TLAPOUALISTLI 24

José okinyejyeko ikniuan

JOSÉ kineki kimatis kox majtlaktli ikniuan tlen tlayekanaj ok amo yolkualmej uan amo tetlasojtlaj. Ik non, kinmiluia: ‘Namejuan san onantlajtlachiakoj. Nankinekij nankimatiskej kanin uelis nankalakiskej itech toaltepetl’.

‘Amo, amo melauak’, okijtojkej yejuan. ‘Tejuan tiyolkualmej. Tinochtin tiknimej. Otikatkaj 12. Maski ijkon, se tokni ayakmo yoltok, uan xokoyotl omokaj tokalijtik iuan totajtsin.’

José okichi ken amo okinneltokili. Otlanauati ma kitsakuakan ikni Simeón itech telpiloyan, uan oksekimej okinkauili ma mokuepakan inkalijtik ika tlakuali. Maski ijkon, okinmilui: ‘Ijkuak nanualmokuepaskej, xikualikakan namokni akin xokoyotl’.

Ijkuak omokuepkej inkalijtik itech Canaán, ikoneuan Jacob okiluijkej nochi tlen opanok. Jacob sapanoa omoyolkoko. ‘José ayakmo yoltok’, otsajtsik, ‘uan axkan Simeón ayakmo nikan kajki. Amo nikauas nankiuikaskej nokone akin xokoyotl, Benjamín’. Maski ijkon, ijkuak yotlantoka intlakual, Jacob okitekauili ma kiuikakan Benjamín itech Egipto pampa kimokouiliskiaj okachi tlakuali.

Axkan José okinmitak oualayaj ikniuan. Omoyolpakti miak pampa okitak ikni akin xokoyotl, Benjamín. Nion se itech yejuan okimatiaya nin tlakatl akin oueyitijtoka okatka José. Ijkuakon, José okichi itlaj pampa kinyejyekoskia majtlaktli itlakpaikniuan.

Okinnauati itlakeualuan ma kitemitikan inkoxtaluan ikniuan ika tlakuali. Maski ijkon, san ichtaka okinnauati itlakeualuan ma kikalakikan itech ikoxtal Benjamín icopa José tlen okichijchijkej ika plata. Satepan, nochtin okiskej itech Egipto uan ijkuak ayamo uejka oyayaj, José okintitlanki itlakeualuan ma yakan inkuitlapan. Ijkuak okinmajsikej, tlakeualtin okijtojkej: ‘¿Tleka onankichtekilijkej icopa toteko tlen okichijchijkej ika plata?’.

‘Tejuan amo otikichtekilijkej icopa,’ nochtin iknimej okijtojkej. ‘Tla nankajxiliaj se itech tejuan, ma kimiktikan.’

Ik non, tlakeualtin opejkej kitemoaj itech nochtin koxtalmej, uan okajsikej copa ipan ikoxtal Benjamín, ijkon ken nikan tikita. Tlakeualtin okijtojkej: ‘Oksekimej uelis mokuepaskej, maski ijkon, Benjamín mokauas touan.’ ¿Tlen kichiuaskiaj majtlaktli tlakpaiknimej?

Nochtin omokuepkej iuan Benjamín itech ikalijtik José. José okinmilui ikniuan: ‘Nochtin uelis nanmokuepaskej namokalijtik, maski ijkon, Benjamín mokauas nikan ken notlakeual’.

Axkan Judá otlajto uan okijto: ‘Tla ne nimokuepa uan amo nikuika nin telpochtli, notajtsin mikis, pampa kitlasojtla miak. Ik non, nimistlatlaujtia, xinechkauili ma nimokaua ken nitlakeual, uan xikaua ma mokuepa nin telpochtli’.

Axkan José okitak ikniuan yomoyolkuepkej. Axkan yiyolkualmej. Ma tikitakan tlen okichi José axkan.

Génesis 42:9-38; 43:1-34; 44:1-34.