Tlamachtil 13

Ken uelis tikajsis tlaneltokalistli tlen melauak

¿Kipaktia toTajtsin Dios nochtin tlaneltokalismej, noso san se? (1)

¿Tleka katej miakej tlaneltokalismej tlen kijtoaj kichiuaj ken Cristo? (2)

¿Ken uelis tikinmixmatis akinmej kichiuaj ken Cristo? (3-7)

1. Jesús okitlali san se tlaneltokalistli tlen melauak. Ik non, axan itech ninmej tonalmej noijki moneki yetos san se tlaneltokalistli tlen melauak kiueyichiua toTajtsin Jehová (Juan 4:23, 24; Efesios 4:4, 5). Biblia tlamachtia amo miakej yauij itech ojtli pitsauak tlen teuika itech nemilistli (Mateo 7:13, 14).

2. Biblia okijto satepan inmikilis tlatitlaniltin ajachitsin kalakiskiaj itech tlanechikol tlamachtilmej tlen amo melauakej uan noijki tlamantli tlen amo otlamachti Jesús. Yetoskiaj tlakamej tlen kinyoltilanaskiaj uan kinxeloskiaj itech Cristo (Mateo 7:15, 21-23; Hechos 20:29, 30). Ik non, tikinmitaj miakej tlaneltokalismej tlen kijtoaj kichiuaj ken Cristo. ¿Ken uelis tikinmixmatis akinmej melauak kichiuaj ken Cristo?

3. Tlen okachi moita itech akinmej melauak kichiuaj ken Cristo yejuan melauak motlasojtlaj (Juan 13:34, 35). Amo kinmachtiaj ma moueyimatikan noso ma kinchikoitakan oksekimej pampa ixchipajkej noso pampa tlajtoaj okse tlajtoli. Noijki amo kinmachtiaj ma kinkokolikan tlaltikpaktlakamej tlen uitsej itech oksekimej uejueyi altepemej (Hechos 10:34, 35). Ik non, amo mokajkalakiaj itech guerras. Nochtin akinmej melauak kichiuaj ken Cristo moitaj ken iknimej (1 Juan 4:20, 21).

4. Noijki akinmej katej itech tlaneltokalistli tlen melauak sapanoa kitlakaitaj Biblia. Kiseliaj ken iTlajtol toTajtsin Dios uan kineltokaj tlen kijtoa (Juan 17:17; 2 Timoteo 3:16, 17). Yejuan okachi kipatioitaj iTlajtol toTajtsin Dios uan amo tlen mokuayejyekoaj noso tlen kichiuaj tlaltikpaktlakamej (Mateo 15:1-3, 7-9). Mojmostla mochijchikauaj pampa kichiuaskej ijkon ken momachtiaj. Ik non, amo tetlapouiaj se tlamantli uan kichiuaj okse (Tito 1:15, 16).

 5. Akinmej katej itech tlaneltokalistli tlen melauak kitlakaitaj itoka toTajtsin Dios (Mateo 6:9). Jesús okitematilti itoka toTajtsin Dios, Jehová, uan akinmej melauak kichiuaj ken Cristo noijki moneki ma kitematiltikan (Juan 17:6, 26; Romanos 10:13, 14, NM). ¿Akinmej kitematiltiaj itoka toTajtsin Dios kanin tichanti?

6. Akinmej melauak kichiuaj ken Cristo moneki ma tetlapouikan itech iTekiuajkayo toTajtsin Dios. Jesús ijkon okichi. Ye nochipa otetlapouiaya itech Tekiuajkayotl (Lucas 8:1). Noijki, okinnauati imachtijkauan ma tetlapouikan non tlajtoli itech nochi Tlaltikpak (Mateo 24:14; 28:19, 20). Akinmej melauak kichiuaj ken Cristo kineltokaj san iTekiuajkayo toTajtsin Dios kiualikas tlen melauak yolseuilistli uan kichiuas ayakmo itlaj ma techmomojti (Salmo 146:3-5).

7. Imachtijkauan Jesús amo kichiuaj ijkon ken tlaltikpaktlakamej (Juan 17:16). Amo mokajkalakiaj iuan tekiuajkej nion tlateuiaj ijkuak tlaltikpaktlakamej moteuiaj. Amo kichiuaj tlen amo kuali, amo mokuayejyekoaj nion kichiuaj ijkon ken tlaltikpaktlakamej (Santiago 1:27; 4:4). ¿Tikixmati se tlaneltokalistli kanin tichanti tlen kiteititia melauak kichiua ken Cristo?

[Tlaixkopinalmej itech página 26 uan 27]

Akinmej melauak kichiuaj ken Cristo motlasojtlaj, kitlakaitaj Biblia uan tetlapouiaj itech iTekiuajkayo toTajtsin Dios