1 Pedro 4:1-19
4 Cristo otlajyoui ijkuak okatka tlakatl ikinon ximoyektlalikan para nanmokuayejyekoskej* ken ye. Porque akin tlajyouia kiteititia ayakmo tlajtlakolchiua.
2 Ijkon kichiuas tlen kineki toTajtsin Dios ijkuak ok yoltos uan ayakmo kichiuas tlen kinyoltilana oksekimej.
3 Uejkika onankichijkej tlen oksekimej kichiuaj. Nin kijtosneki onantlajtlakolchijtinemiayaj uan ayakmo onanpinauayaj,* san onankinekiayaj nanauilnemiskej,* onantlauanayaj, onamiluichiuayaj uan ompa onankichiuayaj tlen amo kuali, onamiluichiuayaj uan ompa onantlauanayaj uan onankinueyichiuayaj dioses.
4 Oksekimej namechteneuaj* porque amo kajsikamatij tleka ayakmo inuan nanmoyolpaktiaj ijkuak kichiuaj tlen amo kuali.
5 Yejuan kiluiskej Cristo tlen okichijkej, porque ye kinmixkomakas akinmej yoltokej uan akinmej yoixpolikej.
6 Ikinon noijki okinmatiltijkej kuali tlajtoli akinmej yoixpolikej. Ijkon maski kinmixkomakaskej ken tlakamej kinmixkomakaj, uelis yoltoskej uan kinyekanas iespíritu toTajtsin Dios.
7 Pero yitlamis nochi tlen onka, ikinon kuali ximokuayejyekokan* uan nochipa ximotlatlaujtikan.
8 Okachi ipati sapanoua ximosepantlasojtlakan, porque akin tetlasojtla nochipa tetlapojpoluia.
9 Kuali xikinselikan oksekimej uan amo ximokuejsokan.
10 Sejse namejuan onamechmakakej se tetliokolil. Ika non tetliokolil xikinpaleuikan oksekimej. Xikchiuakan ken nanyetoskiaj kuali tlakeualmej tlen kinpaleuiaj oksekimej makiselikan itetliokolil toTajtsin Dios tlen kuali uan tlatlamantli kiteititia.
11 Tla ikaj tlajtos, matlajto ken ijkuak ikaj kitematiltia iTlajtol toTajtsin Dios. Tla ikaj kinpaleuia oksekimej, makineltoka kipaleuia chikaualistli tlen kitemaka toTajtsin Dios. Ijkon Jesucristo tlapaleuis makiueyichiuakan toTajtsin Dios itech nochi tlamantli. ToTajtsin Dios kipia chikaualistli uan nochipa kiueyichiuaskej. Amén.
12 Nokniuan, amo manamechtlajtlachialti ijkuak sapanoua nantlajyouiaj.
13 Okachi kuali, xipakikan porque nantlajyouiaj ken Cristo otlajyoui, ijkon sapanoua nanpakiskej ijkuak moteititis ye ueyititok.
14 Namejuan nanpakij tla namechuijuikaltiaj porque nankichiuaj ken Cristo. Nanpakij porque non kiteititia nankipiaj espíritu tetlajtlachialti, nin kijtosneki iespíritu toTajtsin Dios.
15 Amikaj matlajyoui porque temiktia, tlachteki, kichiua itlaj amo kuali noso mokajkalakia kanin amo kinotsaj.
16 Pero amo mapinaua akin tlajyouia porque kichiua ken Cristo. Okachi kuali, makiueyichiua toTajtsin Dios ijkuak kichiua ken Cristo.
17 Axkan yoajsik tonal tlen omoijto para peuas kixkomakaskej ialtepe toTajtsin Dios. Tla tejuan achto techixkomakaskej, ¿tlen kinpanos akinmej amo kitlakamatij* kuali tlajtoli tlen kitemaka toTajtsin Dios?
18 “Tla akin yolkuali oui momakixtis, ¿tlen kipanos akin amo yolkuali uan akin tlajtlakolchiua?”.
19 Akinmej tlajyouiaj porque kichiuaj tlen kineki toTajtsin Dios, nochipa makichiuakan tlen kuali uan makitlalikan inyolilis imak akin otlachijchi porque ye uelis tikneltokaskej.
Notas
^ Noso “nanmonejneuiliskej”.
^ Xikita diccionario.
^ Xikita diccionario kanin kijtoua auilnemi.
^ Noso “namechijtouaj”, “namechpojpouaj”.
^ Noso “ximonejneuilikan”.
^ Noso “kiuelkakij”.
