1 Juan 2:1-29
-
Jesús ye se tetliokolil para kuali matimouikakan iuan toTajtsin Dios (1, 2)
-
“Nochipa tikintlakamatij itlanauatiluan” (3-11)
-
Achto tlanauatil uan yankuik tlanauatil (7, 8)
-
-
¿Tleka okijkuilojkej carta? (12-14)
-
Amo matikpatioitakan ken kipiaj innemilis oksekimej (15-17)
-
Uits akin kixnamiki Cristo (18-29)
2 Nokonetsitsiuan, namechijkuililia nin tlamantli para amo xitlajtlakolchiuakan. Pero onka akin techpaleuis tla ikaj tlajtlakolchiuas. Techpaleuis Jesucristo porque ye yolkuali uan kajki inauak toTajtsin.
2 Ye se tetliokolil tlen motemaka por totlajtlakol para kuali matimouikakan iuan toTajtsin Dios. Pero nochtin tlen chantij tlaltikpak uelis kinpaleuis uan amo san tejuan.
3 Tejuan tikteititiskej tikixmatij tla nochipa tikintlakamatij* itlanauatiluan.
4 Tla ikaj kijtoua yikixmati pero amo kintlakamati* itlanauatiluan, kijtosneki san tlakajkayaua uan amo kijtoua tlen melauak.
5 Pero tla ikaj kitlakamati* itlajtol Cristo, kiteititis melauak kitlasojtla toTajtsin Dios. Ikinon tikmatij iuan tikatej.
6 Akin kijtoua iuan kajki, moneki kichiuas tlen ye* okichi.
7 Nokniuan, amo namechijkuililia se yankuik tlanauatil. Nin tlanauatil desde achto nankipiaj uan yiuejkika kajki. Nin tlanauatil ye tlajtoli tlen yiuejkika onankikakej.
8 Okachi ipati namechijkuililia se yankuik tlanauatil. Se tlanauatil tlen ye okichi uan tlen namejuan nankichiuaj. Porque tlayoualotl yipolitok uan okachi petlani melauak tlauili.
9 Akin kijtoua kajki kanin tlanestok pero kikokolia ikni, kijtosneki kajki kanin tlayoua.
10 Akin kitlasojtla ikni, kajki kanin tlanestok uan amitlaj kichiuas mauetsi.
11 Pero akin kikokolia ikni kajki kanin tlayoua. Nemi kanin tlayoua uan amo kimati kanin yaui porque tlayoualotl yokichi ayakmo matlachia.
12 Nokonetsitsiuan, namechtlajkuililia porque ika itoka yonamechtlapojpoluilijkej namotlajtlakol.
13 Tetajmej, namechtlajkuililia porque yonankixmatkej akin kajki yiuejkika. Telpochmej, namechtlajkuililia porque yonankitlanilijkej Satanás. Konemej, namechtlajkuilia porque yonankixmatkej toTajtsin Dios.
14 Tetajmej, namechtlajkuililia porque yonankixmatkej akin kajki yiuejkika. Telpochmej, namechtlajkuililia porque nanchikauakej, nankineltokaj iTlajtol toTajtsin Dios uan yonankitlanilijkej Satanás.
15 Amo xikpatioitakan ken kipiaj innemilis oksekimej noso tlen kichiuaj. Porque akin kipatioita non tlamantli kijtosneki amo kitlasojtla toTajtsin.
16 Porque tlen kinyoltilana akinmej amo yolkualmej amo uits itech toTajtsin. Non tlamantli uits itech akinmej amo yolkualmej. Nin kijtosneki tlen kineki incuerpo, tlen kixnekij uan moueyinekij ika tlen kipiaj.
17 Noijki akinmej amo yolkualmej ixpoliuiskej uan pojpoliuis tlen kinyoltilana pero nochipa yoltos akin kichiuas tlen kineki toTajtsin Dios.
18 Nokonetsitsiuan, tejuan tikmatij tikatej itlamian hora. Namejuan yonankikakej uits akin kixnamiki Cristo. Axkan yomonextijkej miakej tlen kixnamikij Cristo ikinon tikmatij tikatej itlamian hora.
19 Yejuan touan okatkaj pero otechkajtejkej porque amo touan pouij. Yejuan touan mokauaskiaj tla touan pouiskiaj. Pero otechkajtejkej para mamoteititi amo nochtin touan pouij.
20 Namejuan onamechpejpenki toTajtsin Dios tlen santo uan nannochtin nankimatij tlen melauak.
21 Amo namechtlajkuililia porque amo nankimatij tlen melauak. Namechtlajkuililia porque nankimatij tlen melauak. Porque tlen melauak amo mouika iuan tlen amo melauak.
22 ¿Akin tlakajkayaua? ¿Amo ye akin kijtoua Jesús amo melauak Cristo? Akin kinmixtopeua toTajtsin uan iKone kijtosneki kixnamiki Cristo.
23 Akin kixtopeua tekone kijtosneki noijki amo mouika iuan iTajtsin. Pero akin kixmati tekone kijtosneki noijki mouika iuan iTajtsin.
24 Moneki nochipa xikchiuakan tlen achto onankikakej. Tla nankichiuaskej tlen achto onankikakej, noijki nanyetoskej iuan tekone uan iTajtsin.
25 Noijki toTajtsin Dios yotechilui nochipa tiyoltoskej.
26 Namechijkuililia nin tlamantli porque sekimej kinekij namechkajkayauaskej.
27 Namejuan onamechpejpenki toTajtsin Dios ika espíritu santo, uan amo moneki ikaj manamechmachti porque nankipiaj iespíritu. Pero ika non espíritu, toTajtsin Dios namechmachtia nochi tlamantli tlen melauak uan ye amo tlakajkayaua. Ikinon nochipa iuan xiyetokan ijkon ken espíritu santo onamechmachti xikchiuakan.
28 Nokonetsitsiuan, nochipa iuan xiyetokan ijkon uelis titlajtoskej ijkuak ye monextis. Noijki amo tipinauaskej uan amo tikkauaskej ijkuak ye yinikan yetos.
29 Tla namejuan nankimatij ye yolkuali, noijki nankimatij akin kichiua tlen kuali ye ikone toTajtsin Dios.
