TLAPOUALISTLI 80

Israel okiski itech Babilonia

YOPANOK kanaj ome xiuitl ijkuak medos uan persas okimoaxkatijkej Babilonia. ¡Uan axkan xikita tlen panotok! Kema, israelitas kistokej itech Babilonia. ¿Ken omomakixtijkej? ¿Akin okinkauili ma kisakan?

Ciro ueyi tekiua itech Persia okinkauili ma kisakan. Miak xiuitl achto nesiskia Ciro, Jehová okilui iteotlajtojki Isaías ma kijkuilo nin itech Ciro: “Tikchiuas tlen ne nikneki xikchiua. Kaltlatsakuil mokauas tlapotok pampa tikmoaxkatis altepetl”. Uan Ciro kema otlayekanki ijkuak okimoaxkatijkej Babilonia. Medos uan persas okalakej itech altepetl itech yoak, ijkuak kaltlatsakuil otlapotoka.

Maski ijkon, Isaías iteotlajtojki Jehová noijki okijto Ciro tlanauatiskia oksepa ma kichijchiuakan altepetl Jerusalén uan iteokali. ¿Ijkon otlanauati ueyi tekiua Ciro ma kichiuakan? Kema. Nin tlen Ciro okinmilui israelitas: ‘Xiakan Jerusalén uan xikchijchiuakan iteokali namoDios Jehová’. Uan israelitas ijkon okichijkej.

Maski ijkon, amo nochtin israelitas tlen okatkaj itech Babilonia ueli onejnemiayaj miak pampa ajsiskia Jerusalén. Omonekiaya nejnemiskej miak, kanaj 800 kilómetros, uan miakej israelitas yokokoxkatikej noso youeuejtijkej uan omokokoayaj. Noijki okatka okseki tlamantli tlen amo okinkauilij ma mokuepakan. Ciro okinmilui akinmej amo omokuepkej: ‘Xikinmakakan oro uan plata uan oksekimej tetliokolilmej akinmej mokuepaskej pampa kichijchiuaskej Jerusalén uan iteokali’.

Ik non, israelitas tlen omokuepkej Jerusalén okiselijkej miakej tetliokolilmej. Noijki Ciro okinmakak tazones uan copas tlen ueyi tekiua Nabucodonosor okinkixti itech iteokali Jehová ijkuak okixpolo Jerusalén. Israelitas okiuikakej miak tlamantli.

Naui metstli satepan ijkuak onejnenkej israelitas, oajsikej Jerusalén, oajsikej itech kauitl tlen omoijtojka. Yopanok 70 xiuitl ijkuak okixpolojkej Jerusalén uan itech nochi altepetl amo akaj omoka. Ken tikitaskej, maski israelitas omokuepkej itech inaltepetl, okipixkej miak ouijkayotl.

Isaías 44:28; 45:1-4; Esdras 1:1-11.