Jesús okinkixti tlanemakakej
TLAPOUALISTLI 89
Jesús okinkixti tlanemakakej
NIKAN moita Jesús sapanoa kualantok, ¿amo melauak? ¿Tikmati tleka? Pampa ninmej tlakamej tlen katej itech iteokali toTajtsin Dios itech Jerusalén kinekij kipiaskej miak tomin. Kinekij kinkixtiliskej miak tomin tlaltikpaktlakamej tlen uitsej itech teokali pampa kiueyichiuaskej toTajtsin Dios.
¿Tikinmita nochtin ninmej toros, ichkamej uan palomas? Ninmej tlakamej okinnemakayaj itech teokali. ¿Tikmati tleka? Pampa israelitas okitlamaniliayaj toTajtsin Dios yolkamej uan totomej.
Itlanauatil toTajtsin Dios okijtoaya ijkuak se israelita okichiuaya itlaj tlen amo kuali, omonekiaya kitlamaniliskia toTajtsin Dios. Uan noijki okatkaj oksekimej tlamantli pampa israelitas omonekiaya kitemakaskia se tlamanal. Maski ijkon, ¿kanin uelis kikonanaskiaj totomej uan yolkamej pampa kitemakaskiaj ken se tlamanal?
Sekimej okipiayaj totomej uan yolkamej tlen uelis kitemakaskiaj. Maski ijkon, miakej israelitas amo okipiayaj yolkamej nion totomej. Uan oksekimej ochantiayaj uejka itech Jerusalén uan amo uelis kiuikaskiaj se yolkatl itech teokali. Ik non, israelitas oyayaj itech teokali uan ompa okinkoayaj yolkamej uan totomej. Maski ijkon, ninmej tlakamej sapanoa patioj okinnemakayaj yolkamej. Okinmichtekiliayaj intomin tlaltikpaktlakamej. Uan noijki amo uelis kinnemakaskiaj yolkamej itech teokali.
Nin tlen okikualani miak Jesús. Ik non, okintlamochili inmesas uan intomin. Noijki ika se mekatl okinkixti yolkamej itech teokali. Uan okinnauati akinmej okinnemakayaj palomas: ‘¡Xikinkixtikan! Amo xikkuepakan se tiankistli ikalijtik noTajtsin’.
Sekimej imachtijkauan Jesús okatkaj iuan ye itech teokali itech Jerusalén. Tlen okichi Jesús okintlajtlachialti. Ijkuakon, okilnamikej tlen kijtoa Biblia itech iKone toTajtsin Dios: ‘Sa tekitl kitlasojtlas ikalijtik toTajtsin Dios ika nochi iyolo’.
Ijkuak Jesús okatka itech Pascua itech Jerusalén okichi miakej milagros. Satepan, Jesús okiski itech Judea uan opejki mokuepa itech Galilea. Maski ijkon, opanok itech Samaria. Ma tikitakan tlen opanok ompa.
