Saulo okatka romano uan oneski itech altepetl Tarso. Ye okatka fariseo uan kuali okixmatiaya intlanauatiluan judíos, noijki okinkokoliaya akinmej okichiuayaj ken Cristo. Okinkixtiaya itech inkalijtik uan okintsakuaya, maski tlakamej noso siuamej. Hasta okitak ijkuak sekimej tlakamej tlen sapanoa okualantokaj okimiktijkej ika tetl se imachtijka Jesús tlen omotokayotiaya Esteban.

Saulo amo san okinekiaya kintlajyouiltis akinmej okichiuayaj ken Cristo tlen ochantiayaj Jerusalén. Ik non, okilui ueyi teopixki ma kititlani altepetl Damasco para noijki kintlajyouiltiskia akinmej okichiuayaj ken Cristo. Ijkuak Saulo yoajsitoka itech non altepetl, okitak se tlauili tlen chikauak opetlanki uan ouetsito. Noijki okikak se tlajtoli tlen okilui: “Saulo, ¿tleka tinechtemojtinemi?”. Saulo okitlajtlani: “¿Akin te?”. Nin tlajtoli okinankili: “Ne niJesús. Xio Damasco uan ompa mitsiluiskej tlen tikchiuas”. Saulo ayakmo otlachiaya uan okimatilankej hasta oajsitoj Damasco.

Itech Damasco ochantiaya se tlakatl yolkuali tlen omotokayotiaya Ananías. Jesús okilui Ananías: “Xio ichan Judas, itech ojtli tlen itoka Milaktik uan xiktemo Saulo”. Ananías okinankili: “Noteko, yonikak miak tlamantli itech non tlakatl. Ye kintsakua momachtijkauan”. Pero Jesús okilui: “Xikitati Saulo, porque onikpejpenki para ma tetlapoui kuali tlajtolmej itech miakej altepemej”.

Ananías okitato Saulo uan okilui: “Nokni Saulo, Jesús onechualtitlanki para oksepa xitlachia”. San niman, Saulo opejki oksepa tlachia. Omomachti miak tlamantli itech Jesús uan omochi imachtijka. Omoapolakti uan opejki tetlapouia itech sinagogas iuan akinmej okichiuayaj ken Cristo.  ¡Judíos sapanoa omotlajtlachialtijkej! Okitakej Saulo otlamachtijtoka itech Jesús. Judíos omotlajtlaniayaj: “¿Amo nin tlakatl tlen okintlajyouiltiaya imachtijkauan Jesús?”.

Saulo otetlapoui eyi xiuitl itech Damasco. Judíos okikokoliayaj uan okinekiayaj kimiktiskej. Pero tokniuan okimatkej uan okipaleuijkej ma cholo. Non altepetl okipiaya se tepamitl tlen okoyontoka, ik ompa okitemouijkej Saulo ijtik se chikiuitl.

Ijkuak Saulo oyajki Jerusalén, okinekiaya kintlajpaloti tokniuan. Pero yejuan okimauiliayaj. Ik non, se imachtijka Jesús sapanoa yolkuali tlen omotokayotiaya Bernabé okiuikak Saulo kanin okatkaj tlatitlanilmej uan okinmilui Saulo melauak yokipatlak iyelis. Saulo opejki monechikoa iuan tokniuan itech Jerusalén uan opejki tetlapouia ika pakilistli kuali tlajtolmej itech toTajtsin Dios. Satepan, nochtin okixmatiayaj ken Pablo.