Miakej kimoujkaitanij maj sekin motemakanij tapaleuiskej itech kalchiualis ompa Warwick. Se takat akin kiixyekana se empresa akin kitalito elevadores kiluij se akin ompa tekititoya: “Nankichiujtokej se ueyi tekit. Axkan, amo miakej motemakaj tekitiskej uan maj amo kintaxtauikan”.

Nejin takat uan oksekin kimatkej ke akin okachi tapaleuiskiaj ompa Warwick (Nueva York), maj mochijchiua kali kampa moixyekanaskia tekit tein kichiuaj itaixpantijkauan Jiova, kichiuaskiaj ika miak pakilis uan amo kichiayaj maj kintaxtauikan. Yejuan kinemilijkej ke sayoj yaskiaj itaixpantijkauan Jiova akin ompakauin nemij uan sayoj itamian semana. Sayoj ke kimoujkaitakej ke miakej akin tapaleuitoj, ualeuayaj noyampa ueyi altepet uan sekin kikaujkaj inintekiuj uan ijkon tapaleuiskiaj seki metsti oso hasta seki xiujmej.

Hasta itamian xiuit 2015, tekitikajya kemej 23,000 itaixpantijkauan Jiova iniuan akin tapaleuiaj itech kali Betel ompa Warwick, Estados Unidos. Uan no, kemej 750 kalchijchiuanij akin amo itaixpantijkauan Jiova tapaleuijkej maj motamichijchiua kali keman moixtalijka. Yejuan tel kuali kiitakej nochi tein kichiuaj itaixpantijkauan Jiova.

Se takat akin kinixyekana akin kitaliaj ventanas uan tepamit kijkuiloj: “Nochin akin nouan tekitij uan tapaleuianij itech nejin tekit kimoujkaitanij yolpakilis tein kinextiaj akin nikan tekitij. Yejua ika timiakej tiknekij tiksentokaskej nikan”.

Eyi tekitinij akin tapaleuijkej maj mochijchiuakan kalmej ompa Warwick, kiixtalijkej kisentokaskej tekitiskej ompa. Yejua ika, keman empresa kampa tekitiaj tamik itekiuj ompa, yejuan kikaujkej uan peuak tekitij itech okse empresa tein kisentokaya tekitia ompa.

Miakej akin ompa tekitiaj kintelpaleuij kiitaskej tein kuali tein kinextiaj itaixpantijkauan Jiova. Kemej neskayot, se takat tekitia itech se empresa tein kintsinpeualtia kalmej. Satepan ke tekitik Warwick miak metsti, inamik kiitak ke kipatakaya kemej monejnemiltiaya uan kemej tajtouaya ikalijtik. Siuat kijtoj ika miak yolpakilis: “¡Semi mopatakya!”.

Miakej akin tapaleuiayaj katkaj siuamej. Amo sayoj kinejnemiltiayaj autobuses, tachipauayaj kampa oksekin kochiaj oso tajkuilouayaj, ta no kinextiaya kanikauin yaskej teposmej, kinejnemiltiayaj uejueyi teposmej, kiyektaliayaj cables de fibra óptica uan tuberías, kitaliayaj yeso, tekitiaj itech plomería uan kitekayaj mezcla. Chikauak tekitiaj.

Se takat akin amo itaixpantijkauj Jiova akin kinpantsakuaya kalmej, kiitak ke keman sekin namikuanij temouayaj itech autobús, momakitskijtiayaj hasta ajsiskej kampa tekitiaj. Nejon kiyolpaktij. No kiitak ke siuamej semi tekitiaj. Yejua kijtoj: “Yekinika, moitaya ke sayoj yayaj iuan ininnamik. Sayoj ke keman peuayaj tekitiaj, ¡amo moseuiayaj! Nikalchijchiuani miakkan itech altepet Nueva York uan amo keman nikitani se taman kemej nejon”.

Semi taseseyak itamian xiuit 2014 hasta ipeujyan xiuit 2015. Yejua ika okachi se kinekia se mokauas kalijtik uan amo se tekititiuj. Jeremy, se itaixpantijkauj Jiova akin kiitaya tekit tein mochiuaya, kijtoua: “Kemansa, keman okachi taseseyaya, se takat akin kiixyekanaya empresa tein kitsinpeualtiaya kalmej nechtajtaniaya:

”Satepan kijtoj ke kiniluijka takamej akin kitekitiliayaj ke monekia tekitikiuij porin siuamej akin itaixpantijkauan Jiova no ualaskiaj”.

Mojmostaj monekia kinkuitiuij tapaleuianij kampa mokauayaj uan kinuikaskej ompa Warwick, uan tiotak monekia kinkauatiuij. Yejua ika kintemojkej 35 akin kinejnemiltiskiaj autobús.

Achto ke se takat kinejnemiltiskia autobús, moketsak uan kiniluij akin kinuikaya: “Nikuelita namechuikas, yejua ika, ika kualtakayot, xiktajkuilouilikan akin niktekitilia maj nechkaua maj niksentoka nikan. Namejuan nanechmachtianij miak taman tein kijtoua Biblia. Kemej neskayot, achto ke namechixmatiskia, amo nikmatia itokay Dios, nion ke taltikpak yeski se xochital. Uan no, amo nikmouiliaok nimomikilis. Semi kuali tein nikpanok. Tonal keman nimoseuis nanechitaskej itech nechikol”.

Damiana, se itaixpantijkauj Jiova akin tekitik Warwick, kijtoj: “Se tonal, satepan ke nitejkok itech autobús, akin kinejnemiltiaya kinekik techiluis teisa. Kijtoj ke kinualkuikaya uan kinuikakaya 4,000 itaixpantijkauan Jiova itech kalmej tein tikpiaj ompa Nueva York, uan kijtoj: ‘Nochin tataman titamatij, sayoj ke namejuan nankiyektaliaj kuejmolmej tein nankipiaj uan nansentekitij. Nejon semi kualtsin’. No kijtoj ke semi kiuelitaya tajtos touan.

”Keman tamitajtoj, se siuat itaixpantijkauj Jiova kitajtanij: ‘¿Tikonuelita maj timokuikatikan?’.

”Takat ueuetskak uan kijtoj: ‘Kemaj, ¿tipeuaj ika nekuikatil 134?’”. a