TLAPOUALISTLI 5

Opejki se nemilistli oui

SATEPAN okinkixtijkej itech xochitlali Edén, Adán uan Eva otlajyouijkej miak. Pampa tlakuaskiaj monekia tekitiskiaj chikauak. Ayakmo okatka kuajkualtsitsintin kuajmej tlen okitemakayaj tlakilotl, axkan okitayaj ken omoskaltiaya xiuitl tlen uitsyo. Nin opanok ijkuak Adán uan Eva amo okitlakamatkej toTajtsin Dios, ik non, ayakmo okatkaj Iyolikniuan.

Uan tlen okachi amo kuali, Adán uan Eva opejkej mikij. Xikilnamiki: toTajtsin Dios okinmilui mikiskiaj tla kikuaskiaj itlakilo se kuauitl. Itech tonal ijkuak okikuajkej opejkej mikij. ¡Amo kuali okichijkej pampa amo okikakilijkej toTajtsin Dios!

Nochtin ikoneuan Adán uan Eva otlakatkej satepan toTajtsin Dios okinkixti itech xochitlali Edén. Nin kijtosneki inkoneuan noijki kokoxkatiskiaj noso ueuejtiskiaj uan satepan mikiskiaj.

Tla Adán uan Eva kitlakamatiskiaj Jehová, nochipa yolpaktoskiaj yejuan uan inkoneuan. Uelis yoltoskiaj nochipa ika pakilistli itech Tlaltikpak. Amo akaj kokoxkatiskiaj noso ueuejtiskiaj, mokokoskiaj nion mikiskiaj.

Dios kineki tlaltikpaktlakamej nochipa ma yoltokan ika yolpakilistli, uan ye kijtoa se tonal tlaltikpaktlakamej yoltoskej nochipa. Amo san kuajkualtsin yetos nochi Tlaltikpak, noijki nochtin tlaltikpaktlakamej chikajtoskej. Uan nochtin kuali mouikaskej uan noijki mochiuaskej iyolikniuan toTajtsin Dios.

Eva ayakmo okatka iyolikni toTajtsin Dios. Ik non, otlajyouiaya miak ijkuak okinpiaya ikoneuan. Okikokoaya miak. Kema, otlajyoui miak pampa amo okitlakamatki Jehová, ¿amo ijkon tikita?

Adán uan Eva okinpixkej miakej inkoneuan, tlakamej uan siuamej. Ijkuak otlakatki intlayekankone, okitokayotijkej Caín. Satepan, otlakatki okse inkone uan okitokayotijkej Abel. ¿Tikmati tlen okinpanok?

Génesis 3:16-23; 4:1, 2; Apocalipsis 21:3, 4.