Jehová okijto: “Ayakmo ikaj chokas nion moyolkokos nion mokokos nion mikis. Namechuachilis namoixayo uan ayakmo nankilnamikiskej tlen amo kuali opanok”.

Jehová okintlali Adán uan Eva itech xochitlali Edén para ma yolpakikan uan ma kipiakan yolseuilistli. Omonekiaya kiueyichiuaskiaj toTajtsin Dios uan kinpiaskiaj miakej inkoneuan para kitemitiskiaj Tlaltikpak. Adán uan Eva amo okitlakamatkej Jehová, pero ye amo okipatlak tlen kineki kichiuas. Itech nin amochtli otikitakej toTajtsin Dios nochipa kichiua tlen kijtoa. ITekiuajkayo kiualikas miak tlateochiualistli nikan Tlaltikpak uan ijkon mochiuas tlen Jehová okilui Abrahán.

San niman, ayakmo yoltoskej akinmej amo yolkualmej, noijki amo kuali ejekamej nion Satanás. Nochtin kiueyichiuaskej Jehová.  Ayakmo timokokoskej nion timikiskej. Nochipa tichikajtoskej uan tiyolpakiskej. Nochi Tlaltikpak yetos se Xochitlali. Tikpiaskej kualtsin tokalijtik uan miak tlakuali uelik. San yetoskej akinmej yolkualmej. Yolkamej ayakmo techmauiliskej nion tejuan tikinmauiliskej.

Sapanoa tiyolpakiskej ijkuak Jehová kinyolitis akinmej yomikej. Tikinseliskej akinmej kinyolitiskej ken Abel, Noé, Abrahán, Sara, Moisés, Rut, Ester uan David. Yejuan techpaleuiskej tikuepaskej Tlaltikpak se Xochitlali. Nochipa tikchiuaskej miak tlamantli tlen techpaktis.

Jehová kineki xiyeto itech Xochitlali. Ompa okachi kuali tikixmatiskej toTajtsin Dios. Ik non, ¡kuali ma timouikakan iuan Jehová axkan uan nochipa!