2 Pedro 2:1-22
2 Itech altepetl Israel okatkaj profetas tekajkayajkej uan noijki namouan yetoskej akinmej tlamachtiskej tlen amo melauak. Yejuan san ichtaka namechmachtiskej tlen amo melauak para ayakmo xitlaneltokakan. Noijki kixtopeuaskej namoteko tlen onamechko. Yejuan san niman kinmixpoloskej porque ijkon kichiuaskej.
2 Miakej tlajtlakolchiuaskej ken yejuan uan ayakmo pinauaskej,* ikinon oksekimej kiuijuikaltiskej tlamachtil tlen melauak.
3 Yejuan tlaixnekiskej uan kinekiskej namechkajkayauaskej ika tlen amo melauak. Pero yiuejkika omoijto kinmixkomakaskej uan san niman ijkon panos.
4 ToTajtsin Dios okintlajyouilti ángeles tlen otlajtlakolchijkej uan okintlamotlak ijtik Tártaro.* Okintlali itech tekochtli kanin tlayoua uan ompa mochixtokej makinmixkomakakan.
5 Noijki okintlajyouilti akinmej oyoltokaj ijkuak okatka Noé. Noé otetlapouiaya tlen kuali uan toTajtsin Dios okimakixti ijkuak okichi matlatemi ipan tlaltikpak porque okatkaj akinmej amo yolkualmej. Noijki okinmakixti ok chikome tlen okatkaj iuan Noé.
6 Noijki san tlikonextli omoka ijkuak okintlati altepemej Sodoma uan Gomorra. Ye okintlajyouilti akinmej ompa ochantiayaj uan ijkon okiteititi tlen kinpanos akinmej amo yolkualmej.
7 Ye noijki okimakixti Lot porque okatka yolkuali. Lot sapanoua omotekipachouaya porque akinmej amo yolkualmej otlajtlakolchiuayaj uan ayakmo opinauayaj.*
8 Non tlakatl yolkuali nochipa omoyolkokouaya ijkuak okatka inuan akinmej amo yolkualmej, porque okitaya tlen okichiuayaj uan okikakiaya tlen okijtouayaj.
9 Non techmachtia Jehová kimati ken kinmakixtis ijkuak tlajyouiaj akinmej kiueyichiuaj. Noijki kimati kinxelos akinmej amo yolkualmej para kinmixpolos ijkuak ajsis tonal tlaixkomakas.
10 Okachi akinmej kitemouaj ken kisokiotiskej incuerpo oksekimej uan kintlauelitaj akinmej tlanauatiaj.
Yejuan moueyinekij, yoltlakuauakej uan amo momojtiaj kinteneuaskej* akinmej ueyititokej.
11 Maski ángeles okachi chikauakej, amo kinteluiaj akinmej tlamachtiaj tlen amo melauak nion amo kinuijuikaltiaj porque kitlakaitaj Jehová.
12 Pero nonmej tlakamej kiteneuaj tlen amo kajsikamatij. Yejuan kinmixpoloskej porque kichiuaj tlen amo kuali. Katej ken yolkamej amo teajsikamatij uan nesij* para kinkitskiskej uan kinmixpoloskej.
13 Kintlajyouiltiskej porque kichiuaj tlen amo kuali.
Yejuan kitaj kuali moyolpaktiskej ika tlen kineki incuerpo maski tlajka. Yejuan katej ken sokitl* uan kinsokiotiaj tokniuan. Pakij tlamachtiskej tlen amo melauak ijkuak namouan iluichiuaj.
14 Yejuan san kinekij auilnemiskej, amo ueli kikauaj tlajtlakoli uan kintlatlaluiaj akinmej amo kipiaj chikauak intlaneltokilis. Tlaixnekij ika nochi inyolo ikinon toTajtsin Dios kintlajyouiltis.
15 Yejuan yomoxelojkej porque okikajkej ojtli tlen melauak. Kitokaj iojui Balaam ikone Beor. Ye okichi tlen amo kuali porque sapanoua okinekiaya makitlaxtlauikan.
16 Pero okajuakej porque okixnamik tlanauatil. Se yolkatl tlen tlamama uan amo tlajtoua, otlajto ken se tlakatl uan ayakmo okikauili profeta makichiua tlen amo kuali omokuayejyekouaya.*
17 Yejuan katej ken ameyali tlen amo kipia atl uan ken mixtli tlen kiuiuika ejekakiauitl. ToTajtsin Dios yokintlayektlalili kanin sapanoua tlayoua.
18 Tlen kijtouaj mokaki tetlajtlachialti pero amitlaj ipati. Yejuan kinkajkayauaj akinmej yomoyolkopkej para oksepa makinyoltilana tlen amo kuali. Tlajtlakolchijtinemij uan ayakmo pinauaj* para oksekimej makichiuakan ijkon ken yejuan.
19 Akinmej tlamachtiaj tlen amo melauak kinmiluiaj oksekimej kinmakixtiskej pero yejuan katej imak tlajtlakoli. Porque tla ikaj kinauatia okse, kijtosneki mochiua itlakeual.
20 Tla yejuan ayakmo kichiuaj tlen pitsotik ken oksekimej porque kuali yokixmatkej toTeko Jesucristo tlen temakixtia, pero oksepa kichiuaj tlen achto okichiuayaj uan kintlani tlen kinyoltilana, okachi tlajyouiskej uan amo ken achto.
21 Okachi kuali amo kixmatiskiaj ojtli tlen melauak uan amo kiseliskiaj itlanauatil toTajtsin Dios porque satepan okikajkej.
22 Yokinpanok tlen kijtoua nin tlajtoli: “Itskuintli mokopa uan oksepa kikua tlen okijsotlak. Pitsolama* tlen okaltijkej oksepa momimiloua ijtik sokitl”.*
Notas
^ Xikita diccionario.
^ Xikita diccionario.
^ Xikita diccionario.
^ Noso “kinmijtoskej”, “kinpojpouaskej”.
^ Noso “tlakatij”.
^ Noso “akuitlatl”.
^ Noso “omonejneuiliaya”.
^ Xikita diccionario.
^ Noso “kochilama”.
^ Noso “akuitlatl”.
