“Komo tikonneltoka ke Biblia yejua iTajtol Dios, no tikonneltoka ke Dios technojnotstok [...]. Komo tikonneltoka ke Biblia yekmelauj mitsonpaleuia mojmostaj, motelneki maj Biblia ijkuiliujto kemej yekmelauj se tajtoua”. Yejua nejon tein kijkuiloj se takat akin itokay Alan Stewart Duthie itech iamatajkuilol Bible Translations and How to Choose Between Them (Tataman Biblias tein onkak uan keniuj tikixpejpenaskej se).

Akin kipatiuitaj iTajtol Dios no ijkon kinemiliaj. Kineltokaj ke “nochi tein ijkuiliujtok itech Tajkuilolamatsin ualeua imako Dios, uan tapaleuia para titamachtiskej, para technextilis tein amo kuali yetok, para se kiyektalis nochi uan para techpaleuis maj tiktakamatikan itanauatiluan Dios” (2 Timoteo 3:​16). Biblia amo sayoj se amatajkuilol tein moijkuiloj ne uejkaujya, ta “yoltok uan semi chikauak”, porin techpaleuia maj tikmatikan toni tikchiuaskej keman tikpiaj ouijkayomej (Hebreos 4:​12). Sayoj ke, para maj nochin kiajsikamatikan uan maj kichiuakan tein ompa kijtoua, moneki ijkuiliujtos kemej yekmelauj tajtouaj.

Yejua ika, akin kipatiuitaj iTajtol Dios kinekij namechmatiltiskej ke yetokya ITajtol Dios para akin nemiskej keman Dios taixyekantos (Mateo-Apocalipsis) itech náhuatl del norte de Puebla. Itaixpantijkauan Jehová kikixtijkej nejin Biblia itech tonal 5 metsti junio xiuit 2022. Nejin Biblia kualtsin moajsikamati uan kipia nochi tanemililmej tein Dios kineki maj tikmatikan. Amo onkani se Biblia ijkon itech totajtol. Sayoj ke xa tionmotajtania, ¿akonimej kitajtolkepkej?

ITajtol Dios para akin nemiskej keman Dios taixyekantos (Mateo-Apocalipsis) yankuixtok kisak itech náhuatl del norte de Puebla. Sayoj ke, tein melauj ipa yetoyaya desde 1950. Ijkuak, nechikol tein monotsa Watch Tower Bible and Tract Society kikixtij itech tajtol inglés. Nejin nechikol miak xiujmejya tapaleuiani maj mokixti Biblia itech miak tataman tajtolmej itech nochi taltikpak. Itech amaix La Atalaya 1 de febrero de 1951, kijtoua: “Akin kitajtolkepaj Biblia [...] amo kinekij maj moteixmatilti inintokay keman yoltoskejok nion keman momikiliskej. Nejin Biblia mokixtij sayoj para kiueyitalis itokay akin yekmelauj Dios akin nochipa yoltok”.

Itech xiuit 1961 mokixtij nochi Biblia Traducción del Nuevo Mundo de las Santas Escrituras. Uan maski hasta axkan amo motematiltiani akonimej kitajtolkepkej, tikyekmatij ke yejuan kiueyichiuaj Dios ika nochi ininyolo. Biblia tein mokixtij itech xiuit 2013 kijtoua kampa peua: “Kemej tikmatij ke tein Dios techiluia itech Biblia semi moneki, oksepa tikyekitakej tein kijtoua porin semi tikpatiuitaj. Tikitaj ke motelneki maj kuali moajsikamati […]. Timochikaujkej maj nejin Biblia kipia nochi tanemililmej tein ijkuiliujtoyaj itech hebreo uan griego, uan maj amo teouijmaka se kileros”.

Biblia ITajtol Dios para akin nemiskej keman Dios taixyekantos, mokixtiani nochi oso sayoj tajko. Hasta axkan, itech nochi taltikpak mokixtiani kemej 245 millones, itech 224 tataman tajtolmej. ¿Toni kipia nejin Biblia?

