Ompa México uan itech makuil altepemej tein pouij Centroamérica, kemej 290 itaixpantijkauan Jiova tapaleuiaj maj motajtolkepa amaixmej tein ika tajtouaj Biblia itech panoua 60 tataman tajtolmej. ¿Keyej moneki maj mochiua nejin tekit? Porin keman aksa kiixtajtoltia se amaix itech itajtol, okachi niman kiajsikamati uan tamachtilis ajsi itech iyolo (1 Corintios 14:9).

Kemej monekia maj okachi kuali motajtolkepakan toamaixuan, sekin tajtolkepanij akin tekitiaj kampa moixyekana tekit tein kichiuaj itaixpantijkauan Jiova itech altepet México, yajkej kampa motajtoua inintajtol. Axkan, okachi yetokej iniuan akin no tajtouaj inintajtol. Nejon kinpaleuia maj kitajtolkepakan amaixmej kemej amo ouij moajsikamatiskej.

¿Keniuj kiitaj tajtolkepanij nejin tein moixtalij mochiuas? Federico, akin kitajtolkepa amaixmej itech náhuatl de Guerrero, kijtoj: “Kemej itech majtakti xiuit tein ninemik altepet México, sayoj nikajsik se kalyetouanij akin tajtouayaj notajtol. Sayoj ke kampa axkan titekitij nochin tajtouaj notajtol”.

Karin, akin kitajtolkepa amaixmej itech bajo alemán uan mokaltalito ompa Chihuahua (México), kijtoua: “Ninemis iniuan menonitas nechpaleuia maj okachi nikixmati keniuj motekitiltiaj tajtolmej mojmostaj. Tinemij uan titekitij itech se xolal tein amo ueyi uan keman titachiaj kalixpan, tikinitaj akin kinpaleuis tekit tein tikchiuaj”.

Neyfi, akin kitajtolkepa amaixmej itech maya uan axkan nemi ompa Mérida (México), kijtoua: “Keman titamachtiaj ika Biblia itech tajtol maya, ueli tikitaj tajtolmej tein amo kiajsikamatij. Nejon techpaleuia maj tiktemokan keniuj okachi kuali tiktajtolkepaskej tajtolmej”.

¿Keniuj kinpaleuia amaixmej akin kiixtajtoltiaj itech inintajtol? Maj tikitakan se neskayot. Kemej cuarenta xiujmej, Elena, akin tajtoua tlapaneco, yaya ininnechikoluan itaixpantijkauan Jiova tein mochiuayaj itech tajtol español. Sayoj ke amo kiajsikamatia tein motamachtiaya. Yejua kijtoua: “Niyaya nechikolmej porin nikmachiliaya ke monekia ompa niyetos”. Sayoj ke keman peuak momachtia Biblia ika amaixmej itech itajtol, okachi kitasojtak Dios uan hasta kimaktilij inemilis uan moauij itech xiuit 2013. Elena kijtoua: “Niktasojkamatilia Jiova porin nechpaleuij maj nikajsikamati tein melauak”.