Tlamachtil 7

Ken uelis timijkuaniskej inauak toTajtsin Dios ika tlatlaujtilistli

¿Tleka moneki ma timotlatlaujtikan nochipa? (1)

¿Akin inauak moneki ma timotlatlaujtikan, uan ken tikchiuaskej? (2, 3)

¿Itech tlen tlamantin uelis timotlatlaujtiskej? (4) ¿Keman moneki timotlatlaujtiskej? (5, 6)

¿Kikaki toTajtsin Dios nochtin tlatlaujtilmej? (7)

1. Timotlatlaujtiskej kijtosneki timotlapouiskej iuan toTajtsin Dios ika yolyamanilistli. Moneki nochipa ma timotlatlaujtikan. Tla tikchiuaj timomachiliskej inauak ye ken se toyolikni akin tiktlasojtlaj. Maski Jehová ye ueyi uan kipia miak chikaualistli, ye kikaki totlatlaujtiluan. ¿Timotlatlaujtia nochipa inauak toTajtsin Dios? (Salmo 65:2; 1 Tesalonicenses 5:17.)

2. Ika tlatlaujtilistli tikueyichiuaj toTajtsin Dios. Ik non, moneki san inauak toTajtsin Jehová ma timotlatlaujtikan. Ijkuak Jesús okatka nikan Tlaltikpak san omotlatlaujtiaya inauak iTajtsin uan amo inauak  okse. Tejuan noijki ijkon moneki ma tikchiuakan (Mateo 4:10; 6:9). Moneki ma timotlatlaujtikan nochipa ika itoka Jesús. Ijkon tikteititiaj tiktlakaitaj tlen Jesús kichiua uan noijki tikneltokaj ye techmakixtia ika imikilis (Juan 14:6; 1 Juan 2:1, 2).

3. Ijkuak timotlatlaujtiaj inauak toTajtsin Dios, moneki timotlapouiskej iuan ika nochi toyolo. Amo moneki san tikueptoskej tlajtolmej tlen tikmatij nion tiktlajtoltiskej se amatl tlen kipia tlatlaujtilmej (Mateo 6:7, 8). Uelis timotlatlaujtiskej ijkuak timotlaliaj, timotlankuaketsaj noso ken tiknekiskej, ijkuak tiknekiskej uan kanin tiknekiskej, san moneki tiknextiskej tiktlakaitaj. ToTajtsin Dios noijki techkaki ijkuak timotlatlaujtiaj ichtaka itech toyolo (1 Samuel 1:12, 13). Moneki ma timotlatlaujtikan ijkuak tikatej toselti uan kanin amo itlaj techkuejsoa (Marcos 1:35).

4. ¿Itech tlen tlamantli uelis timotlatlaujtis? Itech nochi tlamantli tlen mitspaleuis ximouika kuali inauak Jehová (Filipenses 4:6, 7). Itech tlatlaujtilistli tlen otechititi Jesús, ye okijto ma tiktlajtlanikan ma moueyichiua itoka Jehová uan ma mochiua itlanekilis. Noijki uelis tiktlajtlaniskej ma techmaka tlen techpoloa, ma techtlapojpolui uan ma techpaleui amo ma tiuetsikan itech tlajtlakoli (Mateo 6:9-13). Amo ma tiktlajtlanikan san tlen tejuan tiknekij. San moneki tiktlajtlaniskej tlen ye kineki ma mochiua (1 Juan 5:14).

5. Tejuatsin uelis timotlatlaujtis ijkuak moyolo mitsolinis tiktlasojkamatilis toTajtsin Dios noso tikueyichiuas (1 Crónicas 29:10-13). Ijkuak tikpia tlajyouilistli noso ijkuak moyejyekoa motlaneltokilis, okachi ximotlatlaujti (1 Pedro 5:7; Salmo 120:1). Noijki ijkuak titlakuas, moneki ximotlatlaujti (Mateo 14:19). Jehová techyoleua ma timotlatlaujtikan “nochipa” (Efesios 6:18).

6. Tla tikchiuaj se ueyi tlajtlakoli, moneki san niman timotlatlaujtiskej inauak Jehová pampa ma techiknomati uan ma techtlapojpolui. ToTajtsin Dios “kineki techtlapojpoluis” tla tikiluiaj tlajtlakoli tlen yotikchijkej uan timochijchikauaj pampa ayakmo tikchiuaskej (Salmo 86:5; Proverbios 28:13).

7. Jehová kinkakilia intlatlaujtiluan san akinmej yolmelajkej. Pampa toTajtsin Dios kikakis motlatlaujtilis, moneki timochijchikauas pampa tikchiuas ijkon ken kijtoa Itlanauatiluan (Proverbios 15:29; 1 Pedro 3:12). Ijkuak timotlatlaujtis moneki tikchiuas ika yolyamanilistli (Lucas 18:9-14). Moneki tikchiuas ijkon ken tiktlajtlani itech motlatlaujtilis. Ijkon tikteititis tikpia tlaneltokilistli uan timotlatlaujtia ika nochi moyolo. Tla ijkon tikchiua, Jehová uelis kinankilis motlatlaujtiluan (Hebreos 11:6).