¿Tlen uelis nikchiuas para ayakmo nimomajmachilis (masturbación)?
TLAMACHTIL 25
¿Tlen uelis nikchiuas para ayakmo nimomajmachilis (masturbación)?
Se telpochtli tlen itoka Luis okijto: “Opejki nimomajmachilia ijkuak onikpiaya chikueyi xiuitl. Satepan onikmatki ken okitaya toTajtsin Dios uan desde ijkuakon amo kuali onimomachiliaya, onimoyolkokouaya ijkuak oksepa ijkon onikchiuaya. Onimokuayejyekouaya toTajtsin Dios amo keman nechtlasojtlaskia”.
TELPOCHMEJ okachi kinekij motekaskej iuan ikaj, ik non, sekimej momajmachiliaj. a Xamo sekimej kijtouaj amo tlajtlakoli uan amikaj kitlajyouiltiaj. Pero onka seki tlamantli tlen mitspaleuis xikajsikamati amo kuali ijkon tikchiuas, xikita tlen okijkuilo apóstol Pablo: “Xikpojpolokah tlan amo kuali kelewia nomokuerpo. Amaka [...] mamotemaka imak tlan amokuali kelewia ikuerpo” (Colosenses 3:5). Tla timomajmachilis, okachi tiknekis iuan ikaj timotekas uan noijki kichiuas:
● San motech ximokuayejyeko uan san te ximoyolpakti.
● Xikinmita oksekimej ken amitlaj inpati uan san tiknekis inmiuan timotekas para timoyolpaktis.
● Amo xiyolpaki ijkuak timotekas iuan monamik noso mosiua porque san motech timokuayejyekojtos.
Para amo timomajmachilis uan san te timoyolpaktis, moneki tikmatis timonauatis (1 Tesalonicenses 4:4, 5). ¿Ken uelis tikchiuas? Biblia kijtoua amo xiyeto kanin uelis tiknekis iuan ikaj timotekas (Proverbios 5:8, 9). Pero ¿tlen uelis tikchiuas tla yitimomajmachilia? Xamo ayakmo tikneki ijkon tikchiuas pero amo ueli tikkaua. Xamo timosotlaua uan timokuayejyekoua amo uelis tiktlakamatis toTajtsin Dios. Ijkon omokuayejyekouaya se telpochtli tlen itoka Pedro. Ye okijto: “Sapanoua onimoyolkokouaya ijkuak oksepa onimomajmachiliaya. Onikijtouaya toTajtsin Dios amo nechtlapojpoluiskia nion nechkakiskia ijkuak niktlatlaujtiskia”.
Amo ximoyolkoko tla ijkon mitspanoua. Amo ximokuayejyeko amo uelis timonauatis. Axkan miakej kuali monauatiaj uan ayakmo momajmachiliaj. Te noijki uelis ijkon tikchiuas.
¿Timoyolkokoua?
Yotikitakej ualeua akinmej momajmachiliaj sapanoua moyolkokouaj (2 Corintios 7:11). Kuali tla ijkon timomachilia porque non mitspaleuis ayakmo ijkon xikchiua. Pero tla sapanoua timoyolkokoua, uelis kichiuas ayakmo ximochijchikaua tikkauas (Proverbios 24:10).
Ximokuayejyeko amo kuali timomajmachilis porque non pitsotik uan kichiua xikneki xiauilnemi, noijki uelis kichiuas satepan xitlajyoui (Tito 3:3). Nin amo sapanoua tlajtlakoli ken ijkuak ikaj auilnemi (Judas 7). Ik non, amo ximokuayejyeko toTajtsin Dios amo mitstlapojpoluis tla timomajmachilia. Pero ipati ximochijchikaua para amo ijkon xikchiua uan amo ximosotlaua.
Amo ximoyolkoko tla oksepa timomajmachilia. Xikilnamiki tlen kijtoua Proverbios 24:16: “Akin yolmelauak uelis uetsis chikome uelta uan oksepa moketsas pero akin amo yolkuali kiuetsitis tlajyouilistli”. Tla tikchiuas itlaj amo kuali, amo kijtosneki amo tiyolkuali. Pero ximokuayejyeko tleka ijkon otikchi uan tlen tikchiuas para amo oksepa timomajmachilis.
Ximokuayejyeko ken mitstlasojtla uan mitsiknomati toTajtsin Dios. David okimatiaya sapanoua teyolkoko ijkuak titlajtlakolchiuaj, ik non, okijkuilo: “Ijkon ken se teta kinmiknomati ikoneuan, Jehová kinmiknomati akinmej kitlakaitaj. Porque ye kuali kimati ken otechchijchi uan kilnamiki tejuan titlali” (Salmo 103:13, 14). ToTajtsin Dios kimati tejuan titlajtlakolejkej, ik non, ‘kineki techtlapojpoluis’ (Salmo 86:5). Pero ye kineki ma timochijchikauakan para ayakmo ijkon ma tikchiuakan. Ma tikitakan tlen uelis mitspaleuis para ayakmo timomajmachilis.
