TLAPOUALISTLI 109

Pedro okitlajpaloto Cornelio

NIKAN moketok tlatitlanil Pedro, uan ikuitlapan katej sekimej iyolikniuan. ¿Tleka motlankuaketsa nin tlakatl ixpan Pedro? ¿Moneki ijkon kichiuas? ¿Tikmati akin ye?

Nin tlakatl itoka Cornelio. Ye se tlayekanki itech soldados romanos. Cornelio amo kixmati Pedro, maski ijkon, akaj okilui ma kiyoleua ma uia ikalijtik. Ma tikitakan ken opanok nin.

Akinmej achto imachtijkauan Jesús, okatkaj judíos, Cornelio amo okatka judío. Maski ijkon, ye okitlasojtlaya toTajtsin Dios, omotlatlaujtiaya, uan miak tlamantli kuali okinchiuiliaya tlaltikpaktlakamej. Ijkuakon, se tiotlak, se ángel okimonextili uan okilui: ‘Te tikyolpaktia toTajtsin Dios, uan ye kinankilis motlatlaujtiluan. Xitlatitlani ma kitemokan se tlakatl tlen itoka Pedro. Ye kajki Jope, ikalijtik Simón, tlen chanti ik kanin kajki ueyi atl’.

San niman, Cornelio ijkon okichi. Mostlatika, Pedro okatka ikuapak ikal Simón. Ompa, toTajtsin Dios okichi Pedro ma kita se ueyi tsotsoli tlen oualaya itech iluikak. Ompa okatkaj tlatlamantli yolkamej. Itlanauatil toTajtsin Dios okijtoaya, nonmej yolkamej amo kualmej okatkaj pampa kinkuaskiaj. Maski ijkon, akaj okilui: ‘Pedro, ximoketsa. Xitlamikti uan xitlakua’.

Pedro otlanankili: ‘¡Amo! Amo keman onikua yolkamej tlen amo chipauakej’. Maski ijkon, akin okinotstoka okilui: ‘Amo xikijto amo chipauak tlen toTajtsin Dios yokichipa’. Eyijpa ijkon opanok. Ijkuak Pedro omotlajtlaniaya tlen okijtosnekiaya nochi nin, sekimej tlakamej tlen okintitlanki Cornelio oajsitoj ompa.

Pedro otemok uan okijto: ‘Ne nitlakatl tlen namejuan nankitemoaj. ¿Tleka onanualajkej?’. Ijkuak tlakamej okiyekiluijkej se ángel okilui Cornelio ma kiyoleua Pedro ma uia ikalijtik, Pedro okijto kema yaskia imiuan. Mostlatika, Pedro uan sekimej iyolikniuan oyajkej okitlajpaloto Cornelio itech Cesarea.

Cornelio okinnechiko ichanejkauan uan iyolikniuan. Ijkuak Pedro oajsito, Cornelio omotlankuaketski ixpan Pedro, ken tikita itech tlaixkopinal. Maski ijkon, Pedro okijto: ‘Ximoketsa, ne noijki nitlakatl ijkon ken te’. Kema, Biblia kijtoa amo kuali se motlankuaketsas ixpan akaj pampa tikueyichiuaskej. San moneki tikueyichiuaskej Jehová.

Ijkuakon, Pedro okintlapoui nochtin akinmej ompa okatkaj. Pedro okijto: ‘Nikita toTajtsin Dios kinselia nochtin tlaltikpaktlakamej tlen kineki kitekichiuiliskej’. Uan ijkuak Pedro otlajtojtoka, toTajtsin Dios okiualtitlanki espíritu santo, uan nochtin tlaltikpaktlakamej tlen ompa okatkaj opejkej tlajtoaj ika tlatlamantli tlajtolmej. Nin sapanoa okintlajtlachialti judíos akinmej otlaneltokayaj itech Cristo tlen okatkaj iuan Pedro, pampa yejuan okineltokayaj toTajtsin Dios san okinseliaya judíos. Nin okinmachti, toTajtsin Dios kinselia nochtin tlaltikpaktlakamej, uan amo san sekimej. ¿Amo tikneltoka moneki tikilnamikiskej nin?

Hechos 10:1-48; 11:1-18; Apocalipsis 19:10.