Itech xolalmej tein pouij Latinoamérica nemij millones maseualmej akin tajtouaj tataman tajtolmej uan tataman tein momattokej kichiuaskej. Miakej tokniuan nemij itech nejon xolalmej. Itaixpantijkauan Jehová tiktajtolkepaj uan tikixtiaj itech panoua 130 tataman tajtolmej tein ompa motajtoua para tikinpaleuiskej maj kiixmatikan Biblia. a Sayoj ke miakej tokniuan, maski kipatiuitaj kampa ualeuaj kiixnamikinij ouijkayomej porin kitekitiliaj Jehová uan porin amo kinekij tapaleuiskej itech iluimej tein kitapanauiliaj tein kijtoua Biblia. ¿Keniuj tikuinij tomin para tikinpaleuiskej?

 Itech se xolal tepeyoj kampa tajtouaj huichol ompa Jalisco (México), tokniuan kiyekijtojkej ke amo kinekiaj tapaleuiskej itech iluimej tein kitapanauilia tein kijtoua Biblia. b Sekin akin ompa nemiaj tel kualankej, yejua ika itech 4 metsti diciembre xiuit 2017, miakej akin tel kualantoyaj kinmagakej itaixpantijkauan Jehová uan oksekin akin iniuan yetoyaj. Kinkixtijkej kampa nemiaj, kinuejuelouilijkej ininchan uan tein kipiayaj uan kiniluijkej ke komo mokepayaj kinmiktiskiaj.

 Itaixpantijkauan Jehová akin ompaka nemiaj kinpaleuijkej nejin tokniuan uan kinmakakej nochi tein kinpolouaya. ¿Toni monekia mochiuas para mokepaskej ininchan? Se tokniuj, akin motokaytia Agustín, kijtoua: “Amo tikpiayaj tomin para tiktaxtauiskej aksa akin techtajtouiskia nion no tikmatiaj keniuj tiktemoskej maj tekiuanij techpaleuikan”.

 Kemej tokniuan amo kinkauayaj maj taueyichiuakan, tokniuan akin tekitij Betel de Centroamérica niman peujkej kinpaleuiaj. Achto, kiniluijkej tekiuanij akin ompa taixyekanayaj maj kitemouanij toni tein amo kuali kinchiuilijkej. Satepan, Tokniuan taixyekananij akin tekitij iniuan Oloch Taojtokaltianij kijtojkej ke tokniuan akin tekitij Betel de Centroamérica, ueliskiaj tekitiskej iniuan tokniuan akin tekitij itech Departamento de Asuntos Legales itech ueyi kali kampa techixyekanaj, uan maj kinteluilianij akin kinchiuilijkaj tein amo kuali nejon tokniuan. Satepan, nejon kuejmol monekik kimelauaskej okachi uejueyi tamelauanij akin pouij itech Suprema Corte de Justicia de la Nación ompa México.

 Se oloch akin tekitij kemej abogados uan seseko kayomej, achto kuali kiitakej keniuj kinmelauiliskej tekiuanij, ke ijkon kemej oksekin moneki kinpoujkaitaskej akin nemij itech xolalmej kampa tajtouaj se maseual tajtol, akin ompa nemij no moneki mopoujkaitaskej uan mopaleuiskej. Nochin kinnamiki maj kintajtouikan maski seseko kayomej.

 Itech 8 metsti julio xiuit 2020, uejueyi tamelauanij kinpaleuijkej nejin tokniuan uan tanauatijkej maj kinkauakan maj mokepakan itech ininxolal kampa kinkixtijkaj. Agustín, akin achto ika titajtojkej, kijtoua: “Semi tiyolpakij uan tiktasojkamatij nochi tein toka kichiujkej tokniuan, amo tikmatij toni techpanoskia komo amo techpaleuiskiaj”.

