Miakkan amo kinajsi at, ¿toni kijtoua Biblia?
Semi moneki at para se yoltos. Sayoj ke António Guterres, secretario general de las Naciones Unidas kijtoj ke “noyampa taltikpak kisentoka tasojti at”. Semi miakej noyampa taltikpak amo kinajsij at tein ueli se tayi.
Strdel/AFP via Getty Images
¿Ajsis tonal keman nochin techajsis at? ¿Oso nochipa ijkon tasojtis? ¿Toni kijtoua Biblia?
Biblia kijtoua ke ajsis tonal keman nochin kinajsis at
Biblia kijtoua ke ajsis tonal keman amo tasojtis at. Nochin kipiaskej at tein chipauak.
“Kampa taluakyan mextos at, uan tamanis kampa taluakyan motalojtos miak at. Kampa tonaluakik tal, tektos miak at uan kampa semi tauaktok no onkas at” (Isaías 35:6, 7).
¿Keyej uelis tikneltokaskej ke mochiuas tein Biblia kijtoua? Maj tikitakan tein Biblia kijtoua keniuj chijchiujtok taltikpak.
Biblia kijtoua keniuj chijchiujtok taltikpak uan keniuj chipauaya at tein tikuij
“[Dios] amo nenkaj kichijchiuak [taltikpak], ta kichijchiuak para maj ompa nemikan” (Isaías 45:18).
Dios kichijchiuak taltikpak kemej uelis nochipa onkas at tein chipauak.
“[Dios] kipankixtia at kemej vapor uan ijkon mochiua mixti tein kiualkui kiouit; uan keman yetok nejon mixti, peua kioui para akin nemij nikan taltikpak” (Job 36:27, 28).
Ijkon Biblia kimelaua keniuj Dios kichijchiuak taltikpak para maj chipauaya at uan ijkon nochipa onkas. At pankisa kemej vapor, mochiua mixti uan ompa peua kioui. Ijkon onkak at tein chipauak para tejuan uan tapialmej (Eclesiastés 1:7; Amós 5:8).
“Nikchiuas maj tel kioui keman moneki, uan motachiuas uan tel tatakis” (Levítico 26:4).
Ne uejkauj, Dios kiniluij israelitas akin tatokayaj, ke kichiuaskia maj kitemaka itakilo tein kitokaskiaj. Nejin kijtosneki ke takiouiltiskia. ToTajtsin kimatia ke kuali mochiuaskia tein kitokaskiaj, komo kiouia keman monekiskia.
Tein Dios kiniluij nejin Israelitas amo uejkaua mochiuas itech nochi taltikpak (Isaías 30:23). Axkan ayamo tikitaj nejon. Miakkan kisentoka tasojti at porin amo kioui oso mochiua okseki taman. ¿Kijtoua Biblia ke se tonal moyektalis nejon?
Keniuj amo tasojtisok at
Biblia techiluia ke Dios kichiuas maj iTaixyekanalis Dios kiyektali tein kijtakojtok taltikpak uan yejua ika no tasojti at (Mateo 6:9, 10). Nejin Taixyekanalis yetok iluikak uan taixyekanas itech nochi taltikpak (Daniel 2:44; Apocalipsis 11:15). Uan no, iTaixyekanalis Dios kiyektalis tein axkan tekiuanij amo ueli kiyektaliaj: kitamis tein kichiua maj tasojti at.
Ouijkayot: Kemej semi momachilia totonik, kichiua maj tasojti at tein ueli se tayi. Uan no kichiua maj semi tauaki, oso maj motaateka porin tel chikauak kioui oso pankisa ueyiat.
Keniuj momelauas: ITaixyekanalis Dios kiyektalis tein kijtakouanij taltikpak. Dios kijtoua: “¡Xikita! Nikchijchiujtok nochi yankuik” (Apocalipsis 21:5). Kampa axkan senkis tauaktok, onkas miak at uan motachiuas kampa axkan taluakyan (Isaías 41:17-20). Jesucristo kemej tekiuaj itech iTaixyekanalis Dios, kiitas maj amo chikaujkaejeka nion maj mochiua okseki taman tein tauejueloua.
