TLAPOUALISTLI 62

Okatka ouijkayotl ikalijtik David

SATEPAN David opejki tlanauatia itech Jerusalén, Jehová kichiua isoldados David miakpa ma tlatlanikan. Jehová okinmakak itlajtol israelitas kinmakaskia tlali Canaán. Uan axkan, ika itlapaleuilis Jehová, nochi tlali tlen okinmilui kinmakaskia, mochiua inmiaxka.

David okatka se kuali tekiua. Ye okitlasojtlaya Jehová. Ik non, itlaj tlen achto okichi satepan okimoaxkati Jerusalén, ye ompa okiuikak arca itech itlajtojsenkaualis Jehová. Okinekiaya kichijchiuas se teokali kanin kitlaliskia.

Sekimej xiuitl satepan, David okichi se ueyi tlajtlakoli. Ye okimatiaya amo kuali ma kikonanakan itlaj tlen iaxka okse. Maski ijkon, se yoak, ijkuak okatka ipan ichan kanin otlanauatiaya, otlachixki tlakxitlan uan okitak se siuatl kuajkualtsin. Omotokayotiaya Bat-seba, uan inamik okatka se isoldado David tlen omotokayotiaya Urías.

Pampa David okiuelitak miak Bat-seba otlanauati ma kiualikilikan ikalijtik kanin otlanauatiaya. Inamik Bat-seba oyetoka uejka kanin omoteuijtokaj. David omotekak iuan Bat-seba, uan satepan, okimatki Bat-seba kipiaskia se ikone. David omotekipacho miak uan okinauati Joab akin okinyekanaya isoldados ma kitlali Urías tlaixpan kanin omoteuijtokaj pampa ma kimiktikan. Ijkuak Urías omikik, David omonamikti iuan Bat-seba.

Jehová okualanki miak iuan David. Ik non, okititlanki itekipanojka Natán pampa kitlapouiskia itech itlajtlakoluan. Nikan ueli tikita ken Natán kitlapouijtok David. David omoyolkoko miak pampa tlen okichi, uan Jehová amo okimikti. Maski ijkon, Jehová okilui: ‘Pampa otikchi ninmej tlamantli tlen amo kuali, tikpias miak ouijkayotl itech mokalijtik’. ¡Uan melauak David okipixki miak ouijkayotl!

Achto, ikone Bat-seba omikik. Ijkuakon achto ikone David, Amnón, okichiualti iuelti Tamar ma moteka iuan. Ik non, Absalón okse ikone David okualanki miak uan okimikti Amnón. Satepan, Absalón okinyolpakti miakej tlaltikpaktlakamej uan okichi ma kitlalikan ken ueyi tekiua. Saiktlami, David okitlanili guerra Absalón uan Absalón omikik. Kema, David okipixki miak ouijkayotl.

Ijkuak opanotoka nochi nin, Bat-seba okipixki okse ikone tlen okitokayotijkej Salomón. Ijkuak David yokipiaya miak xiuitl uan omokokoaya, ikone Adonías okinekiaya mochiuas ueyi tekiua. Ijkuakon, David okinauati se teopixki tlen omotokayotiaya Sadoc ma kitlalili chiauak Salomón ipan itsonteko pampa ijkon kiteititiskia Salomón yetoskia ueyi tekiua. Satepan, ijkuak David yokipiaya 70 xiuitl, omikik. Otlanauati 40 xiuitl. Uan axkan Salomón omochi ueyi tekiua itech Israel.

2 Samuel 11:1-27; 12:1-18; 1 Reyes 1:1-48.