TLAMACHTIL 80
Jesús okinpejpenki 12 itlatitlaniluan
Ijkuak Jesús yotetlapouijtoka kanaj se xiuitl uan tlajko, okipejpenki itlaj tlen miak ipati. ¿Akinmej iuan tekitiskiaj uan kiyekanaskiaj tlanechikol? Jesús okilui Jehová ma kipaleui ijkuak okipejpenki nin tlamantli tlen miak ipati. Ik non, oyajki iselti itech se tepetl uan nochi se yoak omotlatlaujti. Mostlatika, Jesús okinnechiko sekimej imachtijkauan uan okinpejpenki 12 itlatitlaniluan. ¿Tikmati ken omotokayotiayaj? Yejuan omotokayotiayaj Pedro, Andrés, Santiago, Juan, Felipe, Bartolomé, Tomás, Mateo, Santiago ikone Alfeo, Tadeo, Simón uan Judas Iscariote.
Andrés, Pedro, Felipe, Santiago
Ninmej 12 tlakamej nochipa onemiayaj iuan Jesús. Ye okinmachtijtia ken tetlapouiskiaj uan satepan inselti okintitlanki ma tetlapouitij. Noijki, Jehová okinmakak chikaualistli uan ijkon yejuan otlapajtiayaj uan okinkixtiayaj amo kuali ejekamej.
Juan, Mateo, Bartolomé, Tomás
Jesús okinmitaya 12 itlatitlaniluan ken iyolikniuan uan intech otlaneltokaya. Fariseos omokuayejyekoayaj itlatitlaniluan Jesús amo itlaj okimatiayaj. Pero Jesús amo ijkon okinmitaya. Ye kuali okinmachti ken tetlapouiskiaj. Yejuan yetoskiaj iuan Jesús ijkuak kipanoskia tlen miak ipati itech inemilis. Se neskayotl, yetoskiaj iuan Jesús achto mikiskia uan ijkuak toTajtsin Dios kiyolitiskia. Miakej itlatitlaniluan Jesús oualayaj itech Galilea, ijkon ken ye. Uan sekimej yokipiayaj insiua.
Santiago ikone Alfeo, Judas Iscariote, Tadeo, Simón
Itlatitlaniluan Jesús okipiayaj tlajtlakoli, ik non, ualeua okichiuayaj tlen amo kuali. Ualeua amo omokuayejyekoayaj tlen okijtoayaj uan amo kuali okipejpenayaj tlen okichiuayaj. Oui okitayaj mochiaskej. Hasta omokualaniayaj para kimatiskiaj akin okachi oueyititoka. Pero okatkaj yolkualmej uan okitlasojtlayaj Jehová. Yejuan kiyekanaskiaj tlanechikol ijkuak Jesús ayakmo yetoskia nikan Tlaltikpak.
“Nomechnotsas notlakaikniwah, porke yonomechmatilti nochi tlan Notajtsi onechili” (Juan 15:15).