Jesús kiniluij imomachtijkauan maj motataujtikan ijkuin: “ToTajtsin akin tietok ne iluikak, maj nochin kiitakan ke motokay semi ueyi” (Mateo 6:9). Biblia kijtoua ke Dios monotsa, Jehová uan ixnesi kemej 7,000 viajes (Éxodo 3:​15; Salmo 83:18). Satepan ke itatitaniluan Jesús momikilijkej, miakej judíos akin amo kinekiaj kikuiskej itokay Dios, kichiujkej maj itatojtokakauan Cristo amo no kikuikan (Hechos 20:29, 30; 1 Timoteo 4:1). Akin kimaijkuilouayaj seki tajkuilolmej tein yetoyaj itech tajtol griego, peujkej kiixpataj itokay Dios, Jehová, uan kitaliliaj “Dios” uan “ToTekotsin”.

Akin kitajtolkepkej Traducción del Nuevo Mundo, oksepa kijkuilojkej itokay Dios, Jehová, 237 viajes itech iTajtol Dios itech tajtol griego. Oksepa kijkuilojkej amo porin ijkon kinekkej, ta porin kuali kitemojkej kani kinamikia yas. Tein ijkuiliujtok itech Isaías 61:1 no ixnesi itech Lucas 4:​18. Itech tajtol hebreo, itokay Dios, Jehová, ixnesi itech Isaías. Yejua ika, itech Lucas 4:18 itech ITajtol Dios para akin nemiskej keman Dios taixyekantos kinamiki maj kitajtolkepanij ijkuin: “Jehová nechmakak ichikaualis, porin yejua nechijitak para nikinmatiltis kuali tanauatilmej pobres”.

Nejon tapaleuia maj se kimati akoni Jehová uan akoni Jesucristo, iKoneuj Dios. Miak biblias kitajtolkepaj Mateo 22:44 ijkuin: “ToTekotsin kiluij toTekotsin” (Reina-Valera, 1995). ¿Sayoj ke akoni kinojnotstokej? Tein melauj nejin tajkuilol mokixtia itech Salmo 110:1, uan itech tajtol hebreo ixnesi itokay Dios. Yejua ika, itech ITajtol Dios para akin nemiskej keman Dios taixyekantos itech Mateo 22:44 motajtolkepak ijkuin: “Jehová kiluij noTekotsin”. Amo ouij se kimati akoni Jehová uan akoni Jesucristo (Marcos 13:32; Juan 8:​17, 18; 14:28). Para uelis timomakixtiskej moneki tikmatiskej akoni Jehová, porin Hechos 2:​21 kijtoua: “Akin kitataujtis Jehová maj kipaleui uan kinotsas ika itokay, makisas”.

Akin kitajtolkepkej nejin Biblia semi mochikaujkej maj kipia nochi tanemililmej tein yetok itech tajtol griego, uan maj kuali moajsikamati. No mochikaujkej kitaliskej tajtolmej tein kinamikia uan moijtos ox teisa mochiuak, mochiujtok oso mochiuati, ijkon kemej miak tajtolmej tein axkan mokuij. Itech tajtol griego no moijtoua ke teisa mochiujtiuetsi, mochiuakya oso mochiujtokok. Maj tikitakan tein Jesús kijtoj itech Mateo 6:33. Tajtol griego tein ijkuiliujtok kemej “nochipa xiktayekanaltikan” kiteajsikamatiltia teisa tein kisentoka mochiua. Yejua ika, tein Jesús kijtoj kuali moajsikamati ijkuin: “Nochipa xiktayekanaltikan iTaixyekanalis Dios uan tein yejua kijtoua ke kuali yetok. Komo nankichiuaj nejon, Dios no namechmakas nochi tein namechpoloua”. Itech Mateo 7:7 no kijtoua: “Xiksentokakan xitajtanikan uan namechmakaskej, xiksentokakan xiktemokan uan nankiajsiskej, xiksentokakan xitakakalatsakan uan namechtatapouiliskej” (Romanos 1:​32; 6:2; Gálatas 5:​15).

