalis kali ompa Australia, kijtoua: “Semi kualtsin maj tiuelikan maj moyektali Kali kampa tiMosentiliaj, uan nochin uelis titapaleuiskej. Ijkon, titapaleuiaj maj amo motelkui tomin tein kitemakanij para mochias itekiyo Dios uan ijkon ueli mokui nejon tomin kampa yekmelauj moneki”.

 Joel, se tokniuj de India akin kiuelita tapaleuis maj moyektali Kali kampa tiMosentiliaj, kijtoua: “Keman nitekiti iniuan tokniuan nechpaleuia maj niknemili keniuj titekitiskej itech yankuik taltikpak”. Nicole, akin ika titajtojkej achto, kijtoua: “Yankuixtok tokniuan kiyektalijkej baño kampa ijxikaya at uan nejua nitauajuatsak. Maskia amo nejua niyektalij tein uejueliujka, kemaj nitapaleuij maj amo aksa uetsini”.

 Komo tikonneki tiontapeleuis maj moyektali Kali kampa tiMosentiliaj, xiontajto iniuan tayekananij. Uan xikonelnamiki ke tomin tein tikontemaka mokui para moyektalis Kali kampa tiMosentiliaj uan no oksekin kalmej itech nochi taltikpak. Uelis tikontemakas itech cajas tein yetokej kampa timosentiliaj oso itech donate.dan124.com. Semi tiktasojkamatij monepaleuil.