TLAMACHTIL 37

¿Yiuelis nimoapolaktis?

Xikijto kox melauak noso amo melauak:

Nochtin akinmej kichiuaj ken Cristo moneki moapolaktiskej.

□ Melauak

□ Amo melauak

Tla timoapolaktis mitspaleuis amo xitlajtlakolchiua.

□ Melauak

□ Amo melauak

Tla timoapolaktis mitspaleuis para timomakixtis.

□ Melauak

□ Amo melauak

Tla amo nimoapolaktis, toTajtsin Dios amo nechixkomakas.

□ Melauak

□ Amo melauak

Moneki nimoapolaktis porque akinmej inmiuan nimouika yomoapolaktijkej.

□ Melauak

□ Amo melauak

¿TIKTLAKAMATI tlen kijtoua Biblia? ¿Timochijchikaua timouikas iuan toTajtsin Dios? ¿Tikintlapouia oksekimej tlen tikneltoka? Tla otikijto kema uan ayamo timoapolaktia, xamo timokuayejyekojtok timoapolaktis. Pero achto moneki tikmatis kox yiuelis ijkon tikchiuas. Uelis tikmatis tla tikita ken otitlanankili ijkuak opejki nin tlamachtil.

● Nochtin akinmej kichiuaj ken Cristo moneki moapolaktiskej.

Melauak. Jesús ijkon okinnauati idiscípulos ma kichiuakan (Mateo 28:19, 20, TNM). Ye noijki omoapolakti. Ik non, tla tikneki tikchiuas ken Cristo, noijki moneki timoapolaktis pero moneki kuali timokuayejyekos kox melauak tikneki ijkon tikchiuas.

● Tla timoapolaktis mitspaleuis amo xitlajtlakolchiua.

Amo melauak. Ijkuak timoapolaktiaj tikteititiaj yotimotemakakej ixpan Jehová. Timotemakaj ixpan Jehová porque tiknekij nochipa tiktlakamatiskej uan amo san para tikixtopeuaskej tlen amo kuali.

● Tla timoapolaktis mitspaleuis para timomakixtis.

Melauak. Biblia kijtoua moneki timoapolaktiskej para timomakixtiskej (1 Pedro 3:21). Pero nin amo kijtosneki timoapolaktiaj san porque amo tiknekij tiixpoliuiskej, timoapolaktiaj porque melauak tiktlasojtlaj Jehová uan tiknekij nochipa tiktekichiuiliskej ika nochi toyolo (Marcos 12:29, 30).

● Tla amo nimoapolaktis, toTajtsin Dios amo nechixkomakas.

Amo melauak. Santiago 4:17 kijtoua “akin kimati kichiwa tlan kuali, iwa amo kichiwa, tlajtlakolchiwah”, maski yomoapolakti noso amo. Ik non, ximokuayejyeko: ¿Tikajsikamati tlen kineki toTajtsin Dios xikchiua? ¿Melauak tikmati tlen tikneki tikchiuas itech monemilis? Tla tikijtos kema, ximotlapoui iuan motatajuan noso iuan se tokni akin kuali mouika iuan Jehová. Yejuan mitspaleuiskej tla tikneki timoapolaktis.

● Moneki nimoapolaktis porque akinmej inmiuan nimouika yomoapolaktijkej.

Amo melauak. Tla tikneki timoapolaktis, moneki san te tikpejpenas uan tikchiuas ika nochi moyolo (Salmo 110:3). Uelis ijkon tikpejpenas tla tikajsikamati ken moneki kipias inemilis se iTlaixpantijka Jehová uan tikmati uelis tikchiuas tlen otikilui Jehová (Eclesiastés 5:4, 5).

Tla timoapolaktis kipatlas monemilis

Tla timoapolaktis kipatlas monemilis, ijkon okachi uelis tiktekichiuilis toTajtsin Dios uan ye sapanoua mitsteochiuas. Pero moneki tikchiuas nochi tlen otikilui Jehová ijkuak ixpan otimotemakak.

¿Yiajsi tonal para timoapolaktis? Xamo sapanoua tiyolpaki. Porque otikpejpenki tiktekichiuilis Jehová ika nochi moyolo uan nochipa tiktlakamatis (Mateo 22:36, 37).

ITECH OKSE TLAMACHTIL

Xikita tlen okseki tlamantli mitspaleuis para okachi tiktekichiuilis Jehová.

TEXTO TLEN MONEKI TIKILNAMIKTOS

“Ximotemaktikah nomejwah nomonewiah kemi se tlamíktili non yolitok, chipawak ijkó kemi Ye kipaktia” (Romanos 12:1).

NIN UELIS TIKCHIUAS

Xikintlajtlani motatajuan akin uelis mitspaleuis okachi ximouika iuan Jehová (Hechos 16:1-3)

¿OTIKMATIAYA?

Ijkuak timoapolaktiaj yetoskia ken techtlaliliaj se “marca” tlen techpaleuis para uelis timomakixtiskej (Ezequiel 9:4-6).

¡MA TIKCHIUAKAN!

Nin moneki nikajsikamatis para uelis nimoapolaktis: ․․․․․

Tlen axkan otimomachtijkej, ¿tlen nikneki nikintlajtlanis notatajuan? ․․․․․

¿TLEN TIMOKUAYEJYEKOUA?