 Ompa Ecuador, no ijkon kinpanok tokniuan, akin nemij San Juan de Ilumán, se xolal ompa Otavalo kampa nemij miakej maseualmej uan tajtouaj tataman tajtolmej. Itech xiuit 2014, tekiuanij kinkaujkej tokniuan maj kichijchiuakan se Kali kampa tiMosentiliaj, sayoj ke se tiopixkat kinsentilij kemej 100 akin ompaka nemiaj para maj kitsakuilikan tekit tein kichiujtoyaj. Uan no, akin ompa nemiaj kiniluijkej tokniuan maj amo monechikokanok.

 Tokniuan akin tekitij itech Asuntos Legales itech Betel ompa Ecuador uan itech ueyi kali kampa techixyekanaj, sentekitikej para kinpaleuiskej nejin tokniuan, maj oksepa uelikan monechikokan. Nejin kuejmol monekik kimelauaskej tamelauanij uan nejon tapaleuij maj akin ompa nemij amo kinkuejmolokanok tokniuan uan maj kinkauakan maj oksepa monechikokan uan maj kitamichijchiuakan Kali kampa tiMosentiliaj. Sayoj ke, para maj satepan amo oksepa kinkuejmolouanij, tokniuan akin tekitij kemej abogados kiniluijkej uejueyi tamelauanij maj kiixtalikan tanauatilmej kampa kinextiskiaj ke monekia kinpoujkaitaskej akin nemij itech xolalmej kampa tajtouaj maseual tajtol uan amo kinkuejmoloskej.

 Itech 16 metsti julio xiuit 2020, okachi uejueyi tamelauanij akin pouij itech Corte Constitucional del Ecuador, kimelaujkej nejon kuejmol. Tokniuan akin tekitij kemej abogados ompa Ecuador kinpaleuijkej tokniuan itech nechikol uan iniuan moajsiaj okseki naui tokniuan akin no tekitij kemej abogados uan ipa kimelauanij kuejmolmej itech okseki altepemej. Kemej ipa onkatoyaya kokolis COVID-19 tokniuan akin kayomej itech tataman altepemej mosentilijkej iniuan tamelauanij ika videoconferencia, Tamelauanij amo keman kikaujtoyaj maj akin kinpaleuiaj itaixpantijkauan Jehová kimelauakan se kuejmol ika videoconferencia. c Abogados kiniluijkej tekiuanij ke monekia kinpoujkaitaskej sejsemej akin ompa nemiaj maski katkaj maseualmej uan tajtouayaj okse taman tajtol.

 Axkan tokniuan akin nemij ompa Otavalo kichixtokej tein kiixejekoskej tamelauanij akin pouij itech Corte Constitucional uan semi motasojkamatij porin semi kinpaleuianij. César, se tokniuj tayekankej akin poui itech nechikol Ilumán Quichua, kijtoua: “Sayoj Jehová ika inechikol ueli kichiua miak tataman maski amo timiakej”.

 Nochin abogados akin kinpaleuijkej tokniuan ika nochi ininyolo no katkaj itaixpantijkauan Jehová uan amo kinekkej maj kintaxtauikan. Sayoj ke monekik achto kuali kiitaskej keniuj kinpaleuiskej nejin tokniuan ininixpan tekiuanij uan nejin kinuikilij tiempo uan tomin. Abogados uan okseki tokniuan kikuikej panoua 380 horas para kiitaskej keniuj kimelauaskej kuejmol tein onkaya México, uan okseki 240 horas para kitajtolkepaskej amamej. Uan no, kemej 40 abogados akin seseko kayomej kikuikej tel miak horas para kimelauaskej kuejmol tein onkaya ompa Ecuador. ¿Keniuj uelik moixtauak nochi nejin uan ijkon tikinpaleuijkej tokniuan? Porin namejuan nantapaleuijkej ika namotomin uan nankitemakakej itech donate.dan124.com. Uan kemej ipa nankichiuanij. Miak tasojkamatik porin nantapaleuiaj ika nochi namoyolo.