Xochitlal amo yetos ken axkan Tlaltikpak. ToTajtsin Dios amo kinekia ma yeto ouijkayotl, kokojkayotl uan tlajyouilistli ipan Tlaltikpak. Satepan, toTajtsin Dios kichiuas ma mokuepa Tlaltikpak se xochitlal. ¿Ken yetos? Ma tikitakan tlen techiluia Biblia.

Tlaltikpaktlakamej yolkualmej. Iyolikniuan toTajtsin Dios chantiskej itech Xochitlal. Nochtin mopaleuiskej uan nemiskej ken kineki toTajtsin Dios (Proverbios 2:21).

Yetos miak tlakuali. Itech Xochitlal amo akaj apismikis. Biblia techiluia: “Mach ok tiojsiuiskej iuan mach ok amikiskej” (Apocalipsis 7:16).

Kuali kalmej uan kuali tekitl. Itech Xochitlal, nochtin kipiaskej inkalijtik, uan nochtin kipiaskej se kuali tekitl tlen kinyolpaktis (Isaías 65:21-23).

 Yolseuilistli ipan nochi Tlaltikpak. Tlaltikpaktlakamej ayakmo moteuiskej nion mikiskej itech guerras. ITlajtol toTajtsin Dios techiluia: “ToTajtsin Dios kitlajtlamia guerras” (Salmo 46:8, 9).

Tlaltikpaktlakamej chikajtoskej. Biblia techyekiluia: “Nion se tlaltikpaktlakatl [itech Xochitlal] kijtos: ‘Nimokokoaʼ” (Isaías 33:24). Noijki amo onkas koxomej, tlen amo tlachiaj, tlen amo tlakakij nion tlen amo ueli tlajtoaj (Isaías 35:5, 6).

Ayakmo onkas yolkokolis, tekokojkayotl nion mikilistli. ITlajtol toTajtsin Dios techiluia: “Mach ok yetos mikilistle, nion chokilistle, nion neyolkokole, iuan nion tekokojkayotl, porque nochi tlan achtoj oyeka, yopanok” (Apocalipsis 21:4).

Ayakmo nemiskej tlaltikpaktlakamej tlen amo yolkualmej. Jehová techyekiluia: “Akinmej amo yolkualmej, kintlajtlamiskej ipan Tlaltikpak; uan tlen amo yolmelajkej, kinmixpoloskej” (Proverbios 2:22).

Tlaltikpaktlakamej motlasojtlaskej uan motlakaitaskej se iuan okse. Ayakmo yetos tlajyouilistli, tlauelitalis nion kinekiskej kipiaskej miak tlamantli, yetos melajkayotl. Tlaltikpaktlakamej kuali moyekuikaskej uan nemiskej ken toTajtsin Dios kineki (Isaías 26:9).