Nejin Biblia kipia tajtolmej tein okachi miakej kikuij uan okachi kuali moajsikamatij kemej nejin: achto mokuia tajtol “Jiova”, sayoj ke axkan mokui tajtol “Jehová” porin ijkon okachi miakej kiixmatij; tajtol “tekiuajyot” axkan motajtolkepak kemej “taixyekanalis”, uan tajtol “yektikatsin espíritu” motajtolkepak kemej “ichikaualis Dios”. Tajtol griego kosmos, tein motajtolkepaya kemej “taltikpakneminij”, axkan motajtolkepak ijkon kemej kinamikia itech sejse tajkuilol, kemej “akin nemij nikan taltikpak”, “taltikpak” oso okseki tajtolmej. Ijkon moixtalij para maj okachi kuali moajsikamati.

Amo sayoj moixtalijtok mokixtis iTajtol Dios itech tajtol griego itech náhuatl del norte de Puebla, ta no nochi Biblia. Sayoj ke, ¿kipias nochi tanemililmej tein kipia Biblia itech tajtol inglés uan kuali moajsikamatis?

Kemaj, porin nochi tekit tein mochiuak itech nejon Biblia kiixyekankej Oloch Taojtokaltianij akin kinixyekanaj iTaixpantijkauan Jehová. Yejuan kiixtalijkej maj amo sayoj se kichiua nejin tekit, ta maj miakej mosenpaleuikan (Proverbios 11:14). Yejua ika, itech nochi taltikpak kinixtalijkej seki tokniuan maj kitajtolkepakan Biblia itech tataman tajtolmej. Itech kali Betel ompa Estados Unidos yetokej seki tokniuan akin tapaleuiaj itech Servicios de Traducción. Yejuan kinpaleuiaj akin kitajtolkepaj Biblia para maj kipiakan nochi tein monekis, uan kinpaleuiaj maj kiajsikamatikan tein kinouijmaka kiajsikamatiskej. No tapaleuiaj maj nochin akin kitajtolkepaj Traducción del Nuevo Mundo itech tataman tajtolmej kichiuakan tekit kemej ixyetok. No kipiaj se programa itech computadora tein kinpaleuia akin kitajtolkepaj Biblia. Nejin programa tapaleuia itech miak taman, kemej kinextis keniuj motajtolkepak itech tajtol inglés sejse tajtol hebreo uan griego, tein kinpaleuij maj kimatikan katiyejua tajtol kinamiki mokuis. Maski nejin programa amo nochi ueli kichiua, semi kinpaleuia akin kitajtolkepaj Biblia maj kitajtolkepakan Traducción del Nuevo Mundo ijkon kemej yetok itech tajtol inglés uan maj no kuali moajsikamati.

Timitsonyoleuaj xionmomachti ITajtol Dios para akin nemiskej keman Dios taixyekantos (Mateo-Apocalipsis). Uelis tikonitas itech jw.org oso itech aplicación JW Library, oso uelis tikoniluis itaixpantijkauan Jehová maj mitsonmakakan se. Tikonitas nochi tein kualtsin tein kipia. Kipia kualtsitsin uan uejueyi letras. Achto ke peuas sejse amatajkuilol, tikonitas ke kipia tein ika tajtoua tein mitsonpaleuis amo ouij xikonajsi seki tajkuilolmej tein tikonnekis. No kipia miak taman tein mitsonpaleuis. Sayoj ke tein okachi tayekantok yejua nejin: keman tionmomachtis nejin Biblia uelis tikonyekmatis ke ompa ijkuiliujtok nochi tanemililmej tein Dios kineki techmatiltis kemej yekmelauj titajtouaj.