● ¿Tleka miak ipati timoapolaktiskej?

● ¿Tleka sekimej telpochmej uan ichpochmej san niman moapolaktiaj?

● ¿Tleka sekimej telpochmej uan ichpochmej ayamo kinekij moapolaktiskej?

[Tlen moijtoua]

Se ichpochtli tlen itoka Noemí okijto: “Ijkuak nikilnamiki ne yonimoapolakti, nechpaleuia para amo nikchiuas tlen amo kuali”.

[Recuadro uan foto]

tlen miakej motlajtlaniaj ijkuak kinekij moapolaktiskej

¿Tlen kijtosneki ijkuak ikaj kiapolaktiaj? Ijkuak kikalakiaj ijtik atl, yetoskia ken ixpoliui, porque ayakmo kichiuas san tlen ye kipaktia, non kijtosneki kipatlas inemilis. Uan ijkuak kisa, yetoskia ken oksepa moyolitia para kichiuas tlen Jehová kineki.

¿Tlen kijtosneki nimotemakas ixpan Jehová? Kijtosneki ayakmo tikchiuas san tlen te tikneki, axkan moneki tikchiuas tlen Jehová mitsnauatia (Mateo 16:24, TNM). Ik non, achto timoapolaktis moneki tiktlatlaujtis Jehová uan tikiluis nochipa tiktekichiuilis.

¿Tlen moneki nikchijtos achto nimoapolaktis? Moneki tikchijtos tlen kijtoua Biblia uan tikintlapouis oksekimej tlen tikneltoka. Ximomachti moselti uan ximotlatlaujti, non mitspaleuis para kuali timouikas iuan toTajtsin Dios. Moneki tiktekichiuilis Jehová porque ijkon tikneki uan amo porque ikaj mitsnauatia.

¿Keski xiuitl moneki nikpias para uelis nimoapolaktis? Maski san keski xiuitl tikpia uelis timoapolaktis pero moneki kuali tikajsikamatis tlen kijtosneki timotemakas ixpan Jehová.

¿Tlen nikchiuas tla nikneki nimoapolaktis pero notatajuan nechiluiaj ma nimochia? Xamo ijkon mitsiluiaj porque kitaj ok mitspoloua tikchiuas seki tlamantli tlen kijtoua Biblia. Amo ximotekipacho, okachi kuali ximochijchikaua para kuali timouikas iuan Jehová (1 Samuel 2:26).

[Recuadro]

Xikijkuilo tlen tikchiuas

¿tikneki timoapolaktis?

Nikan katej seki tlajtlanilmej tlen mitspaleuiskej xikmati kox yiuelis timoapolaktis. Achto titlanankilis xikintlajtolti textos.

¿Tikneltoka Jehová ika nochi moyolo? ¿Ken tikteititia? (Salmo 71:5). ․․․․․

¿Tikmati tlen kuali uan tlen amo kuali? ¿Keman ijkon yotikteititi? (Hebreos 5:14). ․․․․․

¿Nochipa timotlatlaujtia? ․․․․․

¿Tikmati tlen tikiluia Jehová? Tlen tikijtoua, ¿kiteititia tiktlasojtla Jehová? (Salmo 17:6). ․․․․․

¿Ken uelis okachi kuali timotlatlaujtis? ․․․․․

¿Nochipa timomachtia Biblia? (Josué 1:8). ․․․․․

¿Tlen okachi mitspaktia timomachtis moselti? ․․․․․

¿Tlen okseki tlamantli mitspaktiskia timomachtis noso tikchiuas? ․․․․․

¿Tikijtoskia kuali titetlapouia? (Ximokuayejyeko: ¿Tikmati tikyekijtos tlen tlamachtia Biblia? ¿Ijkuak ikaj kuali mitskaki oksepa tiaui? ¿Tikintemoua akinmej tikinmachtis ika Biblia?)

□ Kema □ Amo

¿Titetlapouia maski motatajuan amo ijkon kichiuaj? (Hechos 5:42).

□ Kema □ Amo

¿Tlen tikneki tikchiuas para okachi titetlapouis? (2 Timoteo 2:15). ․․․․․

¿Nochipa timonechikoua? (Hebreos 10:25). ․․․․․

¿Ken titlapaleuia ijkuak timonechikoua? ․․․․․

Tla motatajuan mitskauiliaj ximonechiko, ¿tiaui maski yejuan amo yauij?

□ Kema □ Amo

¿Mitspaktia tikchiuas tlen Jehová kineki? (Salmo 40:8).

□ Kema □ Amo

¿Tlen otikchi ijkuak okinekiayaj xikchiua tlen Jehová amo kipaktia? (Romanos 12:2). ․․․․․

¿Tlen uelis tikchiuas para nochipa tiktlasojtlas Jehová? (Judas 20, 21, TNM). ․․․․․

¿Ok tiktekichiuilis Jehová tla motatajuan noso moyolikniuan ayakmo ijkon kichiuaj? (Mateo 10:36, 37).

□ Kema □ Amo

[Foto]

Tla tiknekij timoapolaktiskej moneki kuali timokuayejyekoskej porque yetoskia ken timonamiktiskej