TLAPOUALISTLI 99

Okatkaj itech se kali tlen okatka tlakpak

YOPANOKEJ ome tonalmej, axkan tonal jueves uan yiyoak. Jesús uan 12 itlatitlaniluan oualajkej itech nin kali ueyi tlen kajki ipan se kali pampa tlakuaskej itech Pascua. Akin kistok ye Judas Iscariote. Kinmiluiti teopixkamej ken uelis kikitskiskej Jesús.

Se tonal achto, Judas omotlapoui imiuan teopixkamej: ‘¿Tlen nechmakaskej tla namechpaleuis xikitskikan Jesús?’. Okiluijkej: ‘Timitsmakaskej 30 platajtomin’. Axkan, Judas omonechiko imiuan pampa kinuikaskia kanin okatka Jesús. ¡Melauak amo kuali tlen okichi!

Teotlakantlakualistli itech Pascua yotlanki. Ijkuakon, axkan Jesús okipeualti okse teotlakantlakualistli tlen miak ipati. Okinmakak se pan itlatitlaniluan uan okinmilui: ‘Xitlakuakan, pampa nin pan kijtosneki nonakayo tlen niktemaka pampa namejuan’. Ijkuakon, okikitski se vaso ika vino uan okijto: ‘Xikonikan, pampa nin kijtosneki noeso, tlen niktemakas pampa namejuan’. Biblia kitokayotia nin tlakualistli ken “iteotlakantlakualis toTeko”.

Israelitas otlakuayaj itech Pascua pampa ijkon okilnamikiayaj ijkuak iángel toTajtsin Dios san opanok ipan inkaluan ijkuak okatkaj Egipto, maski ijkon, kema okinmikti nochtin intlayekankoneuan itech inkaluan egipcios. Maski ijkon, axkan Jesús okinekiaya imachtijkauan ma kilnamikikan ye, uan ken ye omikik pampa yejuan. Ik non, moilnamiki nin teotlakantlakualistli sejse xiuitl.

Satepan otlankej otlakuajkej itech iTeotlakantlakualis toTeko, Jesús okinmilui itlatitlaniluan ma yolchikajtokan uan ma kipiakan chikauak intlaneltokilis. Saiktlami yejuan okitlakuikilijkej toTajtsin Dios uan okiskej. Uelis yokatka tlajkoyoak. ¿Kanin oyajkej?

Mateo 26:14-30; Lucas 22:1-39; Juan 13 a 17; 1 Corintios 11:20.