Gálatas 4:1-31
4 Ne namechiluia, tla kitlakajteuiliskej se chokotsin, ye yetoskia ken se tlakeuali maski iaxka nochi tlamantli,
2 porque katej akinmej kimaluiaj uan noijki akinmej kimaluiaj ichan hasta ijkuak ajsis tonal tlen ipapa okipejpenki.
3 Tejuan noijki ijkuak otikatkaj tikonemej, otikatkaj titlakeualmej porque otikchiuayaj ken mokuayejyekouaj* oksekimej.
4 Pero toTajtsin Dios okiualtitlanki iKone ijkuak oajsik tonal tlen omoijto. Se siuatl okipixki non konetl uan non konetl okitlakamatki* tlanauatil.
5 Ijkon okinko uan okinmakixti akinmej okatkaj imak tlanauatil. Noijki ijkon toTajtsin Dios uelis techseliskia ken tiikoneuan.
6 Namejuan nanikoneuan toTajtsin Dios ikinon toyolipan kiualtitlani espíritu santo tlen kipia iKone. Non espíritu santo kichiua chikauak matikijtokan: “¡Abba,* noTajtsin!”.
7 Namejuan nanikoneuan toTajtsin Dios uan ayakmo nantlakeualmej. Tla namejuan nanikoneuan toTajtsin Dios, nankiseliskej tlen ye kineki namechmakas.
8 Ijkuak namejuan amo onankixmatiayaj toTajtsin Dios, onankatkaj intlakeualuan akinmej amo melauak dioses.
9 Pero tla axkan nankixmatij toTajtsin Dios noso axkan toTajtsin Dios namechixmati, ¿tleka oksepa nankinekij nankichiuaskej tlen amitlaj ipati itech nin tlaltikpak?
10 Namejuan nanmiluichiuaj porque nankitaj miak ipati seki tonal, metstli, tiempo uan xiuitl.
11 Ne nimotekipachoua porque xamo san nenka onimochijchika onamechpaleui.
12 Nokniuan, namechtlatlaujtia xiyetokan ken ne porque ne noijki onikatka ken namejuan. Namejuan amo onantechtlajyouiltijkej.
13 Pero nankimatij onimokokouaya ijkuak yikin achto onamechtlapoui kuali tlajtoli.
14 Namejuan amo onantechtlauelitakej nion amo onamechtlajyalti maski onamechtekimakak ijkuak onimokokouaya. Namejuan onantechselijkej ken se iángel toTajtsin Dios uan ken Cristo Jesús.
15 ¿Tleka ayakmo nanpakij ken achto? Porque ne nikmati nantechinmakaskiaj namoixtololouan tla uelis nankinmokixtiliskiaj.
16 ¿Uan axkan nantechkokoliaj porque namechiluia tlen melauak?
17 Sekimej kinekij namechtlatlaniskej pero amo kuali tlen kinekij kichiuaskej. Yejuan kinekij techkauakan para nankinekiskej inuan nanyaskej.
18 Kuali kajki tla ikaj mochijchikaua namechtemos ika nochi iyolo para namechpaleuis, pero moneki nochipa ijkon kichiuas uan amo san ijkuak namouan nika.
19 Nokonetsitsiuan, oksepa nankichiuaj manitlajyoui ijkon ken se siuatl tlajyouia ijkuak yikipias ikone. Ne ijkon nitlajyouis hasta ijkuak nankipiaskej namonemilis ken Cristo.
20 Nechpaktiskia axkan namouan niyetos uan kualtsin namechtlapouis, porque amo nikmati tleka ijkon nankichiuaj.
21 Namejuan akinmej nankinekij nankitlakamatiskej* tlanauatil, ¿amo nankimatij tlen kijtoua iTlanauatil Moisés?
22 ITlajtol toTajtsin Dios kijtoua Abrahán okinpixki ome ikoneuan. Se konetl okipixki iuan itlakeual uan okse okipixki iuan isiua tlen amo okatka tlakeuali.
23 Itlakeual okipixki konetl ijkon ken oksekimej kinpiaj konemej, pero isiua okipixki konetl porque toTajtsin Dios ijkon okijto.
24 Nochi non itlaj kineskayotia. Nonmej siuamej kineskayotiaj ome acuerdos.* Agar kineskayotia acuerdo* tlen omochi itech tepetl Sinaí uan akinmej ompa pouij katej ken tlakeualmej.
25 Agar kineskayotia tepetl Sinaí tlen kajki Arabia. Noijki kineskayotia Jerusalén tlen axkan kajki, porque Jerusalén yetoskia ken se temama tlakeuali uan akinmej ompa chantij yetoskiaj ken ikoneuan uan noijki katej ken tlakeualmej.
26 Pero Jerusalén tlen kajki iluikak amo tlakeuali uan ye tomama.
27 Porque iTlajtol toTajtsin Dios kijtoua: “Xipaki siuatl tlen amo ueli tikinpia mokoneuan. Chikauak mamokaki tipaki siuatl tlen amo tikmachilia ken tekoko ijkuak nesi* se konetl. Porque siuatl tlen iselti omoka okachi miakej kinpia ikoneuan uan amo ken siuatl tlen kipia inamik”.
28 Nokniuan, namejuan onanneskej* ken Isaac porque toTajtsin Dios okijto itlaj kichiuas.
29 Pero axkan panoua ijkon ken yiuejkika opanok. Konetl tlen oneski* ken nesij* oksekimej konemej opejki kitlajyouiltia konetl tlen oneski* ika espíritu santo.
30 Pero ¿tlen kijtoua iTlajtol toTajtsin Dios? Kijtoua: “Xikinmilui tlakeuali uan ikone mayakan. Ikone siuatl tlen amo tlakeuali kimokauis tlen kikajteuiliskej uan amitlaj kimakas ikone tlakeuali”.
31 Nokniuan, tejuan tiikoneuan se siuatl tlen amo tlakeuali uan amo tiikoneuan se tlakeuali.
Notas
^ Noso “monejneuiliaj”.
^ Noso “okiuelkaki”.
^ Nin tlajtoli kajki ika hebreo noso arameo uan kijtosneki “notajtsin”. Konemej ijkon okinnotsayaj inpapanuan.
^ Noso “nankiuelkakiskej”.
^ Noso “pactos”. Xikita diccionario.
^ Noso “pacto”. Xikita diccionario.
^ Noso “tlakati”.
^ Noso “onantlakatkej”.
^ Noso “otlakatki”.
^ Noso “tlakatij”.
^ Noso “otlakatki”.
