TLAPOUALISTLI 77

Amo itlaj okichi ma motlankuaketsakan

¿TIKILNAMIKI tla itlaj yotikak itech ninmej eyi telpokamej? Kema, yejuan iyolikniuan Daniel, akinmej amo kinekij kikuaskej tlakuali tlen amo kuali kikuaskej. Babilonios kintokayotiaj Sadrac, Mesac uan Abednego. Uan axkan xikinmita. ¿Tleka amo omotlankuaketskej ixpan nin ueyi tlaixkopinal ijkon ken nochtin kichijtokej? Ma tikitakan tleka.

¿Tikilnamiki tlanauatilmej tlen Jehová okijkuilo tlen omotokayotiayaj Majtlaktli Tlanauatilmej? Achto tlanauatil kijtoa: ‘Amo xikinueyichiua teotsitsintin, san ne xinechueyichiua’. Ninmej telpokamej okitlakamatiayaj nin tlanauatil maski okatka oui kichiuaskiaj.

Nabucodonosor ueyi tekiua itech Babilonia okinnotski tlakamej tlen okachi oueyititokaj pampa kiueyichiuaskiaj nin tlaixkopinal tlen Nabucodonosor otlanauati ma kichijchiuakan. Saiktlami, nochtin okinnauati: ‘Ijkuak nankikakiskej kipitsaj kuakojmej, kitsotsonaj arpas uan oksekimej tlamantli tlen ika tlatsotsonaj, ximotlankuaketsakan ixpan nin tlaixkopinal tlen chijchitok ika oro. Akin amo motlankuaketsas nion kiueyichiuas san niman kikajkauaskej ijtik horno tlen melauak totonik’.

Ijkuak Nabucodonosor okimatki Sadrac, Mesac uan Abednego amo omotlankuaketskej, okualanki miak. Otlanauati ma kinualikilikan. Oksepa okinkauiliaya ma motlankuaketsakan. Maski ijkon, telpokamej omotenmachiayaj ika nochi inyolo itech Jehová. Yejuan okiluijkej Nabucodonosor: ‘ToTajtsin Dios akin tiktekichiuiliaj uelis techmakixtis. Uan maski amo techmakixtis, amo timotlankuaketsaskej ixpan tlaixkopinal tlen otikchijchi ika oro’.

Ijkuak Nabucodonosor okikak tlen okijtojkej okachi okualanki. Ken amo uejka okatka se horno otlanauati: ‘¡Ok chikometipan okachi chikauak xiktotonikan horno!’. Ijkuakon, okinnauati tlakamej tlen okachi chijchikauakej ma kinmilpikan Sadrac, Mesac uan Abednego uan ma kintlamotlakan ijtik horno. Horno melauak okatka totonik ik non, tlakamej tlen okachi chijchikauakej omikej. Maski ijkon, ¿tlen okinpanok eyi telpokamej ijkuak okinkajkajkej ijtik horno?

Ueyi tekiua otlachixki ijtik horno, uan omomojti miak. Ye okijto: ‘¿Amo otikinmilpijkej eyi tlakamej uan otikinkajkajkej ijtik horno tlen melauak totonik?’.

Itlakeualuan okinankilijkej: ‘Kema, non tlen otikchijkej’.

Nabucodonosor okijto: ‘Maski ijkon, nikinmita naui tlakamej tlen nejnentokej ijtik tlitl. Ayakmo ilpitokej, uan tlitl amo kintlatia. Uan yen tlakatl naui moita ken se ángel’. Ueyi tekiua omotoki kanin okatka ikaltlatsakuil horno uan chikauak okijto: ‘¡Sadrac, Mesac uan Abednego! Xikisakan, namejuan akinmej nankitekichiuiliaj akin melauak Dios’.

Ijkuak okiskej, nochtin tlaltikpaktlakamej okitakej ken amo itlaj okinpanok. Ijkuakon, ueyi tekiua okijto: ‘¡Nochipa ma ueyitito inTajtsin Dios Sadrac, Mesac uan Abednego! Ye okititlanki iángel uan okinmakixti pampa amo okiueyichijkej nion omotlankuaketskej ixpan okse teotsin, san ixpan inTajtsin Dios akin kitekichiuiliaj’.

Nin melauak se kuali neskayotl tlen techititia ken moneki nochipa san Jehová tikueyichiuaskej, ¿amo melauak?

Éxodo 20:3; Daniel 3:1-30.