Itech metsti julio xiuit 2022 miakkan semi tamijmiktianij:

•   “Ompa Japón kimiktijkej taixyekankej akin okachi moixmatia [Shinzo Abe akin katka primer ministro]. Akin ompa nemij uan noyampa taltikpak semi kimoujkaitakej nejon, okachiok porin ompa amo semi mochiua tein amo kuali, uan ika tanauatilmej tein kipiaj amo akin yeski kikauaj maj kipia teposmej tein ika tetatoponiliaj” (10 metsti julio xiuit 2022, The Japan Times).

•   “Se takat ompa Dinamarca kinmojmoujtij miakej keman kintatoponilij uan kinmiktij eyin itech se ueyi tanamakaloyan tein yetok Copenhague” (4 metsti julio xiuit 2022, Reuters).

•   “Sudáfrica: seki takamej kintatojtoponilijkej miakej akin yetoyaj itech se kali kampa kinamakaj tayil tein teuintij ompa Soweto uan kinmiktijkej 15” (10 metsti julio xiuit 2022, The Guardian).

•   “Panoua 220 momikilijkej ompa Estados Unidos keman kintatoponilijkej itech tonalmej keman iluichiujtoyaj porin ajsiskia tonal 4 metsti julio” (5 metsti julio xiuit 2022, CBS News).

 ¿Uelis tikchiaskej maj amo mochiuaok nochi nejon tein amo kuali? ¿Toni kijtoua Biblia?

 Biblia kijtoua ke tinemij “itech tonalmej keman tatamitiya”, keman miakej kinchiuiliaj oksekin tein tel fiero uan senkis kichiuaj tein tel amo kuali (2 Timoteo 3:1, 3). Keman kichiuaj nejon, tel tamojmoujtiaj (Lucas 21:11). Sayoj ke Biblia kijtoua ke ejkos tonal keman amo akinok kinchiuilis oksekin tein amo kuali, uan nochin nemiskej “kampa onkak yolseuilis, itech kalmej kampa amo teyi kinpanos uan kampa kualtsin moseuiskej” (Isaías 32:18). Sayoj ke, ¿keniuj ixpoliuis tein amo kuali tein kinchiuiliaj oksekin?

 Dios kinixpolos akin amo yolkualmej uan nochi tein ika tateuiaj.

•   “Akin amo yolkualmej ixpoliuiskej itech taltikpak” (Proverbios 2:22).

•   “[Dios] kitamia neteuilismej noyampa taltikpak. Kiposteki arco uan kikojkotona lanza, kintatia carros tein ika tateuiaj” (Salmo 46:9).

 Dios kinmachtis maj kuali mouikakan, uan ijkon senkis kiixpolos tein kichiua maj moteuikan.

•   “Amo taijtakoskej nion tauejueloskej itech nochi notepeuj tein yektik, porin akin kiixmatiskej Jehová kipexontiskej taltikpak ijkon kemej ueyiat pexontok ika at” (Isaías 11:9).

•   Itech nejin tonalmej, noyampa taltikpak, Dios kinmachtia miakej maj amo tateuikan nion maj kikuikan teposmej tein ika se tateuia, uan maj kichiuakan “ininespadas teposmej tein ika talkaxaniaj uan ininlanzas [...] kemej tein ika se kitejteki xiuit” (Miqueas 4:3).

 Biblia kijtoua ke itech taltikpak amo akin moujkanemisok. Komo tikonneki tikonmatis okachi, xikonlero tamachtilis “¿Es posible librarse del miedo?”

 Para okachi tikonmatis keniuj senkis ixpoliuis tateuilis uan nochi tein amo kuali tein techiuiliaj, xikonlero tamachtilis “¡Por fin paz en la Tierra!”