JEHOVÁ kimatia ke se tonal iKone tlen okachi kitlasojtla mikiskia. Ijkon okinekia teajsikamatiltis itech Génesis 3:15. Pampa kajsikamatiskiaj tlaltikpaktlakamej ken omoyolkokoskia ijkuak mikiskia iKone, toTajtsin Dios okichi ma moijkuilo itech Biblia tlen opanok ijkuak okitlajtlanili Abrahán ma kimikti itlasojkone Isaac.

Amo ma tikilkauakan ke toTajtsin Dios okilui ke non Temakixtiani kisaskia itech se ixui Isaac. Ye okineltokaya tlen Jehová okilui uan omotenmachiaya, ke tla monekiskia, toTajtsin Dios kiyolitiskia ikone. Ijkuak Abrahán kimiktiskia ikone ijkon okinexti itlakamatilis. Ijkuak kinekia kimiktis, Jehová okititlanki se ángel uan okili amo ma kimikti. Satepan Jehová okiueyichiuak Abrahán ika iueyitlaneltokilis uan okiyekilui kiteochiuaskia.

Satepan, Isaac okipixki ome ipiluan: Esaú uan Jacob. Itech yejuan ome, san Jacob okitlasojtlaya tlamantli espiritual uan ik non, okiteochijkej. ToTajtsin Dios okipatili itoka uan okitokanotsak Israel, uan imajtlaktli uan ome ikoneuan okiyekankej ichanejkauan Israel. Uan ¿ken omochi Israel se ueyi altepetl?

Nochi nin opejki ijkuak ikniuan José tlen tlayekanaj opejkej kipialiaj chauatilis. Melauak okikokoliayaj uan okinemakakej ken se tlakeual. Akinmej okikojkej okiuikakej Egipto, ompa okipanok miak ouijkayotl. Maski ijkon, toTajtsin Dios okipaleui nin telpoch yolmelajki uan yolchikauak, uan se tonal, faraón okitekimakak pampa tlayekanaskia itech itekiuajkayo. Non okikauili ma kinpaleui ichanejkauan ijkuak otlasojti tlakual, tlen okichi Jacob ma kintitlani sekimej ipiluan ma kikoatij tlakual ompa Egipto. ¿Akin okixejxeloaya tlakual? ¡Ye José! Ijkuak José uan ikniuan omotakej kimachilijkej miak pakilis —akinmej melauak yomoyolkuepkej— José kintlapojpoluia uan kinnauatia ma kinnotsati ichanejkauan. Faraón okinmakak tlali kanin okachi tlamochiuaya, uan ompa ichanejkauan okachi momiaktilijkej. José okasikamatki ke Jehová okitekauili ijkon ma pano pampa ma mochiua tlen ye okijtojka.

Jacob onemia Egipto, innauak akinmej okintlasojtlaya, nochtin tonalmej tlen oyoltoka. Achto mikiskia okijto ke in Temakixtiani yetoskia se ueyi Tekiua ika miak chikaualis tlen kisaskia itech Judá. Miak xiuitl satepan, José okijto ke toTajtsin Dios kinkixtiskia ichanejkauan Jacob itech Egipto.

(Okisak itech Génesis tlakotonaltin 20 a 50 uan itech Hebreos 11:17-22.)