Keman Jesús yetoya nikan taltikpak, kitamatilij se chikaujkaejekat. Nejon kinextia ueyi chikaualis tein Dios kimakak Jesús (Marcos 4:39, 41). Keman taixyekantos kemej tekiuaj itech iTaixyekanalis Dios, amo mochiuasok nion se tetsauit. Amo akin kimouilijtos maj peua se tetsauit.
Ouijkayot: Sekin kichiuaj seki taman para kitaniskej tomin maski kipitsotiliskej tataman ueyiamej uan ameyalmej. Nejin no kichiua maj tasojti at tein ueli se tayi.
Keniuj momelauas: Dios kiyektalis tein kijtakouanij taltikpak uan ijkon chipauayas mar, tataman ueyiamej uan taltikpak. Semi takualtsinkan yeski nikan taltikpak. Ijkon kinextia Biblia: “Onkas yolpakilis taluakyan uan kampa tauaktok. Onkas yolpakilis taluakyan uan taxochiouas kemej azafrán” (Isaías 35:1).
¿Toni kinpanos akin kichiuaj tein kijtakouaj taltikpak uan akin nemij nikan taltikpak? Dios kijtoua ke ‘kinixpolos akin kiixpolojtokej taltikpak’ (Apocalipsis 11:18; Proverbios 2:21, 22).
Ouijkayot: Miakej amo kuali kikuij at tein onkak uan kiauilouaj, yejua ika amo ajsiok at.
Keniuj momelauas: Itaixyekanalis Dios kiitas maj mochiua tein toTajtsin kineki, amo tein kinekij akin nemij nikan taltikpak (Mateo 6:9, 10). ITaixyekanalis Dios kuali kinmachtis tein monekis akin kinixyekanas. Biblia kijtoua: “Akin kiixmatiskej Jehová kipexontiskej taltikpak ijkon kemej ueyiat pexontok ika at” (Isaías 11:9). a Kemej kuali kinmachtis tein monekis, semi kitasojtaskej Dios uan taltikpak, yejuan kuali kiitaskej maj amo moijtako taltikpak nion tein kipia.
Para tikonmatis toni kichiuas iTaixyekanalis Dios, xikonlero tamachtilis “¿Qué cosas logrará el Reino de Dios?”.
Xikontemo amatajkuilol Isaías capítulo 35, para tikonleros tein kijtoua nejin tajkuilol keniuj motayektalis nikan taltikpak uan keniuj takualtsinkan yeski.
Para tikonmatis toni kiixtalij Dios kichiuas para akin nemij nikan taltikpak uan keniuj moajsis taltikpak, xikonita video ¿Keyej Dios kichijchiuak taltikpak?
a Jehová yejua itokay Dios (Salmo 83:18). Xikonita tamachtilis “¿Quién es Jehová?”.
Xa no tikonuelitas
¡MAJ TITACHIXTOKAN!
Miakkan semi tauaktok | ¿Toni kijtoua Biblia?
¿Se tonal amo tauaktosok? ¿Uelis tikchiaskej maj motayektali?
TEIN TIMOTAJTANIAJ DE BIBLIA
¿Toni kijtoua Biblia ika tetsaujmej tein mochiuaj?
¿Ika tetatsakuiltia Dios? ¿Kinpaleuia Dios akin tajyouiaj keman mochiuaj tetsaujmej?
SEKI TAMAN TEIN BIBLIA TAMACHTIA TEIN TAYEKANTOKEJ
¿Toni iTekiuajyo Dios?
Keman Jesús kiteixmatiltij iTajtol Dios nikan taltikpak, okachi ika tajtoj iTekiuajyo Dios. Miak xiujmejya, itatojtokakauan tajtanij itech netataujtil maj nejon Tekiuajyot taixyekanaki.
TIAKONIMEJ
Xiontajtani maj mitsonkalpanokan
Xikonmati itanankilil se netajtanil tein kisa itech Biblia, oso okachi xikonixmati itaixpantijkauan Jiova.
