TLAPOUALISTLI 116

Ken uelis tiyoltoskej nochipa

¿TIKMATI tlen kitlajtoltijtok nin ichpokatsin uan iyolikniuan? Kema, amochtli tlen noijki te tiktlajtoltijtok... Noamoch tlen nechtlapouia itech Biblia. Uan noijki kitlajtoltijtok nin tlapoualistli... “Ken uelis tiyoltoskej nochipa”.

¿Tikmati tlen momachtijtokej? Yejuan momachtijtokej ken miak ipati timomachtiskej itech Jehová uan iKone Jesús pampa uelis tiyoltoskej nochipa. Biblia kijtoa: ‘Nin ojtli tlen kitemaka yolilistli tlen amo keman tlamis. Ximomachti itech akin melauak toTajtsin Dios uan iKone Jesucristo’.

¿Ken uelis timomachtiskej itech Jehová uan iKone Jesucristo? Uelis tiktlajtoltiskej nochi nin amochtli tlen itoka Noamoch tlen nechtlapouia itech Biblia. Nin amochtli techtlapouia miak itech Jehová uan Jesús, ¿amo melauak? Uan noijki techiluia miak tlamantli tlen yejuan yokichijkej uan kichiuaskej. Maski ijkon, noijki moneki tiktlajtoltiskej okse amochtli.

¿Tikita okse amochtli tlen ompa kajki? Kema, Biblia. Xikilui akaj ma mitstlajtoltili Biblia kanin omokixtijkej tlapoualismej tlen kipia nin amochtli. Biblia techiluia nochi tlen moneki pampa tiktekichiuiliskej Jehová ken ye kineki, uan ijkon tikpiaskej yolilistli tlen amo keman tlamis. Ik non, moneki nochipa ma timomachtikan itech Biblia.

Maski ijkon, amo san moneki ma timomachtikan itech Jehová uan Jesús. Tejuan uelis tikmatiskej miak itech yejuan uan tlen techmachtiaj, uan amo uelis tikpiaskej yolilistli tlen amo keman tlamis. ¿Tikmati tlen okachi moneki ma tikchiuakan?

Noijki moneki tikchiuaskej tlen timomachtiaj. ¿Tikilnamiki Judas Iscariote? Ye okatka se itech 12 itlatitlaniluan Jesús. Judas okimatiaya miak itech Jehová uan Jesús. Maski ijkon, ¿tlen okipanok? Satepan, san itech ye omotekipacho uan okinemakak Jesús ika 30 platajtomin. Judas amo kiselis yolilistli tlen amo keman tlamis.

¿Tikilnamiki Guehazí akin tepitsin itech otimomachtijkej itech tlapoualistli 69? Ye okinek tlakentli uan tomin tlen amo iaxka okatka. Otlakajkaya pampa kipias nin tlamantli, uan Jehová okitlajyouilti. Noijki titlajyouiskej tla amo tiktlakamatij itlanauatiluan.

Maski ijkon, noijki yetokej miakej tlaltikpaktlakamej tlen nochipa okitekichiuilijkej Jehová. ¿Amo melauak tiknekij tikchiuaskej ken yejuan? Chokotsin Samuel se kuali neskayotl. Xikilnamiki, ken otimomachtijkej itech tlapoualistli 55, ye okipiaya san kanaj naui noso makuili xiuitl ijkuak opejki kitekichiuilia Jehová itech tabernáculo. Ik non, maski te ok tichokotsin, uelis tiktekichiuilis Jehová.

Melauak, nochtin tejuan tiknekij tikchiuaskej ken Jesucristo. Uan noijki ijkuak okatka chokotsin, ken otimomachtijkej itech tlapoualistli 87, okatka itech teokali omotlapouijtoka iuan oksekimej itech iTajtsin. Ma tikchiuakan ijkon ken ye. Ma tikintlapouikan nochtin tlaltikpaktlakamej itech toTajtsin Jehová uan iKone Jesucristo. Tla tikchiuaj nochi nin, uelis tiyoltoskej nochipa ipan yankuik xochitlali tlen toTajtsin Dios kichiuas nikan ipan Tlaltikpak.

Juan 17:3; Salmo 145:1-21.