TLAPOUALISTLI 34

Se yankuik tlakuali

¿TIKMATI tlen kikololojtokej tlaltikpaktlakamej? Moitaj ken tlakuali. Istak, kanauak ken setl. Nin uelis kikuaskej.

Yopanok kanaj se metstli ijkuak israelitas okiskej itech Egipto. Okatkaj kanin tlauaki. Ompa amo okatka miak tlen kikuaskiaj, uan yejuan okijtoayaj: ‘Okachi kuali Jehová techmiktiskiaj itech Egipto. Ompa otikpiayaj miak tlakuali’.

Ik non, Jehová okijto: ‘Nikchiuas ma uetsi itech iluikak tlakuali’. Uan Jehová ijkon okichi. Mostlatika, ijkuak israelitas okitakej non tlamantli istak tlen ouetski, omotlajtlanijkej: ‘¿Tlen nin tlamantli?’.

Moisés okinmilui: ‘Nin tlakuali, tlen Jehová namechmaka pampa nankikuaskej’. Tlaltikpaktlakamej okitokayotijkej MANÁ. Maná uelik ken pan kanauak tlen kipia neujtli.

Moisés okinmilui: ‘Xikololokan san tlen sejse kikuas’. Ik non, mojmostla ijkon okichiuayaj. Uan ijkuak Tonaltsin okisaya, maná tlen omokauaya opatiaya.

Moisés noijki okinmilui: ‘Amo akaj ma kikololo maná pampa kikuas okse tonal’. Maski ijkon, sekimej amo otetlakamatkej. ¿Tikmati tlen opanok? Mostlatika, maná tlen okikololojkej se tonal achto okipiaya okuilimej uan opotonia.

Maski ijkon, Jehová okinmilui se tonal itech semana okachi kikololoskiaj maná. Nin okichiuayaj ipan tonal chikuase noso viernes. Uan Jehová okinmilui ma kikololokan okachi pampa okse tonal, pampa Jehová amo kichiuaskia ma uetsi maná itech tonal chikome noso sábado. ¡Ijkuak okikololojkej pampa tonal chikome noso sábado maná amo okipiaya okuilimej nion opotonia! ¡Nin okse milagro!

Itech nochi xiuitl tlen israelitas okatkaj kanin tlauaki, Jehová okintlakualti ika maná.

Éxodo 16:1-36; Números 11:7-9; Josué 5:10-12.