Ome tlakamej israelitas ichtaka otlachiatoj Jericó uan omokajkej ikalijtik se siuatl tlen omotokayotiaya Rahab. Ijkuak ueyi tekiua itech Jericó okimatki non, okintitlanki soldados ikalijtik Rahab. Ye okintlati tlakamej ikuapak ikalijtik uan okinmilui soldados oksekan ma kintemotij. Satepan, Rahab okinmilui tlakamej israelitas: “Namechpaleuia porque nikmati Jehová namouan kajki uan nankimoaxkatiskej nin altepetl. Namechtlatlaujtia, xikinmakixtikan nokalchanejkauan”.

Tlakamej israelitas okiluijkej Rahab: “Tla tikilpis nin mekatl chichiltik itech moventana, amo itlaj kinpanos akinmej yetoskej mokalijtik. Ijkon momakixtiskej mokalchanejkauan”.

Rahab okinpaleui tlakamej israelitas ma kisakan Jericó. Yejuan otemokej ika se mekatl itech iventana. Tlakamej israelitas omotlatijkej eyi tonal kanin tepeyo uan satepan okitatoj Josué. Satepan, nochtin israelitas okipanouijkej aueyatl Jordán uan omoyektlalijkej para  kimoaxkatiskiaj non altepetl. Jericó achto altepetl tlen kimoaxkatiskiaj. Jehová okinnauati ma kiyaualokan altepetl se uelta sejse tonal. Yejuan ijkon okichijkej chikuase tonal. Uan itech tonal chikome, okiyaualojkej altepetl chikome uelta. Satepan, teopixkej okinpitskej trompetas uan soldados israelitas chikauak otsajtsikej. Ijkuakon, tepamitl ouetski. Ikalijtik Rahab amo ouetski maski okatka itech tepamitl. Rahab otlaneltokak itech Jehová, ik non, ye uan ikalchanejkauan omomakixtijkej.