Omochixkej itech Jerusalén
TLAPOUALISTLI 105
Omochixkej itech Jerusalén
NINMEJ tlaltikpaktlakamej imachtijkauan Jesús. Okitlakamatkej uan omokajkej Jerusalén. Uan ijkuak nochtin mochixtokej, itlaj chikauak omokak itech nochi kali. Omokak ken se ejekatl tlen chikauak uan totoka opanok. Uan axkan omonexti ken tlitl ipan intsonteko. ¿Tikita tlitl ipan intsonteko nochtin? ¿Tlen kijtosneki nin?
¡Nin se milagro! Jesús oksepa oyajki iluikak iuan iTajtsin, uan okinmakatoka espíritu santo imachtijkauan. ¿Tikmati tlen okichi espíritu santo ma kichiuakan yejuan? Nochtin opejkej tlajtoaj tlatlamantli tlajtolmej.
Miakej tlaltikpaktlakamej tlen okatkaj itech Jerusalén okikakej ken yetoskia chikauak ejekatl, uan oyajkej okitatoj tlen opanok. Sekimej tlaltikpaktlakamej tlen ompa okatkaj oualajkej itech miakej altepemej pampa iluichiuaskiaj itech iluitl Pentecostés. ¡Melauak omotlajtlachialtijkej akinmej ompa okatkaj! Pampa imachtijkauan Jesús okintlapouiayaj tlaltikpaktlakamej ika intlajtol itech nochi tlamantli kuali tlen toTajtsin Dios okichi.
Akinmej ompa oyajkej okijtojkej: ‘Nochtin ninmej tlaltikpaktlakamej inchan Galilea. ¿Tleka uelij tlajtoaj ika totlajtol tlen tiktekitiltiaj kanin tejuan tiuitsej?’.
Pedro omoketski uan okinmilui tlen okijtosnekiaya. Chikauak otlajto uan okinmilui tlaltikpaktlakamej ken okimiktijkej Jesús, uan ken okiyoliti Jehová. Pedro okinmilui: ‘Axkan Jesús kajki iyekma toTajtsin Dios. Uan ye okitemakak espíritu santo tlen okijto kitemakas. Ik non, mochijtokej nochtin ninmej milagros’.
Ijkuak Pedro okijto nochi nin tlamantli, miakej tlaltikpaktlakamej omoyolkokojkej pampa nochi tlen okichiuilijkej Jesús. Okitlajtlanijkej: ‘¿Axkan tlen moneki tikchiuaskej?’. Pedro okinmilui: ‘Moneki nanmoyolkuepaskej uan nanmoapolaktiskej’. Itech non tonal kanaj 3,000 omoapolaktijkej uan omochijkej imachtijkauan Jesús.