Xikita tlen ika timoyolpaktia. ¿Tikinmita películas noso tikalaki itech internet uan tikita itlaj tlen kichiuas xikneki xiauilnemi? Se salmista okilui toTajtsin Dios: “Xikchiua noixtololouan matlachiakan oksekan para amo makitakan tlen amo itlaj ipati, xikchiua maniyolto itech moojui” (Salmo 119:37). b
Ximokuayejyeko okse tlamantli. Xikchiua ijkon ken okijto se iTlaixpantijka Jehová tlen itoka William: “Ijkuak yitikochis xiktlajtolti Biblia uan ximokuayejyeko itech toTajtsin Dios uan iTlajtol” (Filipenses 4:8).
Xikilui ikaj ma mitspaleui. Maski sapanoua tipinaua, ikaj xikilui tlen mitspanotok. Nin mitspaleuis ayakmo ijkon xikchiua. Ijkon okichi se telpochtli tlen itoka David: “Onikilui notajtsin. Amo keman nikilkauas tlen onechilui. Okimatiaya oui onechchiuili niktlapouis, oixuetskak uan onechilui: ‘Tlasojkamati porque otechtlapoui’. Sapanoua onechyolchika tlen onechilui, ik non, onimochijchika ayakmo nimomajmachilis”.
“Maski achto onechtlajtoltili seki textos para amo sapanoua ma nimoyolkoko, satepan noijki onechtlajtoltili okseki textos para ma nikajsikamati amo kuali tlen onikchijtoka. Onechilui ma nimochijchikaua ayakmo ijkon nikchiuas hasta ijkuak oksepa iuan nimotlapouiskia. Pero tla oksepa ijkon nikchiuaskia, onechilui amo ma nimoyolkoko uan ma nimochijchikaua para amo oksepa ijkon nikchiuaskia”. ¿Tlen okajsikamatki David? Ye okijto: “Notajtsin onechpaleui porque onikilui tlen onechpanotoka”. c
¿Tlajtlakoli tla timotekas iuan ikaj san para timoyolpaktis?
[Notas]
a Se tlamantli kijtosneki momajmachiliaj kanin amo moneki porque yejuan ijkon kinekij. Pero ualeua sekimej telpochmej ijkuak kochij, kipiaj semen tlen yetoskia ken ikaj iuan omotekakej pero san inselti ijkon panoua. Sekimej ichpochmej ijkuak yikipiaskej imenstruación noso yopanok kinekij iuan ikaj motekaskej. Masturbación kijtosneki ijkuak ikaj momajmachilia porque ijkon kineki.
b Tla tikneki okachi tikmatis xikita tlamachtil 33 volumen 2.
c Tla tikneki okachi tikmatis xikinmita páginas 239 hasta 241 itech volumen 2.
TEXTO TLEN MONEKI TIKILNAMIKTOS
“Xikcholili tlan amokuali kinyoltilana n telpokameh. Te nochipa xikchiwa tlan kuali, nochipa xitlaneltoka, iwa ika tlasojtlálistli iwa yolsewílistli ximowika iwa akimeh ika inyolo chipawak kitenewah itokah n Toteko” (2 Timoteo 2:22)
NIN UELIS TIKCHIUAS
Xikilui Jehová ma mitspaleui para amo timomajmachilis. Xiktlatlaujti ma mitsmaka iespiritu santo para amo titlajtlakolchiuas (2 Corintios 4:7).
¿OTIKMATIAYA?
Amo oui tikchiuas tlen mitsyoltilanas. Pero tla kuali timouika iuan toTajtsin Dios timochijchikauas para amo ijkon tikchiuas maski amikaj mitsitas.
¡MA TIKCHIUAKAN!
¿Tlen uelis nikchiuas para nimokuayejyekos tlen chipauak? ․․․․․
¿Ken uelis nikchiuas para amo oksepa nimomajmachilis? ․․․․․
¿Tlen nikneki nikintlajtlanis notatajuan? ․․․․․
¿TLEN TIMOKUAYEJYEKOUA?
● ¿Ken mitspaleuis xikilnamiki Jehová ‘kineki mitstlapojpoluis’? (Salmo 86:5).
● ToTajtsin Dios otechchijchi para tiknekiskej ikaj iuan timotekaskej pero mitsiluia amo san itech non ximokuayejyekojto, ¿uelis ijkon tikchiuas?
[Tlen moijtoua]
Se ichpochtli tlen itoka Sara okijto: ‘‘Ijkuak onimochijchika ayakmo nimomajmachilis, notlalnamikilis ayakmo onechkuejso uan axkan kuali nimomachilia’’
[Foto]
Ijkuak timotlaloua uan tiuetsi, timoketsa uan oksepa timotlaloua. Noijki ijkon, tla oksepa timomajmachilia amo kijtosneki amo ipati nochi tlen yotikchi
Xamo noijki mitspaktis
TELPOCHMEJ UAN ICHPOCHMEJ
Nin kinpaleuis telpochmej uan ichpochmej
Nikan uelis tikmatis tlen kijtoua Biblia itech alcohol, drogas, sexo, ken moneki tikpiaskej toyelis uan ken uelis tikmatis kox yiuelis tikpias monovio noso monovia.
