TLAPOUALISTLI 51

Rut uan Noemí

ITECH Biblia tikajsis se amochtli tlen itoka Rut. Techtlapouia itech se kalchanejke tlen onemia itech kauitl ijkuak Israel okipiaya jueces. Rut ye se ichpochtli tlen ochantiaya itech ueyi altepetl Moab; amo otlakatki itech Israel, ialtepetl toTajtsin Dios. Maski ijkon, ijkuak Rut okixmatki akin melauak toTajtsin Dios, Jehová, okitlasojtlak miak. Noemí ye se siuatl tlen yokipiaya miak xiuitl akin okipaleui Rut ma kixmati Jehová.

Noemí ye okatka israelita. Noemí iuan inamik uan ome itelpokauan ochantitoj Moab ijkuak otlasojtik tlakuali itech Israel. Se tonal, inamik Noemí omikik. Satepan, ikoneuan Noemí omonamiktijkej iuan ome ichpokamej moabitas tlen omotokayotiayaj Rut uan Orpá. Kanaj majtlaktli xiuitl satepan, ikoneuan Noemí omikej. ¡Melauak omoyolkokojkej miak Noemí uan isiuamouan! ¿Tlen kichiuaskia Noemí axkan?

Se tonal, Noemí omokuayejyeko mokuepaskia ialtepetl, maski okatka uejka. Rut uan Orpá okinekiayaj yetoskej inauak, uan noijki oyajkej. Satepan ijkuak yoyayaj ipan ojtli, Noemí okinmilui ichpokamej: ‘Ximokuepakan namoaltepetl uan ximokauakan iuan namonantsin’.

Noemí okinmixpipitso uan okinmakauak. Yejuan opejkej chokaj pampa sapanoa okitlasojtlayaj Noemí. Okijtojkej: ‘¡Amo! Tejuan tiaskej mouan kanin katej mochanejkauan’. Uan Noemí okinnankili: ‘Moneki nanmokuepaskej nokoneuan. Okachi kuali nanyetoskej iuan namochanejkauan’. Ik non, Orpá opejki mokuepa itech ikalijtik. Maski ijkon, Rut amo omokuepki.

Noemí okilui Rut: ‘Orpá yoyajki. Xio iuan’. Rut okinankili: ‘¡Amo xinechilui ma nimitskaua! Xinechkauili mouan ma nio. Kanin te tias, ne nias, uan kanin tichantis, ompa nichantis. Moaltepetl yetos noaltepetl uan moDios yetos noDios. Kanin te timikis, ne nimikis, uan ompa nechtokaskej’. Ijkuak Rut ijkon okijto, Noemí ayakmo okilui ma mokuepa.

Saiktlami, ninmej siuamej oajsitoj Israel. Ompa omokajkej. San niman, Rut opejki tekiti itech tetlala, pampa itech non tonalmej okipixkayaj cebada. Se tlakatl akin omotokayotiaya Boaz okikauili ma kikololo cebada itech itlaluan. ¿Tikmati akin okatka inantsin Boaz? Okatka Rahab, tlen ochantiaya itech altepetl Jericó.

Se tonal, Boaz okilui Rut: ‘Yonechtlapouijkej miak motech, yonikak ken tiyolkuali iuan Noemí. Nikmati otika motajtsin uan monantsin uan moueyi altepetl uan otiuala otichantiko itech se altepetl tlen amo otikixmatia. ¡Jehová ma mitsteochiua!’.

Rut okinankili: ‘Tiyolkuali nouan, tlakatsintli. Yotikchi kuali ma nimomachili ika tlen otinechilui’. Boaz okipakti miak Rut, uan satepan omonamiktijkej. ¡Nin okiyolpakti miak Noemí! Uan Noemí okachi oyolpakik ijkuak Rut uan Boaz okipixkej se konetl tlen okitokayotijkej Obed. Satepan, Obed omochi ikojkol David; uan itech David satepan okachi timomachtiskej.

Rut 1 a 4.